والله العظيم قلة الحياء صايرة تهلك تهلك ! مو طبيعي كمية التساهل المنتشره وهذا كله يدل على قلة الحياء وقلة الحياء دلاله على اختلال الإيمان! لان الحياء شعبة من شعب الإيمان ، قال رسول الله صل الله عليه وسلم ( الإيمان بضع وستون شعبة، والحياء شعبة من الإيمان.) صحيح البخاري
أكد النبي صلى الله عليه وسلم أهمية خلق الحياء، وأنه خصلة من خصال الإيمان، والحياء خلق يبعث صاحبه على اجتناب القبيح، ويمنع من التقصير في حق ذي الحق. و الحياء نوعان ! نوع شرعي ونوع فطري
والمراد بهذا الحديث الحياء الشرعي وهو الحياء من الله تعالى؛ ألا يراك حيث نهاك، ولا يفقدك حيث أمرك، وهو بهذا المعنى أقوى باعث على الخير، وأعظم رادع عن الشر؛ ولذلك كان من الإيمان، بل من كمال الإيمان.
وخص الحياء بالذكر هنا !!! لكونه أمرا خلقيا ربما يذهل العقل عن كونه من الإيمان؛ فدل على أن الأخلاق الحسنة أيضا من أعمال الإيمان ودرجاته.
ف بالله وش قاعد يصير فيكم ؟ وش وصلكم مرحلة عدم استشعار مراقبة الله لكم ؟ ابك ماتجلسون مع نفسكم وتخوفونها من مقابلة شديد العقاب ؟! ما يجيكم شعور كيف اخلي التغريدات هذي وراي ؟ تغريدات فيها كمية كبيرة من عدم الحياء وقلة المروءة!
تغريدات خااااادشه للحياء تغريدات كلها اغاني وموسيقى تغريدات كلها نساء كاسيات عاريات تغريدات فيها وصف للنساء ؟! تغريدات كلها دعم للي مايرضي الله وش فيه وش فيكم صدق ! ماتشوفون الامطار قليله ما تحسون الشتاء مافيه برد ما تدركون ان هذي كلها تحذريات من الواحد الأحد!
الرجال صارو يصفون نسائهم و النساء صارت تتكلم عن مايحصل في دارها خييييير ؟! وش قلة الادب هذي وعدم المروءة وش فيكم ماعاد تستحون من الله ليه ياجماعة ربنا اهون الناظرين عندكم ليه
اوقفوا مع نفسكم وقفة حق و اتركوا الدنيا ومافيها من ملذات لا قسم بالله يجي عليكم يوم تتمنون فيه امام الله انكم بس ترجعون للدنيا تتمنون تعملون عمل صالح يغفر فيها ذنوبكم
انتم مسلمين عيشو مسلمين حقيقين وموتو مسلمين حقيقين لا تصيرون اسلام اسم استسلموا لله بحق وحقيقه اعملوا باسم الاسلام صح ، مو انسانه او انسان يشهد ان لا اله الا الله وان محمد عبده ورسوله ثم ينزل تغريده فيها سيئات جاريه ما الله فيها عليم ( اغاني ، مسلسلات ، صور نساء كاسيات عاريات ،
وكلام ما اقوله في بيتنا وتحريض وسوالف لها اول مالها تالي) اوقفوا عند حدكم لان وقوفكم عند حدكم لكم انتم مو لاحد ماراح تزيدون الاسلام رفعه انتم بالاسلام تساعدون نفسكم بدون الاستسلام لله كلنا ساقطين لاحول لنا ولا قوة
قسم بالله ان في امور البنات و الرجال يتداولونها امور مو عاديه ابدًا من كثر ما يتداولونها نسو انها حرام حرااااام حرام ولاتجوز يا جماعة صرتوا تسولفون بالحرام كأنه حلال وجايز اعوذ بالله من غضبه اعوذ بالله من الانتكاسه
تكفون قسم بالله تساعدون نفسكم ما تساعدون شيء غير نفسكم الاسلام بقدرة الله منصور منصور بس حنا ان اغضبنا الله من ينصرنا ؟!!!! من ينصرنا من غصب الله استوعبوا واصحوا على نفسكم والله اننا ضعوف ولا حول لنا ولاقوة الا بالله العلي العظيم
تذكروا ان كل اللي انتم فيه من مسليات والله ماهي الا انشغال عن الحق اللي نكروه الكفار واننا والله مقابلين ربي لا محاله اسألوا انفسكم راح نقابل الله في وش ؟وش اعمالنا اللي بتشفع؟استغفروا سبحوا هللوا خلو الله يرضى عننا والله وضعنا مو طبيعي لا امطار لا براد الله المستعان
و الله يحبنا والله ! ويبي لنا الخير لانه يعلم اننا ضعوف و اننا ما نحصل على الراحه والاستكنان و الجنة الا في مرضاته و ترى التوبه بابها مفتوح احذفوا الامور اللي ماترضيه و اسعوا للرضاع تفلحون و الدين الاسلامي مافيه تشدد الدين الاسلامي هو العدل والراحه للانسان
اختم كلامي بكلام ربي حبيبي قال تعالى ( وَاللَّهُ يُرِيدُ أَنْ يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَنْ تَمِيلُوا مَيْلًا عَظِيمًا يُرِيدُ اللَّهُ أَنْ يُخَفِّفَ عَنْكُمْ وَخُلِقَ الإِنسَانُ ضَعِيفًا [النساء: 27، 28] )
ربي يحبنا ويبينا نتوب لصالحنا ف اصلحوا انفسكم واوقفوا معاها وقفة حق و خلونا نتكاتف بإنكار المنكر ونسعى بنشر الاسلام بالصورة اللي أمر فيها الله ، و اللي مايجوز نقول عليه مايجوز ولايصح حتى يرضى عنا الله ونبتغي ماعنده.
هذا وصلوا على خير البشر حبيبنا محمد اللهم صل وسلم عليه واستغفرالله لي ولكم.
أسعو لرضاه *
جاري تحميل الاقتراحات...