رتبها

صباح الخير......
♦️ أخبار الكوكب...... كوكب الجمعة ♦️
و لو إنتوا مش متابعين أخبار الكوكب....
بسرعة هاتوا كوباية الشاي بالنعناع وتعالوا علشان هناخد لفة ف الكوكب....
ومطولش عليكوا وقولولي طول......

إنجلترا......
بس إما تيجي وانا احكيلك علّي جرااا.....
وأمسح دموعي فمنديلك علّي جرااا.....
الشعب الإنحليزي مش عارف هيلاحقها من مين ولا مين ولا مين..... وسعي كدا لوسمحتي
ولا مين ولا مين.....
وبعد ازمة البيض اللي ضربت كل سوبر ماركتس انجلترا والشعب هناك مش لاقي البيض

الأطباء وهيئة التمريض ف إنجلترا قعدوا مع بعضهم قاعدة عرب كدا وإتفقوا إنهم يعملوا إضراب. آه والنعمة
وقالك إيه بقا....
إن التضخم وصل ف انجلترا ١١.٥٪ وبصراحة المرتبات مبقتش تأكلنا عيش وبنطالب بزيادة المرتبات
بس الصراحة مسكتلهمش وزير الصحة الإنجليزي وقعد معاهم وقالهم عيب....

عيب دا إنتوا مهنة سامية
ردوا عليه وقالوله سامية دي تبقا امك آه والله وكملوا إضراب لدرجة إن حتى مريض الطوارئ
اللي هو بيموت حرفيا بيترمي ف إستقبال الطوارئ بالأربع وخمس ساعات
دا غير قوائم الإنتظار عندهم اللي وصلت ل ٧ مليون إنجليزي مستنيين دورهم علشان يتعرضوا على الدكاترة الإستشاريين

خد بالك ان النظام الصحي ف بريطانيا هو افضل نظام صحي ف العالم.... بس بينهار حضرتك بسبب الازمة الإقتصادية....
آه نسيت أفكرك إن مصر اللي مش عجباك دي قضت على فيروس الكبد الوبائي اللي كان بيصيب ١٠ مليون مصري من أيام ما له وما عليه
ومفيش مصري دفع جنيه من جيبه.

كمان فعهد السيسي ف الوقت اللي فيه ٧ مليون إنجليزي على قوائم الإنتظار علشان بس يعرفوا يقابلوا دكاترة علشان بس يشخصوا عندهم إيه .... السيسي هنا بيقضي على قوائم الإنتظار...

بس دول قوائم إنتظار عمليات جراحية ولحد دلوقتي في ٧ مليون مصري عملوا عملياتهم على حساب صندوق تحيا مصر من قلب مفتوح لقسطرة قلب لتغيير مفاصل لزرع قوقعه وغيرهم من العمليات الدقيقة

♦️ وع الناحية التانية من الكوكب....
👌 روسيا....
عم الكوكب والكواكب المجاورة بوتين طلع وقال...
بقا يا ولاد المرة عايزين تحددو سعر للبترول الروسي ....!!
طب عليا الطلاق بالتلاتة.... الدولة اللي هتحدد سعر للبترول بتاعنا ما هيشموا ريحته تاني

كمان فكوكب روسيا ...
طلعت ماريا زخاروفا وقالت...
العملية العسكرية البرية اللي بتعملها تركيا فشمال سوريا هتزيد من التوتر ... ويا حرام
طيب لو هتسألني هو إيه اللي بيحصل هناك ..؟؟
هقولك تعالى وانا أقولك.....
طبعا كلنا عارفين ان تركيا وروسيا بقت علاقتهم سمنة على عسل

وروسيا عايزة تطرد الامريكان من شمال سوريا ومن سوريا كلها..
قامت تركيا فجرت علبتين تونة فميدان تقسيم واتهمت الاكراد والميليشيات الموالية لأمريكا اللي هما فشمال سوريا بدعم الارهاب فتركيا

تاني يوم الصبح تركيا اعلنت عن عملية المخلب والسيف وحركت جيشها فشمال سوريا ونازلة دب فيهم
كدا روسيا بتدق القوات الامريكية والمواليين ليهم في شمال سوريا....

