لاضاق صدري وافتكرت المواليف
وتكالبت فوقي هموم الليالي
اسج واكتب بالقصايد مواقيف
بابيات تبدي موقفي وانعزالي
مثل النقط دونتها ف الصواحيف
نقطة قلم ماتحتمل للسؤالي
ولا جيت بذكر سرها والتواصيف
تردني عنها سلوم الرجالي
فيها مشاعر صادقه تتبع الطيف
طيف اللذي لازال ف القلب غالي

تذكر زمانن فيه حلو المواقيف
وتعانقه الاشواق ويرتاح بالي
عهدن خفيته عن جميع الملاقيف
حتى القَّرَّيبْ ماعطيته مجالي
الصمت مركب والسراير مجاديف
والصبر بحره واقطعه باالعدالي
مجدافها يكسره كشف المضاريف
ولا ينقذ الغرقان طوي الحبالي

اسج بااقدامي لحالي على السيف
في بحر سيفه من المخاليق خالي
وتزورني ذكرى القلوب المواليف
واسرح على ذكراه ويرووق حالي
وأفوق وتعود حلومي مخاليف
ومن عقبها مايوم وقتي صفالي
قلبي وروحي والمشاعر ملاهيف
والشوق حمله مثل ثقل الجبالي
وذكرى المحبه في عيوني مضاييف
ماكنها الا مثل صفر الدلالي

تصب من دموع العيون المناكيف
وتسقي خفوقن مفقتد للغوالي
والراس دايم معتلي في المشاريف
لو كان قلبه من العنا مايبالي
هذي هي الدنيا وهذي الصواديف
واعمارنا ياصاحبي ل الزوالي
ماقلتها واشكي عليك التصاريف
شكواي للمولى عظيم الجلالي