بقالى فترة كل ما حد يكلمنى عايز يعمل ستارت أب فى مصر أقوله على نفس الفكرة ، معندناش خدمة محترمة لشراء وتوزيع الgift cards. بما إنى شرحتها 100 مرة تعالو أحكيلكو الفرصة فين والتحديات فين وليه أنا شايف دى فكرة بملايين...
دلوقتى تخيل إن حد صاحبك لسة مرتبط أو مخلف أو عيد ميلاده وإنت عايز تجيبله هدية ، عادة إنت بيبقى عندك فكرة إيه نوع الهدية بس مش عارف تجيب له إيه بالظبط. لو مثلا بيحب الكتب إنت عايز تجيبله كتاب بس مش عارف أنهو ، لو لسة مخلف أكيد محتاج حاجة للبيبى بس مش عارف هى إيه
بدل ما تروح مكتبة وتختار كتاب يمكن ميعجبوش إنت هتروح تقولهم أنا عايز أشترى gift card عليه 300 جنيه رصيد ، هيدولك كارت زى دة مشحون عليه 300 جنيه تقدر تستخدمهم فى أى وقت.
هتاخد إنت الكارت الجميل دة وتحطه فى ظرف وتكتب كلمة حلوة وتهاديه لصاحبتك ... هى هتروح أى فرع من المكتبة وتختار اللى هى عايزاه وتدفع بالكارت اللى انت اديتهولها.
ممكن تستخدم ال300 جنيه كلهم مرة واحدة ، ممكن تستخدمهم على كذا مرة لحد ما يخلصو ، وممكن تدفع بيهم كلهم ولو فى فرق زيادة تكمله كاش أو فيزا. المهم إنها معاها كارت مدفوع مقدما عليه 300 جنيه رصيد تقدر تستخدمهم خلال سنة من تاريخ إصدار الكارت ، ومينفعش تطلب الفلوس لازم تاخد بيهم بضاعة.
إنت كدة ريحت دماغك من اختيار الهدية نفسها ، وإديت اللى بتهاديه الإختيار إنه يجيب حاجة هو محتاجها أو على ذوقه
عالجانب الآخر كصاحب البيزنس بتستفيد بكذا طريقة لما حد بيشترى منك gift card:
1- بتاخد فلوس مقدما بتدخل دورة التشغيل مش محتاج تطلع بيها بضاعة فى ساعتها ، الفلوس دى تقدر تستثمرها أو تدفع بيها مصاريف أو حتى تحطها فى البنك وتاخد عليها فايدة.
1- بتاخد فلوس مقدما بتدخل دورة التشغيل مش محتاج تطلع بيها بضاعة فى ساعتها ، الفلوس دى تقدر تستثمرها أو تدفع بيها مصاريف أو حتى تحطها فى البنك وتاخد عليها فايدة.
2- الميزة التانية إنه بيتحسب عالP&L statement ك دين لحد ما يستخدم لأنك كبيزنس مدين بقيمة الفلوس دى لحد ما حد يجى يشترى بيها بضاعة ، دة بيقلل ضرايبك (معرفش هيمشي فى مصر ولا لأ بس دة النظام فى العالم كله)
3- الميزة التالتة ودى الأهم والقاتلة ، الgift card بيبقى ليه صلاحية لإستخدام الرصيد اللى فيه ، فى ألمانيا مثلا القانون إن عالأقل سنة. فى نسبة من كل الرصيد اللى عالكروت عمرها ما بتستخدم وبتنتهى صلاحية الكارت ودة معناه الفلوس دى بقت بتاعتك من غير ما تطلع بيها بضاعة
3- حرفيا كاش ببلاش مطلعش قدامه بضاعة وهتدفع عليه بس ضريبة مبيعات والنسبة دى بتوصل فى بعض المحلات/الخدمات 50% من كل الرصيد اللى عالكروت.
طيب الفكرة فين؟ محتاج خدمة سوفتوير تسمح للبيزنس إن يبقى عنده gift card. حاجة يدير بيها الكروت والرصيد اللى عليها من أول طباعة الكروت مرورا بتشغيل الكارت لما حد يشتريه وإنتهاءا بخصم الرصيد منه لما حد يستخدمه وتعطيله لما صلاحيته تنتهى. فى تفاصيل كتير بس دى الأساسيات.
