كيف تتعاملين مع بكاء الطفل لكل مرحلة ،وعلاج ابتزازه لك بالبكاء؟
طيب أول شيء لازم نعرف إن البكاء هو اللغة الي الطفل يتكلم من خلالها ولما يبكي ف فيه رسالة يبغا يوصلها ! المن يبدأ يتكلم ،
إذا اهتمينا بمشاعره وتكلمنا معه كثير فبيصير يعرف يعبر عن الي يزعجه بدل البدء بالبكاء ،
إذا اهتمينا بمشاعره وتكلمنا معه كثير فبيصير يعرف يعبر عن الي يزعجه بدل البدء بالبكاء ،
يبدأ الطفل حياته بصرخة عالية لما يولَد، وهذه الصرخة يبغا يقول فيها: وين أنا؟ وليه خرجتوني من هذاك المكان الدافئ؟ و وين أمّي الي تعودت على صوتها لعدّة شهور؟ فتقوم الأم بضمه ويبدأ يهدأ ويتعرف عليها مع الشهور وينتمي اليها🥲💛
في الشهور الأولى في عدة أسباب للبكاء أول ٣ شهور تكون بسبب مغص ، والجوع و طلب تغيير الحفاظ والنوم ، ومع تقلبات الجو والسفر والانتقال لمكان جديد ، الحر أو البرد كمان يخليهم يبكون والتسنين والمرض والوحدة وعموما هذي أكثر فترة ممكن يبكي فيها الطفل مسكين مصدوم من الحياه😂
في السنة الأولى بيبدأ يدرك إيش يبغا بس لسه مايتكلم فراح يبكي أو يزن ويصرخ ، فلما يطيح ويتالم راح يبكي ولما يبغا شيء يبكي و لما يسنن كمان ، عموما السنة الاولى كلها سهل تسكيت الطفل و التعامل معه اذا لبينا احتياجه راح يهدا على طول ،
بس اذا طفلك مستمر بالبكاء رغم تنفيذ جميع طلباته ويبكي بشكل غير طبيعي ومكرر فضروري مراجعه الطبيب وقتها
من عمر سنتين إلى ٤ سنوات صح انه صار يتكلم ولكن هذه مرحله لتكوين شخصيته و بداية استقلاليته ، يحاول يستكشف ويقلد ويستقل لكن ستل هو طفل اذا ماعرف يعبر عن نفسه ولا وصل للي يبغاه فراح يبكي لانه بيحس بالعجز، فهنا راح نبدأ نتعامل مع الطفل باحتواء وهدوء وسؤاله عن الي يبغاه ومساعدته فيه
ممكن يبكي الطفل في هذه المرحله ايضاً بسبب قدوم مولود جديد عشان يلفت الانتباه فاذا كان طفلك طبيعي و بدأ بعد المولود بحركات جديده فاعلمي انه مسكين متأثر و مصدوم من الحدث الجديد
المهم في مرحله من سنتين الى ٤ الكلام الكثير مع الطفل عشان يصير يعرف يعبر عن شعوره بدل البكاء ، ومهم نعلمه عن المشاعر وربطها بتصرفاته مثل اذا جيعان بيحس انه متضايق فيبكي وهو مو عارف ليه واجبنا انه نسأل ليه تبكي؟
واذا انتي عارفه انه جيعان قولي له حبيبي انت الان جيعان فراح ناكل وكل شي بيكون كويس عشان يعرف ان شعوره الي تسبب له بالضيقه هو الجوع وغيرها كثير من المشاعر
طيب كيب نعالج ابتزاز الطفل لك بالبكاء ؟
ضروري مانستسلم لرغبات الطفل بالبكاء لكن ارجوكم مو بالتجاهل ضروري حضن واحتواء وسؤال، هذه المرحلة الي يتكلم فيها الطفل نوضح له إن عندك لسان حبيبي استخدمو عشان تطلب طلبك ، و تكلموا معه بكل وضوح إن ماراح يتنفذ طلبك الا بالطلب وليس بالبكاء
الطفل يبكي عشان يبغا اهتمام فمن المهم ان يتم ترتيب جدوله بشكل يومي عشان يكون مليان فعاليات و مايضطر انه يعبر بالبكاء
الحوار دايمًا مع الطفل يخليه يعرف يفكر ويعبر عن نفسه بشكل صحيح ، لازم نفهمه ان مو كل مارحنا السوق بنشتري وان عند وجود الناس نحاول نكون اكثر هدوء
لازم نحدد له الاسئله وماتكون مفتوحه لانه لسه مو عارف يعبر ، ومن المهم اشغاله ولفت انتباهه لشيء ثاني بطريقه تعجب مثل لو الطفل يبكي نقول وااوو شوف السماء حلوه مرت عصفوره ويبدأ ينتبه معك و ينسى
واذا الطفل عبيط فلما تسوون هذه الحركه سووها كانكم تكلمون احد ثاني مو له وهو بيبدأ فضوله يحركه وينسى البكاء
وبس والله ربي يعيننا عليهم ويرزقنا الصبر على ازعاجهم اللذيذ 🙏🏻🥲
واخيييرًا اذا استفدتم وحابين تستفيدون اكثر تابعوني سناب الملف التعريفي غني بالمواضيع المفيده و يومياتي كأم 💛👇🏻
t.snapchat.com
t.snapchat.com
جاري تحميل الاقتراحات...