ماذا لو ولدت لعائلة لأجيال متتابعة كل فرد منها يصل ذروة الشهرة و المال لكن سرعان ما يخفت نجمه و تتبدد ثرواته و يموت ميته مهينه ! ليس بالخبر الجيد صحيح؟ تصور ان هناك من لا يحتاج الخيال و هذه حياته! قصة اليوم عن الممثلة درو باريمور التي من عمر الثامنه و هي سكيرة خارجة عن السيطرة
درو أنولدت عام 1975 لعائلة فنية عريقة يمثلون من يوم الحصى تمر جدها لأبوها أسمه جون باريمور اللي كان يحتقر مهنة التمثيل و يشوفها لعنة أصابت عائلته! لكن كشخص أنولد لأبوين مرجج حياتهم كلها معلقينها على التمثيل و المسرح ما تركوا له خيار ثاني
العائلة يقولون إن أصلهم هنود ساكنين ببريطانيا لكنهم هاجروا لأمريكا عام 1882مع ممثلة ناجحة بذاك الوقت أسمها هيلينا ماجيسكا , هيلينا كان تأثيرها قوي على أمه و أبوه ولو تقول لهم طبوا بالبحر طبوا ! الأم و الأب جابو ثلاث عيال بنت أسمها أثيل و جون و لينول
الأم و الأب طايرين مع ماجيسكا و يروحون معها بالأشهر بجولات مسرحية وتاركين عيالهم الثلاث مالهم والي !
جون بدت تظهر عليه مظاهر التمرد و بالخمس دقايق اللي الأم و الأب يشوفونه فيها كان محوم كبدهم وشلون مزعج و راعي مشاكل الأم قالت للأبو شرايك نقعد معهم شوي و نربيهم ؟ وماتوا من الضحك وقالها الله يقطع سواليفك بس و دخلوه مدرسة داخلية معروفة بصرامتها لعلها تربية !
طبعا الولد ما فرقت معه و بتل على حاله و دخل أكثر من مدرسة و بكل مره ينتهي الحال بطرده منها لكن ما كانوا يطردونه إلا بعد ما تمر عليها عقوبات صارمه ما يتحملها طفل ! و هو عمره 11 ماتت أمه وتولاهم أبوه اللي عساه ما يتولاك !
كانو ما يشوفونه أبد يا أنه مسافر يمثل يا أنه طايح بأقرب خماره ولا يطلع منها لكن أحيانا ياخذهم معاه عشان يمثلون و يطلعون مصروفهم لكن مثل ما قلت لك جون ماهو هاوي التمثيل بالحيل وآخذه اكل عيش ، بدأت مشكلة جون مع ادمان الكحول من عمر 14 سنة ! 💔
و تمر السنين و جون يتوفق بوظيفة بأحد الجرائد و حقق حلمه انه يبعد عن التمثيل لكن ما أبطى و طردوه لأنه نشر خبر و هو فاقد !
بهالفترة أبوه فقد عقله بسبب مضاعفات مرض الزهري و جون هو اللي كان يرعاه و أخته أثيل كانت مازالت تمثل فهي اللي تصرف عليهم و المصاريف بدأت تزيد ، جون لأن أكثر علاقات أسرته بالمجال الفني راح يكلم حبايبهم عشان يلقون له وظيفة يساعد فيها أهله
وهنا بدأ مشواره الفني فعلا و كان مناسب للأفلام الصامته لأن مظهره جميل
و حتى يوم صارت الافلام بصوت جون زادت اسمهما اكثر لان يقولون ان خامة صوته مميزة ، و على الرغم من نجاحه الى ان جون شبح والده كان يطارده كل حياته و أكبر مخاوفه هو أنه ينتهي الحال فيه مثل أبوه ! اللي للاسف ما باعده
جون تزوج 4 مرات كلها انتهت بالطلاق و بكل ريحه يجيب قبيلة ولا يدري عنهم ، ادمان جون ما كان مأثر على اسرته بس بل حتى مشواره الفني بدأ يتعطل بسبب عدم مقدرته على حفظ العبارات هذا غير انه بسبب الشرب خسر مظهره اللي كانو يوظفونه عشانه فقالو وش نبي فيه لا زولا ولا عول
جون اللي كانت العقود معاه بمئات الالاف يعني بفلوس اليوم تساوي عشرات الملاييين صارو يوظفونه فزعه و فلوسه راحت على المخدرات و على المصحات اللي كان يدخلها على امل الاقلاع ولا قدر ، بالحقيقة جون كان يحاول لكن ما قدر انه يترك الشراب حتى لرحلة بحرية بسيطة !