ميزة البيزنس دة إنه مفهوش labor intensive operation ، المجهود كله فى السيلز + تظبيط الدنيا فى الأول عشان البيزنس يبدأ يبيع الكروت بتاعته وشوية خدمة عملا بعدها. وطبعا كسوفتوير مش صعب خالص ، إنت ممكن تبدأ بسوفتوير تشتريه من برة مش محتاج تبنيه بنفسك.
الفلوس فين؟ إنت كمقدم الخدمة دى للبيزنس إنت زيك زى فيزا وماستركارد ، إنت بتاخد نسبة صغيرة على كل transaction + رقم صغير على كل كارت بيتعمله activation وكدة كدة البيزنس بيبقى عارف إن عالأقل 10% من الرصيد مش هيستخدم فحتى بعد نسبتك الصغيرة هو كسبان.
كمان الميزة إنك مش محتاج تقنع الزبون يشترى gift card ، البيزنس نفسه هيبقى عايز يبيع gift cards لأنه هياخد الفلوس ومش هيطلع بضاعة فى ساعتها ودة بيزود فرصة إن الكاش دة ينتهى فى جيبه كرصيد مش مستخدم.
مع الوقت لو بقى عندك شركات كتير بتستخدم السوفتوير بتاعك عشان تدير الgift cards إنت تقدر تروح للسوبرماركتس الكبيرة وتشترى أرضية عليها الستاند بتاعك وعليه الgift cards بتاعة الشركات اللى فى الشبكة بتاعتك وفى اللحظة دى إنت بقيت الking maker...
بمجرد ما بقى عندك ستاند فى مكان زى كارفور أو سعودى إنت تقدر تزود عمولتك من البيزنس مقابل إنك تحط الكارت بتاعه فى الستاند. مبيعات حاجة زى كدة بتبقى خرافية. كمان تقدر تعمل إنت الgift card بتاعك اللى يسمح للزبون إنه يستخدمه على كذا خدمة لأن كلهم عندك.
البيزنس دة فى كل بلد بيبقى فيه بالكتير شركتين كبار ، صعب جدا دخول منافسين لأن مع الوقت إنت اللى بيبقى عندك العلاقات مع السوبرماركت وعندك الكارت بتاعك اللى شغال على كذا خدمة وكل الخدمات الجديدة عايزة تبقى متاحة عليه عشان يزودو مبيعاتهم.
وطبعا ممكن يبقى عندك كمان التطبيق بتاعك اللى يسمح للزباين يشترو digital gift card من أى بيزنس من اللى فى الشبكة بتاعتك ودة لوحده ممكن يزود المبيعات فى السما.
أنا شايف إن الفكرة دى 100% هتحصل عندنا وهيبقى فى شركة أو اتنين كبار بيقدمو حلول للgift cards لكل المحلات والخدمات اللى فى مصر. الصعوبة فين؟ إنك فى مصر. دى لوحدها كفاية.
أكبر خطر هيفضل تدخل الحكومة فى الموضوع وإنهم مثلا يقولو الرصيد مبيطحطش كامل عالكارت ويعاملوه زى رصيد الموبايل أو حاجة. النسخة الabibas من الgift cards
أو المخاطرة التانية إنهم ميسيبوش حد يشتغل فيه ، دة عموما بيزنس عايز حد بياع شاطر + عنده واسطة كبيرة تحميه. غير كدة متلعبش.
شخصيا أنا مستعد أساعد أى حد جاد إنه يشتغل عالكونسبت دة لو شايف إن عنده عوامل النجاح ، وعندى علاقات مع ناس فى ألمانيا خبراء فيه دة غير خبرتى الشخصية كصاحب بيزنس عملت بيزنس مرتين منهم واحد كان حوالى ربع المبيعات بتحصل عن طريق gift cards.
أنا فى الثريد مصور براندات مشهورة عشان كنت فى السوبرماركت بس هنا مفيش مطعم أو كافيه أو خدمة معندهاش أوبشن إنك تشترى gift card ، فلوس ببلاش مين يقول لأ. وطبعا عندنا فى مصر فى كمان فرصة هايلة فى التبرعات ، ممكن التبرعات تبقى فى صورة كروت عليها رصيد للسوبرماركت بدل شنط أو كاش.
جاري تحميل الاقتراحات...