سعر الصرف في السوق السوداء مقلق على المدى القصير، لكن مش مقلق بالنسبة لصانع السياسة النقدية على المدى الطويل طالما عنده خطة..
ليه؟
لإن السعر الموازي ناتج عن مضاربات وشح دولار في النظام المصرفي، مش عن انهيار حقيقي للقيمة العادلة للجنيه..

وده معناه إنه بمجرد توفر الدولار مصرفيا هيرجع السعر للقيمة العادلة، وده اللي حصل في ٢٠١٦..
الدولار وقتها كان أحيانا بيكسر الـ٢٠ في السوق السوداء وفي ناس كتير خسرت بسبب الشراء عند النقطة دي بغرض المضاربة وعلى أمل انه يطلع، لكنه في الحقيقة نزل واستقر فترة طويلة من ١٥ لـ١٧..

(القادم تحليل مش معلومات)
لو قولنا إن نفس سيناريو ٢٠١٦ هيتم تطبيقه فده معناه إنه ممكن يخفض قيمة الجنيه رسميا لرقم أقل من القيمة العادلة لكن مش عند نفس النقطة اللي وصل لها السوق السوداء (نقطة بين السعرين)..

الوضع ده هيستمر لفترة يلم فيها دولارات ويوفرها في النظام المصرفي، وأتوقع إنه هيكون في تعامل أمني مع السوق السوداء، وبعدها يرجع تاني للقيمة العادلة تدريجيا..
مطلوب مننا هو الهدوء والاطمئنان لإن احنا عندنا مشكلة مش كارثة.. والصدمة الأولى عدت خلاص.. احنا في مرحلة تكيف لن تطول..