الرجال مات وهو معلن إفلاسه و بليلة دفنه ربعه تجمعوا وجابوا جثته و سوو حفلة و قعدوا يشربون احتفالا بحياته !
نجي لأبو درو اللي كان أسمه على أسم أبوه جون أمه كانت ممثلة بعد و أنفصلت عن أبوه وهو عمره سنة و نص و يوم مات أبوه كان عمره 9 سنوات و على الرغم أنه ما شاف أبوه كثير إلا إن هالشي ما حماه من نمط حياة الباريمور و أنتهى بحياه مشابهه اسلافه !
جون الأبن وصل للقمة لكن سرعان ما خفت نجمه و سقط للقاع و السبب ؟ ادمانه اللي أدى لمشاكل قانونية شوهت سمعته بالوسط الفني و صار ما أحد يبي يشتغل معه
أخت جون غير الشقيقة ديانا توفت بعمر الـ 38 بسبب خلطها للخمر مع المخدرات و على الرغم من إن ماكان بينهم أي علاقة إلا إن هالحادثة أثرت بجون و دلته إن لعنة الباريمور ماعاد هي بعيده ! لكن هذا هم جيل ورا جيل يلعنون أباءهم لكن يستمرون بطريقهم !
جون تزوج ثلاث مرات وبكل زيجه يجيب أطفال و كلها أنتهت بالطلاق ، أم درو "جايد" كانت آخر زوجاته "جايد " كانت مهاجرة من أوروبا بعد الحرب العالمية الثانية يقولون طفولتها كانت صعبة جدا و ذابحها الفقر و يوم كبرت قررت تستمر بالمعاناة و تصير ممثلة !
الحصول على أدوار ما كان أمر سهل أبدا و على ما تلقى لها احد يكتشفها قررت تشتغل نادلة و جاء هكاليوم وشافت جون و جازلها مره يعني حليوه و ومن آل باريمور و شخصيته كانت غريبة و ماعنده قيود طبعاً جون كان يشرب ٢٤ ساعة ما يعرف يمينه من يسراه وهي دايخه تحسب عنده فكر
لكن الأهم من كل هذي الصفات إنها كانت تتوقع إرتباطها فيه راح يساعدها تصنع لها أسم بمجال التمثيل !هي ماكانت خافيتها مشاكله لكن توقعت إنها تقدر تصلح حاله و تزوجوا !
أستمروا 10 سنوات بزواج كله مشاكل لكن "جايد " تبي ظنى من الباريمور و جون قال تدرين عاد يمكن لو نجيب طفل أصير مسؤول و ألتزم وأترك الإدمان طبعا هو عنده عيال من زيجاته السابقة بس شكله ناسيهم لاسباب مجهولة
حياة درو كانت بتنتهي و أمها حامل بالشهر الثالث لما جون اعتدى بالضرب على جايد هنا جايد قالت خلاص ما عاد تنفع ذا الحياة و انا خلاص صرت مسؤولة عن روح و هجت عنه
جايد لقت نفسها بدون وظيفية بدون فلوس بدون حتى أمل للمستقيل وتحول حلمها من إنها تصير ممثلة معروفة إلى إنها بس تقدر تأمن الاجار و الحليب و الحفايظ فصارت تشتغل يوميا ثلاث وظائف لعلها تقدر تعيل درو
لما درو صار عمرها 11 شهر ربع جايد قالو لها بنتك حلوة و من الباريمور ورا ما تخلينها تمثل بالإعلانات بس جايد كانت رافضه،لكن واحد من أصدقاءها أخذ صور لدرو و أرسلها لمخرج و المخرج قاله تمام خل تجي تسوي تجربة أداء درو انقبلت على طول ما هو لانها من الباريمور بل بسبب حادثة حصلت!
