أنا مش عارف الناس اللي بتقول حرام في الدين ندعي على حد دي جايبة المعلومة منين؟ عندنا آية واضحة في القرآن بتقول لَّا يُحِبُّ اللَّهُ الْجَهْرَ بِالسُّوءِ مِنَ الْقَوْلِ إِلَّا مَن ظُلِمَ ۚ هي دي الحالة الوحيدة اللي يحقلك ويجوزلك فيها الدعاء على أي شخص؛ إنه يكون ظلمك فعلاً....
والظلم هنا بيقاس بحجمه، يعني مينفعش هو يخبطك في رجلك فتدعي إن رجله تتبتر، لكن لو شخص آذاك في شغلك ومصدر رزقك، أو سببلك ألم نفسي وعيشك لحظات صعبة، يحقلك تدعي عليه يدوق نفس الشعور، أه والله عادي، وتدعي على اللي ظلمك في شغلك بنفس القدر، عادي برضه
والمظالم هي الحاجة الوحيدة يوم القيامة اللي مرهونة بعفو الناس، يعني ربنا بيغفر إلا ظلم شخص لشخص، دي مرهونة بعفو ومسامحة اللي وقع عليه الظلم، يعني لو في مظلمة بينك وبين شخص وإنت مش مسامحه ووقفت قدام ربنا ومقدرتش تسامحه للأسف الشديد هيكون عقابه كبير وبعدل ربنا
ولازم في الدنيا لما تقول أنا مسامح يكون قلبك وكل حاجة فيك فعلاً مسامحة، عشان التسامح معناه إنك عفوت بصورة نهائية، مش تقول أنا مسامح وإنت بينك وبين نفسك مش قادر تبص ناحية الشخص أصلاً من شدة الظلم اللي فرضه عليك، وفي ناس بتكون بتلفظ أنفاسها الأخيرة وهي بتتمنى فلان يسامحها بس!
احنا كنا متفقين على الشبكة، وكل تفاصيل بيتنا، ويوم ما دخلت شقتي وافتكرت هي كانت عايزة التفاصيل إزاي كانت أكبر قهرة في حياتي، وتخيل بقى واحدة تعمل كدة، تغدر بيك في ليلة، وتتصل بعدها تقولك إنت لازم تتخطى وتعيش حياتك بقى وترجعك أميال لورا..في ظلم أكتر من كدة إيه؟
هي الإنسانة الوحيدة اللي عمري ما هسامحها، والموضوع ضخم بالنسبالي عشان أنا فعلاً كنت بسعى بكل الطرق عشان نتجوز زي ما كنا متفقين، وهي اللي سببتلي أثر سلبي إني مستحيل أرتبط بإنسانة إلا وفي شك في قلبي إنها ممكن تعيشني الماضي اللي حاولت بكل الطرق أتفاداه
وهي اللي عملت كدة يوم عيد ميلادي، يعني سابتلي ذكرى لو فضلت طول عمري أنساها هتفضل مميزة وقاسية، وحياة الرجل بتكون أقوى بالأسرة الطيبة، وحياته بتكون أسوأ بالمشاكل، يعني مستحيل تلاقي رجل ناجح وسعيد في حياته إلا وأسرته داعم له ومصدر أمانه، والأسرة هي الزوجة طبعاً
وليا صديق عاش تجربة أصعب، كان في واحدة ارتبطت بيه وبعد ما كان رايح يتقدملها قالتله لا، عشان يكتشف بعد شهر إنها هتتخطب ولمين؟ لواحد هو يعرفه، ويعرف إنها كانت مرتبطة بيه أصلا بس هو سابها فكانت داخلة العلاقة بس عشان تحس إنها مرغوب فيها، وبعد ما اتخطبتله هو مرضيش يكمل معاها وفسخوا
جاري تحميل الاقتراحات...