تبقى ناوي على البعد عن ذنب معين او الثبات على طاعة معينة ولا تُوفق إليها!
مثلا تبقى ناوي تحفظ نفسك من الوقوع في العادة السرية او النظر إلى الحرام وبتاخذ بالأسباب ومع ذلك بتوقع برضو..

تبقى ناوي تقوم تصلي الفجر وتأخذ بالأسباب وتقول خلاص كده هقوم، أنا نايم بدري لكن متصحاش بردو!
تبقى ناوي تحفظ القرآن في مدة كذا وتجمع همتك ومتعرفش تحفظ بردو!

تبقى ناوي على طلب العلم وتشتري الكتب ومتعرفش تقرأ حاجة بردو! وغيره وغيره...
فين المشكلة؟! طيب ما أنا مستعد اهوه!
المشكلة في ال "أنا" دي!
المشكلة إنك اعتمدت على نفسك فقط ونسيت تعتمد على ربنا! المشكلة إنك أخذت بالأسباب واستعنت بها، ونسيت ربنا سبحانه وتعالى؛ مُسبب الأسباب!

إوعي تنسى التوكل على الله والافتقار إليه والاستعانة به على فعل الطاعة والثبات عليها والبعد عن المعصية ، اوعى تنسى تستعين بالله على قضاء أي أمر من امور دنياك او آخرتك ، اوعى تعتمد على نفسك ! ، خذ بالأسباب واعتمد على مسببها .

من اعتمد على الناس ذل، ومن اعتمد على ماله قل، ومن اعتمد على علمه ضل، ومن اعتمد على نفسه مل، ومن اعتمد على الله فما ذل ولا قل ولا ضل ولا مل.