درو بعمر السنتين ونص طلبها مخرج بالأسم و هالمخرج كان من معارف جايد و جايد كانت ما زالت رافضه بنتها تدخل التمثل بس المخرج قالها تكفين والله مالي خلق أدور بزر للدور عطيني بنتك و ماراح أنسى معروفك قالت جايد لا تقوووول تكفى ! البنت بنتك خذها معاك الان
درو بدت تكبر و تستوعب إن أمها أغلب الوقت تشتغل و إذا جت من الشغل مالها خلق حتى نفسها يعني تخيل تشتغل ثلاث وظايف يوميا كلها على الحد الأدنى من الأجور ! يا ساتر يالغثى و كل ما جت تطلع أمها درو تترجها تقعد معها لكن جايد تقولها ورانا فواتير لازم ندفعها
طبعا بهالوقت أبوها ماكان مخليهم بحالهم كل شوي يجي عندهم و يتهاوش مع جايد و لا هو سائل عن درو أبد حتى إنه بأحد المرات مسكها وصفقها بالجدار ! و مره جاء وهم مب فيه و كسر الباب و خرب الأثاث و مشى شكل قائمة المهام بذاك اليوم كانت لعانه و لازم يسوي أي شي عشان يحققها !
دروطفلة ماهي مستوعبة مدى سوء أبوها و من عمر صغير وهي تسعى لرضاه وحبه و محيرها موضوع عدم قبوله لها و كانت حاطه إن أمها السبب ! و من هالعمر بدأت تتكون عندها مشاعر سيئة تجاه أمها !
درو كانت داخله بعالم أمها و سوالفها و مشاكلها و تدري إن الفلوس من أكبر العوائق اللي تمنع أمها من إنها تقعد معها و بعمر الـ 4 سنوات قالت لأمها أبي أرجع أمثل ! على إن جايد كانت رافضه فكرة التمثيل لبنتها لأنها تقول انه عالم يطحن الروح و صعب المنافسة فيه
بس تقول إصرار درو وكلامها خلاني أحس إن فيه شخص كبير قاعد يتكلم بلسانها ! وفعلا درو بعمر الخمس سنوات مثلت بدور حليل بأحد الأفلام و أستمرت تسوي إعلانات بهالوقت ظهر بحياتها أخوها اللي بعد مسمينه جون ! المهم هالأخو كان ينتظر لين تطلع أمها و يسألها إذا معها فلوس عشان يعبي بانزين !
درو كانت تعطيه الفلوس اللي بحاصلتها و يروح لين أكتشتف أمها و طردته و قالت لا عاد تشوفك عيني جون طبعاً كان يصرف الفلوس على المخدرات لكن درو ما تدري و شالتها على أمها للمره الثانية تبعد عنها شخص تحبه !
