كلمات بسيطة تحذيرية عن سوء فهم البحث ده قبال ينفجر بالتايملاين
البحث في عرضه الصحفي بقول أن السودان هو موطن نشأة البشرية
البحث في عرضه الصحفي بقول أن السودان هو موطن نشأة البشرية
البحث بحاول يرسم شجرة عائلة عملاقة لكل البشر العايشين اليوم بحيث يتتبع الاسلاف المشتركين عبر الزمن ويتتبع تاريخ هجراتهم في الماضي، عن طريق دراسة الجينات ل ٣٦٠٠ فرد من كل العالم بالاضافة لجينات أجناس بشرية قديمة
معروف في علوم الانثروبولوجيا (علم الإنسان) الجينية إن البشر كلهم قبال ٧٠ ألف سنة كانوا عايشين في أفريقيا، قبال ما تهاجر مجموعة منهم وتملأ العالم كلو out of Africa theory ، وإن عدد البشر كلهم حينها كانوا ما بين ألفين لي ١٠ ألف نسمة
يلا البحث عشان ما يساء فهمه ما بقول إطلاقا إن السودانيين اليوم هم أصل البشرية! لأن السودانيين خطوطهم السلالية جاية من ناس طلعوا ورجعوا لأفريقيا لاحقا، بينما أقدم الخطوط السلالية الفضلت في أفريقيا هي ناس الهابلوجروب أ و ب Haplogroup A & B (كأمثلة البوشمن والنوبة والدينكا إلخ)
وما بقول أن البشرية نشأت في السودان، بل أن الجد المشترك لكل البشر العايشين اليوم كان غالبا في السودان الجغرافي، ولو عملنا البحث ده قبال ألف سنة حنصل لجد جديد بزمن مختلف عايش في مكان تاني
لأن تحديد الجد المشترك معتمد على الناس البتدرسهم، زي انو ناس توتي مثلا غالبا حنلقى جدهم عايش في توتي لكن لما نوسع المجموعة البندرسها وندخل معاهم محس من منطقة تانية فحيرجع جدهم المشترك للشمالية
وما بقول أن الجد المشترك ده كان البشري الوحيد، فأفريقيا كانت ملانه نسبيا بالبشر حينها، وما كانوا ما مستقرين في مكان واحد، لانو دي عهود ما قبل الزراعة وكنا صيادين وجامعي ثمار دائمي الحركة والتنقل من مكان لآخر، وحاليا في بحوث بترجح أن أقدم ظهور للبشر كان في منطقة جنوب أفريقيا
وما بقول أن سحنات الجدود الاقدمين دي كانت بتشبه السودانيين الحاليين ولا بتكلموا بلغاتهم، بل كانوا ما بشبهوا ايا من البشر الحاليين ولا بتكلموا بلغاتنا الحالية، بل بتميزوا بأشكال ولغات ما عندنا عنها فكرة
فمن ثم ما في أي مجال للخروج بإستنتاجات من شاكلة انو نحن كسودانيين بنمثل أصل البشرية، ولا أن السودان مميز كمكان لنشأة البشر، بل ببساطة بأكد التوقعات العلمية بأن بداية رحلة الخروج من أفريقيا قبال ٧٠ ألف سنة كانت عبر القرن الأفريقي لشبه جزيرة العرب فأوروبا وآسيا
وأخيرا ده نموذج حوسبي رياضي معقد، بكل ما يعنيه ده من إحتمالات الخطأ من الداتا والافتراضات المصاحبة للنموذج، ولسه بدري قبال يتم حوله نقاش علمي جاد، لموضعته تبع المعروف عن موضوع البحث، ونقده بشكل علمي، فمن ثم لا يجب التعامل معاه كحقيقة متفق عليها علميا لسه
دي كلمات بسيطة قبال أقدر أتحصل على الورقة كاملة (بعد قراءتي للملخص البحثي) لأنها بقروش لسه، وطبعا في السودان ما بتقدر تشتريها بسهولة
رابط الدراسة:
science.org
رابط الدراسة:
science.org
جاري تحميل الاقتراحات...