في يوم من الأيام، كانت قريبتي اللي على مشارف الستين بتحكيلي عن زوجها اللي اتطلقت منه وسابلها بنت خلاص هتتجوز، قبلها كان مكتوب كتابها على حب عمرها وقبل أيام من الفرح حصل خلاف كبير أدى للطلاق، قالت إنه كان ضعيف الشخصية شوية، وعلى حين غفلة قلعت دبلة من إيديها وقالتلي عارف دي إيه؟
..

قلتلها دبلة هتكون ايه يعني، قالتلي شوف مكتوب عليها إيه، اتضح إن عليها اسمه، والدبلة دي هي اللي كان مكتوب كتابها عليه وقتها وسابهالها عشان تكون ذكرى تفضل عايشة معاها وهي مرمتهاش، فضلت محتفظة بيها في صندوق ذكرياتها ورغم إنها اتجوزت وخلفت وجوازها مكتملش

يوم وفاته من كام سنة لما سمعت بالخبر كانت في حالة هيستيريا مش طبيعية، وقالتلي إنها عمرها ما كرهته حتى لما موضوعهم فشل وحست إنه تخاذل، وفضلت بتحبه حتى بعد فشل جوازها لأنه كان حب عمرها وكانت أيام وهتبقى مراته بس ربنا مأرادش

عايز أقولك إن في بعض الأشخاص مبيتنسوش، حتى لو اتجوزت وخلفت ممكن تفضل فاكرلهم الحلو، والعكس، في ناس لحد ما تقابل ربنا مش هتسامحهم، أه الأيام بتنسي، بس الناس بتتقاس بحجم تأثيرها في حياتك مش بعدد أيام وجودهم