عايز أقول كلمتين كدا بخصوص اللجان الالكترونية
وأنا هتكلم بشكل عام ومن غير ذكر أسماء عشان الموضوع مش شخصي بس، بالتأكيد فيه جانب شخصي بس الجانب العام هو الأهم وهو الأولى بالاهتمام .. وأنا واثق في قدرة اللي هيقرا الكلام على الاستنتاج والتطبيق ومد الخطوط على استقامتها
وعايز في البداية أوضح أنا اقصد ايه ب "اللجنة" .. اللجنة دي مش لازم يكون بوت أو حساب وهمي بس، طبعا فيه بوتس وفيه فيك اكاونتس كتير بس اللجنة كمان ممكن يكون بني ادم عادي وصورته هي دي فعلا بس لجنة، بمعنى انه لا يعبر عن نفسه
لا يعبر عن نفسه بمعني انه مش زيك وزيي بتيجي حاجة في دماغك سواء فكرة ولا رأي ولا سب ولعن في العيشة واللي عايشينها ولا زي ما الدماغ ما تجيب يعني وتتكل على الله، اللجنة بقى لأ مش كدة، هو هنا كوظيفة، شغلته انه ينفذ أچندة معينة
واللجان منتشرة في تيارات كتير على فكرة مش بس مقتصرة على الأمن، زي ما فيه لجان للنظام فيه لجان اخوان وفيه لجان للتنوير، وغيرها .. والحوار دا بيتصرف عليه كتير ومن أطراف كتير بعد الأهمية السياسية والثقافية اللي اكتسبتها السوشيال ميديا في خلال العشر سنين اللي فاتوا
والعيال دي بقى هي اللي بتعمل الترند اللي بيجيلهم من فوق فا تقوم الصحافة والاعلام الرسمي ياخد من الترند مادته فا تنتج اللجان رد فعل على نقاشات الاعلام الرسمي اللي بتترمي هنا، وهكذا في دائرة مغلقة مدارة من اعادة انتاج وتدوير الخطاب واستهلاكه
وأول هدف للجنة بيكون الانتشار، والانتشار دا بيتم عن طريقين: كمي وكيفي، الكمي دا هو تزويد عدد المتابعين، اما بشراء متابعين علطول أو عن طريق الفولو/الفولوباك بأكاونت بصورة بنت وأقوال مأثورة لفترة وبعدين تصفير الفولوينج وقلب عداد، أو عن طريق اكاونتات البورنو وروابط البث ف الكورة
تاني حاجة بقى وهو الانتشار الكيفي ودا الأهم، ودا بيحصل عن طريق تأسيس تقاطعات ايدولوجية مع الدوائر المؤثرة على البلاتفورم، بحيث ان اللجنة يتفق معاك في قضايا فكريا مهمة، ويسنتر الاتفاق دا كنقطة انطلاق لتمرير وصوله للمتابعين عندك اما بالمتابعة اللي هيحصل عليها منك أو تفاعلك معاه
والنقطة الأخيرة دي أنا شايف انه مهم نقف عندها ثواني لأن هي دي الحلقة الوحيدة اللي انت تقدر توقف بيها الدايرة الوسخة دي! الفولو بتاعك -فضلا عن التفاعل- لحساب لجنة له دور محوري وفعال ومهم جدا في انتشار اللجان وزيادة تأثيرهم في النقاش العام
ودا ليه؟ لأن فيه متابعين عندك انت ممكن تكون ماتعرفهمش بيثقوا فيك وبيثقوا في حكمك على الأمور، ولما بيشوفوا اكاونت ما انت متابعه هما كمان بيدخلوا يتابعوه، وأنا أول المتابعين دول وكتير كنت بتابع حسابات لما بلاقي فلان ولا علانة من اصحابي اللي بحترمهم وبقدرهم متابعينهم
والمتابع دا مش هيشغله أوي انت متابع الاكاونت دا ليه؟ هو هيبص كدا هيلاقيك متابعه هيبص ع الاكاونت بشكل عام هيلاقيه متفق معاه فكريا وايدولوجيا في كام حاجة -بما انه متابعك- فا خلاص هيعتمده
انت هنا بقى عملت ايه؟ انت عملت اللي هو عايزه بالظبط، هو عايز ناس، عايز بني ادمين حقيقيين مش مهم الناس دي هتشتمه ولا هتمدحه، مش هيشغله الموضوع دا، هو اللي يهمه انه بالناس دول خلاص اتحول لانسان
وخليني أكرر اللي قلته فوق، اللجنة ممكن يبقى انسان عادي بل ممكن يكون اكاونت موثق، وفيه هنا حسابات موثقة ولجان وكل الناس عارفاها عادي، الفكرة انه عاوزك انت كاعتماد ليه لدى متابعينك، الموضوع دا بالنسباله هو اللي هيحدد نجاحه كلجنة من فشله اصلا، وكل ما قدر يعمق العلاقة كل ما نجح اكتر
نيجي بقى للمحتوى .. لو لاحظت هتلاقي ان محتوى اللجان فيه صفتين أساسيتين، ممكن يتضاف عليهم حاجات تانية على حسب شطارة كل لجنة عادي، بس فيه حاجتين لا تكاد تخلو منهم "التويتة الأولى" عن قضية معينة لحساب لجنة
أولا: ان التويتة تكون مستفزة.