وجاء الفلم اللي نقلها نقلة نوعية وغير حياتها للأبد هو فلم E.T درو أستمتعت فيه مره و كان طاقم العمل كلهم حليلين معها واهم شخص كان المخرج ستيفين سبيلبرغ اللي كانت معجبة فيه
و استمر ستيفين بحياتها و صار الاب الروحي لها
E.T نجح نجاح كبير و حقق إرادات بحوالي 500 مليون دولار , صور درو و الممثلين اللي معها كانت ماليه الشوارع هذا غير المنتجات اللي طلعت و عليها صورهم الناس بدأو يميزونها بالشوارع و يصورون معها و الصحافة أنتبهت لها و إنها بنت باريمور و خلاص صارت سالفة اللي ماله سالفة
و فازت بأول جائزة لها 😔💗
و بدأ الروتين يتغير بدال ما تنام بالليل البنت لازم تحضر حفلات و لقاءات تلفزيونية ترويج للفلم
حتى المدرسة ما عاد هي اولويةبالوقت اللي الأطفال يستعدون فيه للمدرسة كانت درو بأوروبا بجولة ترويج لفلمهم و قابلت الاميرة ديانا و الامير تشارلز و حتى بأمريكا أستقبلهم الرئيس بذاك الوقت رونالد ريغان 😬
درو كان أجرها بهالفلم 75 ألف دولار أمها هنا قالت هل تبيني أكمل شغل و أنتي تتركين التمثيل ؟ أو أترك شغلي و تكملين أنتي ؟ درو تدري بمعاناة أمها مع الشغل فقالت لأمها لا خلاص أنا بمثل و أنتي أرتاحي و كان هذا أسوء قرار ممكن لأي أحد أنه يتخذه !
بعد نجاحها الكبير كلن فطن لها و لانتمائها لهالعائلة فكانو شيبان هوليود يسولفون لها عن جدها و تقول من طريقة كلامهم كأن ادمانه شي يدعوا للفخر ! حتى SNL خلوها تقدم احد حلقاتهم و كان ادمان عائلتها نكتة ذيك الحلقة
درو تجربتها بالمدرسة كانت سيئة البزران يتنمرون عليها و المعلمين و المعلمات حاطين دوبهم دوبها و يحاولون يكسرون مجاديفها و يقولون أنتي غبية و ما راح تفلحين بالدراسة مثل الأفلام !
درو بعد كذا مثلت بفلم كأنه مكتوب عنها عن طفله لوالدين مطلقين كلهم مهملين لها فتقرر تروح للمحكمة و هي تطلقهم بعد ! جو الفلم كان سيء و طاقم العمل كانو على طول يتهاوشون و درو ما حبت التمثيل إلا لأنها تنبسط مع طاقم العمل و تحس أنها جزء من جماعة بدال ماهي طفلة وحيده
فدرو قالت لأمها عقب هالفلم ما أبي أمثل و أمها قالت على راحتك لكن ما أبطت وجابت لها نص فلم وقالت لبنتها بس أقريه وشوفي إن جازلك سويه إذا ما جازلك مب لازم و درو جازتلها القصة و رجعت للتمثيل يوم خلص الفلم طاقم العمل سوو حفلة وداعية و طبعا درو كانت موجوده
كانت تشوف الناس قاعده تشرب و مبسوطة و تجي تتحدا أثنين يعطونها كاس و فعلا عطوها مب واحد عطوها أثنين ! أثنين ! درو على طول أغمى عليها و صحت من بكرة قالت لها أمها وش صار ؟ وعلمتها باللي صار قالت أمها خلاص لا عاد تعودينها و عدى الموضوع بهالبساطة !
درو على إنها طفلة إلا إنها ممثلة و كانت على طول تعزم على سهرات لطاقم العمل بالنوادي الليلية بس ظليمة امها شينه للامانه كانت تروح معها ! بس أول ما يدخلون مع الباب كل وحده تروح بجهه وهذا اللي خلى درو تأخذ راحتها كانت تشرب و ترقص طول الليل و أمها ما تدري عنها !
درو شافت فلم البطلة فيه كانت ببداية مراهقتها و كانت تحاول جذب رجال عمره يزيد عن الخمسين سنة لسبب ما درو أنجذبت لهاللشخصية و تقمصتها و بدأت تلعبها على أرض الواقع و تقول المفاجأة أن كثير رجال قبلو هالتصرف بل بعضهم كان يتقرب مني !
