شالوم يمكن(هو أكيد) الممثل المصري اليهودي اللي تصدر اسمه افيشات الافلام باعتباره بطل، شالوم اسمه اساسا ليو انجل و بعض المصادر بتقول ليون انجليو مواليد اسكندرية من الرعية الايطالية،يعني معاه اوراق ثبوتية ايطالية، عمنا ليون زي ابن بلده ايطاليا و بلدياته اسكندرية توجو مزراحي
ليو، بيتكلم ايطالي و فرنسي و طبعا عربي،اشتغل محاسب و بعض المهن التانية، بعض المصادر زي احمد الحضري بيقول انه انضم لفرقة الجزايرلي المسرحية لكن للاسف قوائم ممثلي الفرقة مكانش فيهم اسمه ليو من بابه، سنة ٣٠ اتعرف علي توجو مزراحي اللي كان بدأ يأسس لاستديو خاص بيه
في الاسكندرية، عجبه ليو و اطلق عليه اسم شالوم و عمل معاه فيلمين صامتين كده ع السريع "الكوكايين" و " ٥٠٠١" و كتب علي التترات كتابة و اخراج احمد المشرقي و سنة ٣٥ مع غزو السينما الناطقة قرر توجو يغير اسمه بعد ما استقر ماديا و اصبح له صيت في السينما
و بالمرة يقدم شالوم كبطل لفيلم و كان عنوانه" شالوم الترجمان" عن شاب اسكندراني متعثر ماديا يقرر انه يشتغل ترجمان و هو مش معاه لغة اساسا، و لعب علي طريقة نطق شالوم للعربية بلكنة غربية و الفيلم نجح قام مقرر التجربة سنة ٣٧ و عمل فيلم"شالوم الرياضي"
و الفيلم ده فيه حاجتين مهمين الاولي" بعض النسخ عليها عنوان"شالوم الرياضي" و بعضها"الرياضي" بس و بعض المصادر بتقول ان السبب هو المد الصهيوني في المجتمع اليهودي المصري ..الحاجة التانية ان توجو المخرج و البيزنس مان استعان لاول مرة بفريق كرة قدم الاتحاد السكندري بالكامل في الفيلم
باتفاق مع ادارة النادي علي اقتسام الارباح ، بعد كده شالوم مظهرش تاني في السينما، و كل اللي عمله ٦ افلام اول عن آخر، بعد "شالوم الرياضي" بدأت بعض المضايقات لليهود بعضها من الاخوان المسلمين و ده موثق و بعضها من السلطة و بردو موثق المهم شالوم حس بالغدر
صحي من النوم خد اوراقه الايطالية و ركب اول باخرة علي ايطاليا و بالتحديد علي نابولي و منها لروما و مات سنة ٤٨ و تقريبا محدش يعرف عنه حاجة ، لكن توجو مزراحي فضل شغال في السينما لحد سنة ٤٦ و اخرج سلسلة "ليلي مراد" و في اوراق هنري كوريل الشيوعي الشهير (يهودي مصري رعيه فرنسيه)
قال هنري ان توجو كان عضو في الحركة الشيوعية المصرية و ده مصدر وحيد و محدش من معاصري هنري كوريل قال ده غيره، المهم توجو اخرج"سلامة" لأم كلثوم و غيرها و سنة ٤٧ و قبل الدنيا ما تولع توجو باع الاستديو بتاعه ليوسف بك وهبي و باع املاكه
و ركب سفينه علي ايطاليا و مرجعش منه لحد مات هناك في التمانينات ، المؤرخ السينمائي احمد الحضري زار ازملته و اطلع علي بعض اوراقه اللي استفاد منها في موسوعته عن تاريخ السينما المصرية، لكن محدش اهتم بنشر الاوراق دي مع انها مهمة، توجو اول مخرج حط اعلان كامل جوه فيلم مصري
و ده كان في فيلم ـ١٠٠ الف جنية)لعلي الكسار ..توجو اخرج ٢٦ فيلم و اسمه بقي متصدر شباك التذاكر بالنجوم اللي قدمهم زي علي الكسار و ليلي مراد و شالوم و غيرهم
و ده المعروف عن شالوم و توجو مزراحي
و ده المعروف عن شالوم و توجو مزراحي
اه ..هنري كوريل ..ده واحد من اهم الشخصيات اللي شكلت اليسار المصري في فترة ما قبل ثورة يوليو و حياته لغز كبير و مات مقتول في فرنسا و قصصه كتير و لا تنتهي و مهم الناس تعرف حكايته
جاري تحميل الاقتراحات...