ثانيا: يكون مش من الصعب تفنيدها.
وهما دول الشرطين الضروريين لتويتة قادرة على "اثارة الجدل"
ثانيا: يكون مش من الصعب تفنيدها.
وهما دول الشرطين الضروريين لتويتة قادرة على "اثارة الجدل"
ممكن طبعا يتضاف ع الصفتين دول حاجات تانية على حسب الشطارة بقى زي ما قلنا، ممكن التويتة تكون بتلعب على العاطفة مثلا فا تجيب رد فعل مضاد لكونها مستفزة فا رد الفعل يكون مُستهجن لدى الناس بابتزازهم عاطفيا، فا الناس تمسك في بعض برة عن الحوار اصلا .. بيحصل دا بردو عادي
وفكرة ان الناس تمسك في بعض برة عن الحوار اصلا دا نمط هتلاقيه متكرر جدا: قضية ما، آراء مختلفة عن القضية، رأي "مستفز جدا وسهل تفنيده" ثم توجيه كل الغضب -أو ممكن نقول "التفاعل"- تجاه صاحب الرأي دة
والكوت تويتس بقى هي الكفيلة بانها تمسك التويتة دي بالحساب دا وتمشي توزعه على الناس، ودا زي ما قلنا هدف بحد ذاته، الانتشار هدف
بل انهم ساعات بيردوا على بعض لأن التقاطعات دي مش في دوايرك انت لوحدك، فا تفنيد المحتوى المستفز دة والرد عليه ورفع اثارة الجدل هو دا اللي بيخلق الترند
أنا لحد هنا خلصت كلامي، ولكن هستأذنكم في بعض التوضيحات الضرورية جدا بالنسبالي:
أولا: أنا مش في سياق نصح أي حد العفو، ولا انا قاعد هنا أدعي الحكمة والقطع على الأمور .. انا لحد شهر فات كنت عامل فولو للجان، أنا بس اهتميت بالموضوع شوية في فترة قفل الاكاونت ووصلت لحاجات جيت اقولهالكم زي ما بقول اللي بييجي في دماغي علطول يعني
ثانيا: انا مفيش في كلامي أي حكم أخلاقي على آراء اللجان نفسها، ولا قلت صح ولا غلط ولا رأي كويس ولا وحش، بالعكس أنا أتمنى مساحة عامة حرة حقيقية للتعبير، لأي حد الحق فيها انه يعبر عما يراه، بل ان كلامي اصلا هدفه تنقية الساحة العامة للوصول الى نقاش عام حقيقي وحر
مفيش حد لجنة عشان هو قال رأي غلط ولا رأي وضيع ولا رأي غبي ولا رأي مؤيد ولا أيا كان، لأ للانسان الحق في الخطأ والحق في التجربة والتدافع المجتمعي في الخلافات الفكرية والثقافية هو قوة الدفع الحقيقية للتطور سواء على المستوى الجمعي أو الفردي ودا مابيحصلش الا في ساحة عامة حرة وحقيقية.
بس، ولو وصلت لحد هنا بشكرك لوقتك واهتمامك.
جاري تحميل الاقتراحات...