الدنيا متقسمة صحاب/ معارف/ إخوات، ولو ركزت فيها كدة، هتلاقي إن التلاتة مش زي بعض، خالص.
الصاحب ده بتجمعك بيه علاقة طيبة، جدع، لما بتحتاجه بتلاقيه، لو احتاجت مساعدة هيقدمهالك، لكن ممكن تستغنى عنه، مش استغناء إنك تبيعه يعني، لا، ممكن متكلموش فترة طويلة، ممكن متشوفوش فترة طويلة،

ممكن مع الوقت لو اتذكر اسمه تفتكره بالخير، لكن غيابه مش مؤثر فيك بدرجة الأخ.
المعارف دول ناس اجتمعت بيهم في مكان، علاقتكم طيبة، بس سطحية، مجرد سؤال، مجرد استفسار، مجرد مقابلة لطيفة بتحصل كل فين وفين، وأغلب المعارف بيكونوا علاقات قائمة على المصالح، اللي هو أنا أعرف فلان،

ده حبيبي، هكلمه يشوفلك الحوار ده، وهو نفس القصة، لما يحتاج حاجة، هيعمل نفس المكالمة.
الأخ ده بقى حاجة مختلفة خالص، هو بالمسمى صديقك، لكنه أكبر من مفهوم الصداقة، ده يعرف عنك كل صغيرة قبل الكبيرة، ده بتستشيره في كل حاجة،

ده عارف كل أسرارك، ده سندك الحقيقي، اللي بيفرح على أبسط إنجاز ليك، وبيحزن لحزنك، ومبيهتمش بهو بياخد منك قد إيه، ولا مستفيد منك ولالا، كل اللي بيعمله إنه موجود جنبك ومطمنك، ووقت ما تحتاجه، لو عنده إيه، هيجيلك.