اتق شر من احسنت اليه !
عبارة قد تكون ملخص جريمة فْتل شانكويلا روبنسون !
عبارة قد تكون ملخص جريمة فْتل شانكويلا روبنسون !
هذي سلمكم الله بنت اسمها شانكويلا روبنسون شانكويلا عمرها ٢٥ سنة البنت كانت ماشيه بطريق كل ام و اب يتمنونه لابنائهم متفوقه بدراستها قريبة من اهلها و حتى قدرت من سن صغير تأسس مشروعين ناجحين حققوا لها امان مادي جيد
حتى انها كانت تعطي صديق طفولتها خليل مصروفه الشهري ! خليل هذا خوي الماشي العائلة تعتبره فرد من افرادها لان بكل سفرة وبكل طلعه هو لازم معهم
شانكويلا كانت مع شلة مكونه من ست اشخاص و هي سابعتهم جاء ذاك الشهر اللي كان اكتوبر الماضي و فيه عيد ميلاد اثنين من الشلة ولد اسمه نيزار و بنت اسمها دي جينيه
فقرروا يسافرون للمكسيك تحديدا مدينة كابو و استأجروا فلة فاخرة اجارها اليومي ١٠٠٠ دولار ! يقال ان اغلب المصاريف كانت متكفله فيها شانكويلا لكن ما فيه شي مثبت للحين
شانكويلا اتصلت على امها ذيك الليلة و طمنتها ان امورهم تمام و كلهم مبسوطين
لكن ما ابطوا و دقوا اصدقائها على امها وقالو شانكويلا تسممت بسبب الكحول قالت الام ودوها للمستشفى قالو ما نقدر نوديها المستشفى يبي ٥ الاف دولار كاش و حنا ما معنا بس دكتورة المنتجع بتجي الحين و ما اخذوا وقت و رجعوا اتصلوا و قالو البنت توفت !
الاصدقاء ما قعدوا بالمكسيك و رجعوا من يومها على امريكا و تركوا جثة صديقتهم وراهم ! الام والاب حاولو يتواصلون مع المنتجع عشان يرتبون نقل جسد شانكويلا لامريكا لكن المنتجع ما فيه احد يتكلم انجليزي ! طوال الوقت هذا يقولون ان الاصدقاء الله يجزاهم خير كل يوم واحد منهم عندنا يواسينا
بعد جهد قدروا يتواصلون مع احد بالمكسيك يتكلم انقليزي و قدروا ينقلون بنتهم بما وصلت امريكانا احالتها للطب الشرعي اللي قال ان سبب الوفاة " اصابة مباشرة " و ان البنت مكسورة رقبتها و فيها اصابات بكامل جسدها !
تقول ام شانكويلا قبل يطلع التقرير بشوي جاني اتصال من المكسيك من مجهول قالي ان ترا كانت فيه هوشه هناك و حاولت تستفسر اكثر من اصدقاء بنتها عن هالموضوع و قالو لها كذب ما صار لكن عقب ما طلع التقرير تقول كلهم فص ملح و ذاب ما قدرنا نكلمهم ولا ندري و ينهم حتى خليل ما عاد شفناه !
الناس بدات تبحث ورا هالسته و راحوا يدققون على الاشياء اللي كانو ينزلونها بالانستقرام عن الرحله هذا الفديو صوره خليل باول يوم من الوصول واضح ان شانكويلا تعبانه من السفر و مصطلح " dead body " يستخدمونه كتعبير عن التعب و الارهاق ، بس وش هالصدفة العجيبة !
هذا المقطع نزلته شانكويلا و هو اللي صدق اعطاني شعور شين من اصدقائها فيه كانت تناديهم ما تدري وينهم و هم كلهم مجتمعين بغرفة وحده و حتى لما دخلت و مزحت معهم ما احد تفاعل معها
بهالوقت تسرب مقطع شانكويلا كانت تضربها دي جينيه!و فيه كانت عارية تماما و كلهم مجتمعين عندها و فيه سفيه قاعده تضربها يعني بلحظة ضعف ما تتمناها لألد اعدائك المقطع طويل لكنه مؤذي فما راح انزله ، الاغلب ان اللي سربه واحد منهم يبي ينقذ نفسه من هالبلوه بس كل شخص كان موجود يعتبر متعاون
بعد المقطع هذا وضح كل شي للعامة و ابوها طلع و اكد ان بنته ما هي عنيفه و لا تحب المشاكل لقطع اي شك انها هي اللي بدات و اصلا واضح من المقطع انها فعلا ما تعرف حتى تدافع عن نفسها ! شانكويلا ابنته الوحيده 💔
السلطات المكسيكية تطالب امريكا انها تسلمها هالسته بينما امريكا تقول تراي منب ملزومه اسلمك اياهم بس بشوف و لو قررت امريكا انها هي اللي تحاكمهم هذا يعني ان كل الملفات اللي عند المكسيك لازم تنقل لامريكا هالترتيبات الى الان ما هي واضحه ولا فيه احد صرح للان
المكسيك يقولون انهم طلعوا مذكرة دولية لاحد هالسته فلو دخلت اي دولة بالعالم تسلمها هالدولة للمكسيك و يعتقد ان اللي طالعه بحقها المذكرة هي " دي جينيه "اللي كانت بالفديو
الاهل سوو جنازة لبنتهم و اختارو الوان النعش الاصفر و الوردي الالوان المفضلة لشانكويلا 💔
الى الان مافيه الاهذي المعلومات المؤكدة،التغطية الاعلامية لهالقضية تكاد تكون معدومة و اخبارها تطلع من حسابات السوشل ميديا!اهل شانكويلا و مجتمعها يتهم الاعلام بان تجاهل قضية شانكويلا فتح باب التكهنات و ما اهتموا لانها من مجتمع السود عكس قضية الطلاب السته اللي سمع فيها كل العالم
لو كان فيه اي جديد عن هالقضية راح اوافيكم فيه ان شاء الله
جاري تحميل الاقتراحات...