تعرف إزاي إن الشخص ده لسة متأثر بالعلاقة القديمة وبيفكر فيها وهو معاك؟
- لو لاحظت إنه طول الوقت بيقارنك بحد ويفصص أفعالك ويفسرها مهما كانت بسيطة
- أكتر حاجة بديهية، إنه يفضل يذكرلك حاجات من العلاقة القديمة من غير ما تسأله وبدون سبب لذكرها
- إنه بيستخدمك عشان يكيد حد كان يعرفه

- لما يستخدم أفعالك الكويسة عشان يقلبها مندبة إنه عاش شعور صعب قبلك ويحكيلك بالتفصيل كل مرة وتنسى إنك عامله حاجة كويسة
- إنه يتعامل معاك بناء على مخاوف هو معرفهالك من الماضي حتى لو انت مبتعملش حاجة منها، ولا حتى بتصدرله أي شعور زيها، إطلاقًا

- إنه بيقيمك بناء على حاجات هو شافها في اللي قبلك وبيعتبرها فيك لمجرد إن اللي قبلك كان بيعملها، فتلاقيه طول الوقت زي ما يكون حاطك تحت اختبار وشايفك بعين الشخص السابق مش إنت
- إنه طبعًا يخليك تشك في نفسك ومتصدقش إنك كويس بينك وبين نفسك عشان هو مقتنع إن كل الناس شبه الأولاني

إنت بمجرد ما اتحطيت في مقارنة مع حد تاني، اعرف على طول إن الشخص ده لسة بيفكر في اللي قبلك، ومعنى إنه بيفكر إنه لسة متخطاش، يعني إنت مجرد تجربة، بيشوف مشاعره لسة شغالة ولا عطلانة، لو شغالة يبقى هيحبك، لو عطلانة يبقى كأنك مجتش وهتمشي في صمت عشان وجودك كان مجرد استنساخ مش أكتر.