تعاني من عدم تأدية الصلاة في وقتها؟ سبب ذا الشيء عند الأغلب هو التأجيل.. "أخلص ذا الشيء وأصلي، بصلي بعد شوي، وغيرها من الأعذار" كل هذي وساوس من الشيطان.. وعلى هالوضع تجلس تأخرها حتى إلى وقت الصلاة اللي بعدها، الشيء اللي لازم تسويه بذي الحالة هو إنك "تصلي فورًا وقت الإدراك".. كيف؟
أول ماتُدرك وقت الصلاة قوم وصلّي على طول ولا تفكر ولا تعطي مجال للشيطان يوسوس لك بأعذار باطلة.. مهما كانت أهميّة الشيء اللي جالس تسويه لا تقدّمه أبدًا عن الصلاة صدقني لا بركة في أي عمل يُشغل عنها، وبالعكس بيعينك ربي في عمل هالشيء في حال تأديتها
ناهيك عن إنها راحة نفسية بشكل جدًا كبير! إنه يكون وراك صلاة ماصليتها نفس الهم بتجلس تفكر فيه ولا راح تقدر تركّز بشيء ثاني وأكيد تعرفون ذا الشعور، جرب صلي الصلاة في وقتها وشف الراحة النفسية اللي بتجيك بتحس خلاص ماعاد وراك شيء وتقدر تكمّل شغلك بشكل طبيعي وأنت مروق بعد ❤️
كل هذي دوافع تخلّيك تأدي الصلاة في وقتها، وإستمرارك عليها بيخليك تنتظم في وقتك مع الله وبيخليك مرتاح نفسيًا وبتلاحظ ذا الشيء بيومك وبتلاحظه حتى على نفسك كيف تصير تلتزم بالمواعيد والأوقات في جميع أمور حياتك الأخرى، والله يثبتكم جميعًا يارب 🙏🏻
جاري تحميل الاقتراحات...