لما تقول لحد شكلك جميل النهاردة، لبسك حلو النهاردة، إنت مش متخيل وقع الكلمات دي في نفسه إيه بقية اليوم، الكلمات الداعمة ليها تأثير إيجابي في نفسية أي إنسان، خصوصًا إن الإنسان بيلبس ويشرب وياكل بخلطة مع الناس، ويهمه رأيهم، مهما تظاهر إنه لا مش مهتم
....

أنا أعرف ناس ممكن متنامش فعلًا من مواقف أو كلمات، ودي مش مبالغة، دي حقيقة، والكلمات أو المواقف دي بتستمر معاهم لشهور وأحيانًا لسنوات.
في كتب بتتكلم عن تأثير الكلمات بس على الحالة النفسية والعقلية للإنسان، الكلمات الإيجابية ليها تأثير كبير جدًا، والسلبية ليها تأثير كبير جدً

جرب تكون في مشكلة، وتحكي لصاحبك، وتسمع منه كلمات داعمة، أو اهتمام بحل المشكلة، أو وضع حلول للمشكلة، وشوف هتبقى عامل إزاي بعد ما حكيت، وقارنه بقبل ما تحكي، وهتعرف إن حتى وجود شخص إيجابي بيفرق في تكوينك إنت كإنسان، وغيابه، قادر يدمرك نفسيًا.

حتى مع الأطفال، طول ما إنت بتقلل من قدراتهم، وبتسخر من أي حاجة بيعملوها، فإنت بتقضي على أي طاقة إبداعية عندهم، وبتسببلهم مشاكل نفسية بتستمر معاهم لحد ما يكبروا، عكس مثلًا ما تقوله على أبسط الأشياء إنه جميل، إنه ممتاز، هتلاقيه كل شوية بيعمل حاجة ويجي يوريهالك.

الرسول نفسه قال: "فليقل خيرًا أو ليصمت" لو مش قادر تقول حاجة تسعد غيرك، متقولش اللي يحزنه، كلماتك ليها تأثير كبير إنت نفسك متتخيلوش.