الواحد بيوصل لمرحلة إنه بشر، من حقه يحزن لتجربة سيئة عاشها سواء في حياته المهنية أو العاطفية، وعادي إني أشتكي على الأقل بيني وبين نفسي، بسمع كلام إن كل لحظة حزن بيضيع قصادها حاجة من مستقبلك أو شخصيتك؛ بس في نفس الوقت مبتعاملش مع نفسي على إني مجرد آلة لازم تشتغل تحت أي ظرف
....

في ناس، وأنا واحد منهم، الحياة صعبة عليهم، مش صعبة ماديًا، لا، صعبة إنها محاطة بالقلق والتوتر، خوف دائم من التعايش مع لحظة صعبة، خوف من خسارة حاجة، خوف مستمر من حاجات لسة حتى محصلتش

صديق واحد سئ كنت بتثق فيه ممكن يخليك شاكك في كل اللي حواليك، ومش بقول إن كل الناس زي بعضها؛ لأن التعميم غلط، بس هي دي شخصيتي، مش بدي حد الأمان ومش بتخلى بسهولة، بس لو حصلت حاجة مش متوقعها آثارها السلبية بتكون قاسية جدًا

أنا مبفرحش للحظات الحلوة، حاشا لله يكون إدعاء، بس بحاول أعقل وأستنى أشوف القدر مخبيلي إيه، وبفتكر كلام الجوكر "من أول يوم فرحنا وأنا قلقان من اللي جاي" ودي فعلًا شخصيتي، أنا عندي قلق من كل حاجة، ومعظم اللي بثق فيه مبثقش فيه خوفًا من ألم خسارته

عشان كدة ربنا خلقنا بمشاعر، ومشاعرنا متفاوتة، مننا حد قادر يتعافى في شهر، غيره بيتعافى في سنة، ودي حاجة احنا مش بنتحكم فيها مهما حاولنا نسيطر عليها، بتجيلها لحظات وتغلبنا، وقتها مينفعش نعاند