السوشيال ميديا بتضرب كل ذرة رضا في كيانك في مقتل، الرضا عن كل شئ، عن نفسك عن وضعك عن بيتك عن مستواك عن شكلك عن لبسك، ومش شرط صورة ده تكون إنك تبص للناس في رزقها وتقول اشمعنى أنا، لا خالص، كفاية إنك تدخل نص ساعة تشوف محتوى وبعدها تحس إنك لازم تجيب كذا وتجيب كذا ولازم يكون عندك

ولازم تمتلك كذا، ولازم يكون الطبيعي والعادي إنك كاچوالي تقوم تفتح التلاجة تلاقي الأكل اللي لقيته في الڤيديو، وتفتح دولابك تلاقي اللبس اللي لازم يكون عندك زي باقي الناس.. بتلاقي نفسك بتسعى لامتلاك أشياء أنت من نص ساعة بس ماكنتش بتفكر فيها حتى، دلوقتي حاسس إن حياتك ناقصة الحاجات دي

ولازم تمتلكها بل وممكن تبذل مجهود ومال إضافيين عن مقدرتك لأن غصب عنك اتزرعت جواك الرغبة بل واحساس الضرورة بامتلاك ده.. وطبعا أنت عارف النتيجة لو لأي سبب ما ماعرفتش تحصل على الحاجات دي، وقتها فعلا ممكن تبدأ في مرحلة ال(إشمعنى أنا، إشمعنى هما)