وع الناحية التانية من الكوكب.....
👌 فرنسا .....
طلعت وزارة الخارجية الفرنسية النهاردة الصبح وقالت....
روسيا بتلعب لعبة قذرة وبتستخدم الشتاء كسلاح لتركيع اوروبا وإحنا مش هنسكت....
ايوا يعني يا عم الحج هتعمل إيه .....هات آخرك

قالك هنبعت ١٠٠ لاوكرانيا....!!
ايوا يعني ١٠٠ جندي فرنسي مثلا...!!
قالك لاء ١٠٠ مولد كهربا طبعا اصل بوتين ضلم اوكرانيا كلها
ياعم دي اوروبا كلها هتضلم .... اصبر بس انت مستعجلش على رزقك ؟؟

وع الناحية التانية من الكوكب....
👌 اوكرانيا....
طلع ولمؤاخذة زلينسكي وقال....
روسيا قصفت كييف وخيرسون امبارح ١٧ مرة
طلع المتحدث الرسمي للجيش الروسي وقال...
طب عليا النعمة من نعمة ربي ما قصفنا كييڤ إمبارح ...

دا هما الاوكرانيين اللي قصفوا نفسهم بالصواريخ الجديدة بعد ما الجيش الروسي عمل تشويش وحرب اليكترونية عليهم ف بدل ما الصواريخ تيجي ناحيتنا راحت عليهم وقصفت كييڤ

وع الناحية من الكوكب....
👌ماليزيا....
انور إبراهيم....
رئيس الوزاراء الماليزي الجديد اللي لسه حالف اليمين إمبارح طلع وقال ...
عليا اليمين لاحارب الفساد وهجمع الاحزاب...
ماليزيا فيها فساد ...؟؟
ااه ياعم والله
ماليزيا بتاعة مهاتير محمد.. اللي الإخوان صدعوا دماغ ابونا بيها ...!!

آه ياعم والله ماليزيا بتاعة الإخوان ...
دا حتى مهاتير محمد نفسه متهم بالفساد
دي ماليزيا واكلة على الصندوق السيادي الكويتي ييجي ٤٠٠ مليار دولار بحجة انهم غسيل اموال
هتقولي هي الكويت فيها غسيل اموال...؟؟

هقولك يابني والله مفيش ف زعماء العالم أنضف من السيسي واتنين تلاته تانيين معاه
وباقي رؤساء العالم يا إما بسكلتة يا إما بيغسل اموال يا إما سكران نيلة ليل نهار

وع الناحية التانية من الكوكب....
👌 امريكا...
إجتمع ال G7 اللي هما اكبر سبع إقتصاديات ف الكوكب
امريكا وانجلترا والمانيا وفرانسا وكندا و ايطاليا واليابان
علشان يحطوا سقف لسعر البترول الروسي ...

وامريكا قالت انا شايفة ان ٦٥ دولار للبرميل دا سعر كفاية بس تقريبا معرفوش يتفقوا مع بعض والإجتماع طلع بلح
بس امريكا مصممه على انها تحط سعر للبترول الروسي وقالت اي دولة او شركة هتشتري بغير السعر ده هنوقع عليها عقوبات

كمان فكوكب امريكا...
صحيفة جلوب الامريكية بتقول فصفحتها الاولى ان الملك تشارلز طلع ولمؤخذة يعني ليه ميول إستغفر الله العظيم
يعني حتى الراجل البركة بتاع انجلترا طلع بيتركب...
الكوكب هيولع بينا الله يحرقكوا بجاز وسخ

وع الناحية التانية من الكوكب ...
👌 تونس...
تونس النهاردة الصبح رفعت سعر البنزين
ودي خامس مرة تونس ترفع فيها سعر البنزين السنادي

وع الناحية التانية من الكوكب....
🔴 كوكب تحيا مصر....
في خبر كوميدي النهاردة الصبح على ال BBC بيقول ...
منظمة ولمؤاخذة هيومن رايتس ووتش بتاعت حقوق الإنسان عاملة تقرير بتدين فيه القاهرة علشان تعاملها مع اللاجئين....
ممكن لو سمحتوا كلنا فصوت واحد نقولهم شحااا
فالكومنتات...

