بعد ما تختبر وتطلع درجاتك يمكن فيه بعض الدرجات ما ترضيك صح؟ مع إنك اجتهدت وذاكرت وسهرت الليل وشلت همّ وكنت متوقّع درجة حلوة ترضيك.. لكن صار العكس! هنا أنت لازم ترضى بالدرجة المكتوبة لك، لأنّك سويت كل شيء وكل الأسباب والله كتب لك الدرجة هذي وكل ما عند الله خير♥️!

يمكن الله يعوضك بدرجات أعلى بمواد ثانية، أو يمكن الدرجة اللي جتك هذي يتسخر كل شيء عشانه ليه؟ لأنك رضيت به، لا تقلّل من نفسك ومن مستوى عقلك وذكائك، ولا تشيل همّ المادة بعد ما تطلع درجته خلاص انسى، وابدأ ذاكر المادة اللي بعده

لأنك إذا جلست تفكر فيها ما راح تستفيد شيء إلا الهمّ لنفسك والتفكير! وهذا يعطلك عن حياتك ويعطلك حتى عن المذاكرة للمواد الباقية، خلاص قل الحمد لله وتوكل على الله وشف لباقي المواد وتذكر داييم إن الله هو اللي كتب لك هذي الدرجة وإنك بدون توفيق الله ما راح تجيب درجات عالية حتى لو ذاكرت

حتى تدري إنك بعد ما تفعل الأسباب وتذاكر وتجتهد وترضى بالدرجة اللي جتك، وتجيب مثلًا معدل مو هو اللي تبيه بس عشانك رضيت = الله يسخرلك الجامعة اللي تبيه على قد المعدل اللي جبته، أو يسخر لك الوظيفة المعينة عشانك رضيت بالمعدل الفلاني!

الرضا ترا مو سهل يمكن تتغيّر كل الأسباب عشانك رضيت، بعكس لو جلست تزعل من درجتك وتقول الدرجة هذي أنا ما أستحقه وأنا تعبت ووو.. بتجيب الهمّ لنفسك وما راح تستفيد شيء، لكن لو رضيت بتشجّع نفسك أكثر وبيعطيك الله، خل الرضا دايم ملازمك خصوصًا بعد ما تبذل كل جهدك وتجيك النتايج معاكسة♥️.