و تقول أمي كانت تشوفني اقعد ساعات طويلة أستعد من مكياج و لبس قبل أطلع و اتحول من طفلة لبنت عمرها ١٨ سنة و ماكانت تقول شي بل على العكس كانت تشجعها !
درو كانت امها تصيدها احيانا اذا شربت و تهاوشها لكن تقول كنت ادري انها ما تقدر تسوي شي بالنهايه انا لازم اطلع و اشتغل عشان اسدد اجار البيت ما تقدر تعاقبني و تمنعني من هالحفلات هذا غير درو أغلب النوادي الليلة تفرح فيها و يدخلونها على طول و أحد هالنوادي هو نادي 54 و كان مكان خاص مره
ابوها بذا الوقت ما خلاها بحالها و كل شوي جاي يبي ياخذ المقسوم من فلوسها
درو صارت تنام ببيوت صديقاتها عشان تسوي اللي تبيه و بعمر 10 سنوات أم وحده من صديقاتها عرضت عليها حشيش ! و درو قالت كلو رايح هاتي بس الموضوع تطور بشكل سريع للأدمان على الهروين و كالوكايين و لأنها ممثلة تقول قدرت أخبي أدماني عن أمي و عن الكل درو علاقتها بأمها بدأت تسوء أكثر و أكثر
وجاء ذاك اليوم اللي دقت على أمها آخر الفجر و هي سكرانه قالت شوفي أنا جايه للبيت إن لقيتك فيه مب أزين لك يوم أقبلت على البيت شافت سيارة أمها مازالت موجوده وهي تنهار و تدخل و تكسر الأثاث و تحوس أمها دقت على مركز التأهيل و أخذوها هالحادثة صارت و درو عمرها 13 سنة !
درو تجربتها بمركز التأهيل ما كانت سهله دخلت و طلعت أكثر من مره و بهالفتره حاولت تنهي حياتها لين دخلت المركز بإرادتها و قررت خلاص تقطع كل شي و ينصلح حالها تقول فترتي بالمركز خلتني أعرف أنا مين تقول كل عمري كنت أتقمص الشخصيات اللي أمثلها ما كنت أمثل بس !
معالجها النفسي أقترح إن حتى أمها تدخل إعادة تأهيل لأن علاقتها بـ درو غير صحية و قاعدة تعيش حياتها من خلال درو جايد دخلت مركز التأهيل 6 ساعات و طلعت يوم سمعت بهالشي درو زعلت و هددت أمها إنها راح تقطعها معها و جايد رجعت للمركز
لكن مع ذلك معالج درو شاف إن ضرر إجتماعهم أكبر من نفعه و كل وحده تطلع أسوء ما بالثانية
طول هالوقت موضوع إدمان درو كان سر ما أحد يدري عنه لين صحفي سمع طرف عليم و جاء للمركز قال أبي آخذ جوله يمكن أجيب بنتي و فعلا شاف درو و راح كتب عنها و فتح ابواب الجحيم عليها
بعد سنة و نص بمركز التأهيل صار على درو ما صار على جدها خلصت فلوسها المركز قالولها و الله ودنا لو تكملين علاجك بس أنتي فقيرة الآن فطز فيك !
لما طلعت درو و فعلا سمعت نصيحة المعالج ورفعت للمحكمة طلب إنها تعامل كشخص بالغ رغم أنها بعمر الـ 15و تطلع عن ولية أمها و تعيش لحالها و تدبر أمورها بنفسها يقولون القاضي مجرد ما شاف إن أم درو كانت تأخذ درو لملهى 54 قال دامك رحتي لهالمكان وهي معك ما أنتي رايحه لأسوء منه و أنتي لحالك!