علشان اللاجئين فمصر آكلين شاربين نايمين أحسن من المواطن الإنجليزي ف انجلترا والله
طب ييجوا يشوفوا الإخوة السوريين ف ٦ اكتوبر ولا اليمنيين ف المنيل ولا الليبيين ف المهندسين عاملين إزاي
قالك اصل التقرير بيقول إنهم بيتعرضوا لعنف جنسي
ليه ياعم الحج هو إحناكنا جبنالهم الشيخ ذاكر نايك

كمان فكوكب تحيا مصر.....
الإعلام الأسرائيلي من يوم التلات مقلوب وصحيفة التايمز الإسرائيلية بتقول إن في طيارة مدنية إسرائيلية دخلت الاجواء المصرية يوم التلات اللي فات وطلبت هبوط اضطراري طبعا هبوط إضطراري معناه ان الطيارة فيها مصيبة

ولما هبطت الطيارة ف المطار السلطات المصرية لقيت فيها ١١ طيار مدني إسرائيلي طالبين الدخول لمصر بدون تأشيرات او تصاريح
طبعا مصر رفضت ورجعتهم الطيارة وطلبت من الطيارة ترجع بيهم
المصيبة ان الطيارين رفضوا يرجعوا تل ابيب

طبعاالسلطات المصرية حجزتهم وبعتت للخارجية الاسرائيلية تبلغهم بالموضوع
الخارجية الإسرائيلية جت قعدت معاهم وبرضوا رافضين يرجعوا إسرائيل
تقريبا السلطات المصرية هتكتفهم وهتشحنهم تاني على تل ابيب علشان التايمز الاسرائيلية بتقول ان السلطات المصرية بدأت تدايق منهم وبتعاملهم بعنف

كمان فكوكب تحيا مصر....
مصر من أفضل 10 دول للزيارة فى العالم لعام 2022 حسب موقع World of Statistics العالمى
هتلاقوا صورة الخبر فالكومنتس

مهو مش ممكن يكون العالم كله شايفنا من احسن عشر دول فالعالم
وإحنا لسه عندنا ناس شايفة ان مصر اسوء مكان ممكن تعيش فيه ف العالم .....
انا بقترح إن الناس دي تتعالج بجلسات الكهربا والله

يعني يجمعوهم كلهم فمكان وياخدوا جلسات كهربا على نفقة الدولة ... مش عيب والله
يا تودهم إنجلترا علشان اللي بيشوف مراة ابوه بيعرف قيمة امه

كمان فكوكب تحيا مصر.....
٧٠٠ مليون دولار...
يعني مليار دولار إلا ربع حجم استثمارات مجمع السيليكون الجديد اللي هيبدء تنفيذه ف مدينة العلمين علشان نستفاد من الرمال البيضاء بخبرات شركة ST السويسرية ..

وذلك بعد افتتاح اول مركز بحوث و تطوير للشركة في الشرق الأوسط بمنطقة المعادي لتدريب ٦٠ مهندس و مطور مصري
خد بالك صناعة السيلكون وأشباه الموصلات دي في خناقة كبيرة دايرة ف الكوكب كله بين الصين وتايوان وامريكا

وخد بالك ان التكنولوجيا دي كانت من الحاجات الممنوعة على مصر إمتلاكها
علشان بتدخل فصناعة الصواريخ والاقمار الصناعية وكل ما هو متطور جدا

ما كفاية كدا ..... علشان تعبت من الكتابة وتقعدوا بالعافية
🤍 يديمك 🤍
بيعيرونا بفقرنا ....... بس أنا مش هسكت
عبدالفتاح السيسي
والسلام عليكم ورحمة الله وبركاته
تحيا مصر
تحيا مصر
تحيا مصر

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد