رتبها

ثريد بعنوان الذكي بتعلم من غلطوا اما الحكيم بتعلم من اغلاط غيرو هنا دي تجربتي بعد الخروج من موسم القمح الحمد لله بعد موسم طويل صعب الموسم الخريفي في البصل ، الحمد لله بديت بداية فعلية شهر خمسة بتحضير الارض بالدسك تلاتة صاجة المساحة الكلية كانت ١٢ فدان هنا واحد من الاغلاط

الحصلت انو اخرت خطوة الدسك لي زمن قريب الزراعة ودا غلط كبير جدا بنقطة انو حازرع شهر ٦
حضرت الارض بعدها بي ٣ مراحل من الحراتة
اديتها بعداك طرحة للتنعيم التربة لانو البصل محتاج تربة تكون شبه ناعمة لازم تحدد جدول زمني مع بتاع التركتر لانو اي تأخير بفرق معاك

دخلت بميزانية محددة ومكتوبة يجماعة دي خطوة مهمة جدا لانو لو حصل غلط في الميزانية الموسم حيفشل لانك حتقيف في النص لازم وضع الميزاينة يجي بمساعدة مجرب فنتيجة لتقلب اسعار الاسمدة اشتريت اليوريا والداب والبذور قبل بداية الموسم لانو بقدر اتحمل لو سعرو نزل لكن ما بقدر اتحمل لو زاد

شهر ٦ بديت المرحلة الاولى مرحلة رمي المسمس اللي هو بقعد في الارض شهر بعداك بيتم نقلو للمزرعة ، بداية شهر ٧ الحمد لله انتهت مرحلة المسمس بسلام وانتقلت للخطوة الكبيرة للي هي تحويل المسمس للمزرعة يا جماعة ما قادر احكي قدر شنو البرنامج دا صعب 😂 الخطوة دي خطوة مكلفة جدا وفي نفس الوقت

وفيها تعطيل لنمو البصلة لانك بتحولها من محل لمحل التقنيات في الخطوة دي اتطورت في الخرطوم لكن في الاقاليم ماشين بمبدأ ( هذا ما وجدنا عليه اباؤنا ) القطاع دا سوق فاتح جدا نتمنى يحصل عليهو تركيز مرحلت الشتل الحمد لله انتهت اخذت فترة اسبوعين بميزانية مليون و ٢٠٠ الف

الحمد لله انتهت المرحلة وقطعت شوط كبير ، في نص شهر ٨ حصل السيل والكسر الكبير اللي ضرب الجزيرة وغرق مساحات كبيرة جدا من المحاصيل الحكومة على قد قوتها حاولت تصلحو لكن كان اكبر من طاقتها اضررنا ضرر جدا من الكسر كان اول مرة تحصل كارثة ومن هنا بدأنا الجملة اللعينة ( اول موة تحصل😂)

انا محصولي ما غرق لكن الترعة البتجيب لي الموية اتكسرت محصولي بقى يشرب بالمطرة قرابة الشهر دي كانت بالنسبة لي شبه الضربة القاضية عدم توقع الخطر دا خلاني امشي برجولي مسافة ٣٧ كيلو وشايل مبيدات في ضهري علشان كدا حسبو كويس لانو الكداري والله حار 😂

الى وصلنا مرحلة الحصاد
طبعا البصل بتباع بكميات بسيطة كسياسة تقسيم مخاطر وهنا انت كمزارع سوداني دي ياها اكبر مشكلة ليك حرفيا لانو هنا انت بتسلم نفسك برجولك للمافيا او الكارتيل اللي حيسرقوك قدامك
الحمد لله عملت على تقسيم المحصول بين سوق الجزيرة على كم تجربة في الخرطوم وبكدا انتهى

موسمي اللي حسب مقايسي كان ناجح رغم كل الصعوبات
انت كمزارع جديد دي نصائح بديك ليها :
١- انت كزول حتزرع في الاقاليم لازم تقعد قعدة طويلة في ادارة المخاطر من الكوارث الى الامراض
٢- ما تدخل الموسم الا ومعاك اخصائي زراعي لوضع برنامج وخطة تسميدية قوية واوعك من فلسفة المزارعين

٣- لازم يكون ودي مهمة جدا يحون في اخصائي للامراض لانو النقطة دي حساسة جدا مهما كانت تكلفتوا اوعك تستخسرها فيهو
٤ - المتابعة الاولية والحثيثة على كل خطوة وكل تفصيلة قروش لانو المال السايب بعلم السرقة
٥- ممكن دي تكون اهم نصيحة اعرف سوقك ما تمشي سوق وتخش عميان حياكلوك حي حتى لو

اتفقو معاك بسعر ما حيدرة وتشوف جرجرة حتفقد القروش قيمتها مشكلة السوق دي اكبر مشكلة بتواجه المزارع انو تعبك كلو حيستفيد منو التاجر وهم في بعضهم كدا بتفقوا عليك وحياكلوك حي فما تمشي سوق عميان ما تمشي سوق عميان علشان البرنامج ما ينتهي في غندهار وسوق ليبيا زي ما حصل لي 😂😂

٦- خش الموسم بدل الخطة الف انت كمزارع لازم تتعلم الارتجال وفي النهاية هي فورملا لو اتلعبت صح الارباح خيالية جدا وفي النهاية لو في اي سؤال او نصيحة انا رقبتي سدادة وال DM مفتوح
وزي ما بقول والله إنا لمجانين بحب هذه البلد دي كنز اسألو زملاؤي السعودين يوم بعد يوم بنبهوني للنقطة دي