درو أستأجرت غرفة وبدأت تحضر تجارب الأداء تقول كل مادخلت ماتو ضحك يقولون صادقه أنتي جايه تبين تمثلين دور مراهقه بعد سواياك ؟ نو واي و راحت تشتغل بمطعم و قامت ذاك اليوم درو وجتها فكرة اللي هي ما دام هم ما عاد يشوفون اني طفلة بريئة وراي ما امثل الدور اللي صارو يشوفوني فيه !
وفعلا رجعت للتمثيل بعمر 17 سنة بدور " جريء" كانت فيه مراهقة تحاول جذب أبو صديقتها تذكرون البنت اللي كانت ملهمتها وهي صغيره!قاعده تمثل نفس الدور!عقبها بدأت تنهال عليها العروض و بدأت تقبل الظهور بمجلات مش ولابد لدرجة بعيد ميلادها العشرين المخرج حق E.T أرسلها بطاقةCOVER YOUR SELF UP
اصبروا بجيكم اكمل بعد شوي ⏰
درو عكس كل التوقعات لما كبرت اتجهت لابوها و سامحته و حاولت تبني علاقه معاه بالوقت نفسه كانت مقاطعه امها بشكل كامل لكنها استمرت تدعمها مادياً ، علاقة درو بابوها انتهت لما ما ابطى مخبي عنها وجهه الثاني و رفعت عليه قضية و اخذت حكم يلزمه بعدم التعرض لها
جايد تقول درو كانت ضامنه حبي و وجودي بينما طول عمرها كانت لازم تسعى عشان ابوها يحبها و يرضى عنها لهالسبب هي الان معه و ما تبيني ، و هالشي اكدته درو تالي و تقول كنت كل ما غضبت من نفسي صبيا هالغضب على امي لاني ادري انها بتكون موجودة دائماً
درو استمرت على ادوارها و نمط حياتها لين تقول مره رفعت عيني للتلفزيون وشفت مشهد مب كويس لي تقول زعلت و قلت الى متى و هذي حياتي ! هنا اتصلت على ادم ساندلر و كان هاللقاء سبب بفتح فصل جديد من حياة درو
درو فعلا بدأت تتجه لمسار بحياتها هي ترضاه و تبيه ، درو تزوجت ٣ مرات وكلها انتهت بالطلاق اول زيجتين ما كملت اشهر و انتهت بينما زيجتها الاخيرة استمرت اربع سنوات و انجبت طفلتين لكن للاسف الزواج ما استمر و هالشي سبب لها ازمه لمدة خمس سنوات متتاليه ما قدرت تتخطى اللي صار
و السبب ما يرجع لشخص زوجها بس بل لفشل خطة كانت تعتقد انها تقدر تحققها
هذي التجربة المره خلتها تبدا عملية الشفاء و تبدأها بارجاع علاقتها مع امها ، درو بهالمرحلة كانت بالاربعينات من العمر و جايد بالسبعين و توهم ترجع علاقتهم 💔
لكن ان كان فيه شي تعلمته من امها هو انها ما تكون مثلها !
لقاء بين درو بالاربعين و درو ام سبع سنين 😔
و بس خلصت قصة اليوم تقدرون تتطلعون على كتب درو :
Little girl lost كتبته بالتسعينات تحكي فيه عن طفولتها
Wildflower كتبته عام ٢٠٢٠ فيه اتكلم عن حياتها الى هذا الوقت و التجارب اللي مرت فيها و كيف اثرت بحياتها
كلهم متوفرين بامازون
Little girl lost كتبته بالتسعينات تحكي فيه عن طفولتها
Wildflower كتبته عام ٢٠٢٠ فيه اتكلم عن حياتها الى هذا الوقت و التجارب اللي مرت فيها و كيف اثرت بحياتها
كلهم متوفرين بامازون
اذا وصلتوا للنهاية تقدرون تتطلعون على القصص السابقة بالحساب بالمفضلة وهذي احدها
جاري تحميل الاقتراحات...