١- كل الكوكب فايق يحكي بدموازيل ربى اللي فاتت عالضاحية ونغرمت فيا. طيب عال، بعرف قديه مهم للبيئة يجي حدا من برا ويعطيها صك براءة بس الموضوع اكبر من سندويش تشيكن ساب ولعبة ورق بقهوة عالطريق. وهيدا حكي طالع من مرا شيعية عشت عمر انا واهلي بالضاحية وربينا فيا ما بدنا مين يعرفنا عليا
٢- انك تزوري الضاحية شي وانك تعيشي فيا شي تاني، وغير ما تحكي بالمشاكل ما بينحلوا. مش رح تحبي المنطقة اكتر من اللي عاش عمرو فيا. بس رح اعطي امثلة كل بيت وعيلة ساكنين بالضاحية مارقين فيا واولهن الشاب الملتزم اللي واقف ورا الكاميرا: رح بلشلك من البسيط للمعقد
٣- المنطقة بتفتقد لأدنى معايير النفس، أوكسيجين ما في بسبب إنو ما في ولا شجرة، واذا بالصدفة لقيتي شجرة بشارطك في تحتا زبالة لأن بكل بساطة شعبنا ما عندو ثقافة النضافة، بيشبه الدجاج مستعد يوسّخ (يخرا) مطرح ما بياكل وهيدا مش تخبيص حكي هيدا شي فعلي عشناه كسكان عمر بالضاحية
٤- ما في مواقف لأن بكل بساطة الملاجئ او المواقف تحت الأرض بتضل ملك لصاحب الملك، بيحطوا فيا خزانات المي، بيأجروها مستودعات فمنضطر نشترك بأقرب موقف بالتسعيرة تبعيتو أو نعمل كل يوم مشكل عالصفة. ما في شي اسمو لجنة بناية في جار قوي مشلف عادة بيكون الاقدم والأزعر بيتحكم برقاب الكل
٥- شباب موزع بالقهاوي من وج الضو لآخر الليل على شرب قهوة وطق حنك اللهم الا اذا كانوا محظوظين يلاقوا شغل وطبعاً اللي قاعد كل نهارو بالطرقات مع الوقت بيبطل سوي، يعني كنا نعاني من تلطيش ومن حكي والمحلات بتكب زبالتا عالطرقات. بتحداكي تمرقي حد مكب وتلاقي الزبالة جوات المستوعب مش براتو
٦- الكهربا متحكم فيا ازعر ممنوع تشتركي عزوقك ومن مطرح ما بدك ومندفع حتى على خط السرقة اللي معلقينو مندفع حق حماية للشريط، المي متحكم فيا ازعر اذا نقطعنا ممنوع نشتري سيتارن من برا المتحكم وطبعاً على وقتو وسعرو، صاحب الملك او بيغ بوس البناية بيبيعك مي الدولة هيدا اذا اجت
٧- أمان؟ انتي مجربة تصفي عالطريق ويطلع المطرح "ملك ابو حدا"ن مجربة تكوني عزبا او مطلقة او ارملة عايشة وحدك بالضاحية وما حدا يقرب عليكي؟ مجربة تحاولي تجيبي سيترن مي من برات المنطقة، او تركبي دش بدون رضا حرامي الستالايت او تمدي اشتراك من غير حي؟ مجربة تطالبي بحقك من زعيم البناية؟
٨- الآغا اللي بتحبي عصيراتو بتعرفي قديه بيدفع خوة ليقدر يبيعك كباية العصير؟ كنتي واقفة لما تقوّص عليه بنص دين النهار ومعك ولادك؟ لان انا عشت التجربة. انتي مجربة ما تكوني بالحزب او بالحركة او بنت عشيرة وتعيشي بالضاحية؟ لا منك مجربة يا تسلميلي
٩- انتي مجربة تكوني بسيارتك ويعلق مشكل دق سكاكين وخبيط سيارات؟ ما بظن، وما تقولي حوادث فردية لأن صارت هيي الاساس والأمان صدفة وحادث فردي. مجربة يخدشولك سيارتك لأنك صفيتي محل منو اصلا ملك حدا ومن بعدا توقفي تسألي مين عمل هيك؟ مجربة تقولي لجارك وطي صوت مجيد الرمع الساعة 3 الفجر؟
مجربة ابن عشيرة او ابن الحركة يحب بنتك ويطلبا وتقوليلو لأ؟ يا عيني يا روحي عندي بيت ملك فاضي بالضاحية تركتو وبدفع 400 دولار برا ببيت في الو بوابة حديد ومدخل جديد وكاراج، تاركة بيت 4 غرف فاضي وقاعدة بالاجار برا لان الأمان منو سندويش تشيكن ساب وكوكتيل شقف ولعبة ورق بالشارع
١١- مجربة بيتك يتدمر وما تكوني بالحزب او بالحركة او بعشيرة؟ يا عيني مش رح تحبي الضاحية أكتر مني لأن ربينا وحبينا وربينا ودفننا شهدا من عيلنا فيا، بس الضاحية تبع زمان. عشنا فيا بعدا رمل، كان فيا خضار وكان الازعر دخيل. نحنا حتى هلأ منحنّ للضاحية بس شي متل ستوكهولم سيندروم
١٢- ومتل اجري اذا بيقولو عنصرية، لأن اللي جرب غير اللي بيتفلسف وبينظّر من برا. ما رح قلك الكل، في سوريين بيسووا رقبة اللبنانيين مجتمعين، بس رح ذكرك بحريق الموتير اللي صار بالكفاءات روحي فتشي عالفيديو واقري تعليقات السكان السوريين اللي قاعدين بنفس المنطقة
روحي ع مخفر البرج والمريجة والغبيري وتفرجي عالمحاضر تبع الخطف والسرقة والنشل والقتل والاغتصاب والتعدي عالاملاك. روحي وبس تخلصي كفي كلي سندويش تشيكن ساب وتحلي بكباية عصير وتسليلك بلعبة ورق. إذا كتير بتحبي الضاحية، خدمينا وضوّي عالمشاكل بركي منحلا. الحب مش دعاية، الحب خدمة
وملاحظة لكل حاقد على الضاحية وأهلا لأسباب سياسية وطائفية مريضة، ما تنبسط بالبوست لأنو مش رح اوقف معك ضد الضاحية. بوقف مع حقي بالأمان والاحترام والمعيشة لأسباب أمنية وشخصية ومعيشية واجتماعية. أمراضكن خليلكن ياها. استغلالكن لهيك شي ما بيقل قرف عن اللي بيعملوه المتحكمين بالضاحية
جاري تحميل الاقتراحات...