ليه بعض الناس بيتعاملوا مع الأذى النفسي في العلاقات كأنه لم يحدث؟
يعني بيشوفوا إن وقوف شخص عند نقطة معينة هو كسل وقلة حيلة منه، خليني أقولك إن البشر قدراتهم على التعافي مختلفة، ومنهم بيحتاج وقت طويل عشان يقدر ينسى
..

ومحتاجين نفصل بين شخصين اتفقوا على الانفصال لإنهم مش قادرين يكملوا مع بعض، وبين شخص فيهم غـدر بالتاني، شخص كان بيسمع وعود وواثق في شخص وفي لحظة باعه واتخلى عنه وسابه لدماغه توديه وتجيبه ويسألها مليون سؤال كلهم في الأول والأخر مجرد تخمينات وافتراضات؛ عشان الإجابة عند التاني

ومش سهل تخطي حد كنت واثق فيه، ده مبدأ في الحياة ثابت، والحاجة اللي محدش هيقولهالك إن العلاقات شديدة الأذى بتترك أثر فيما بعد؛ يعني لو في حد كان بيحب شخص وغـدر بيه، فهو غالبًا هيفضل جواه جزء خايف من إن الموضوع يتكرر مع غيره

لنفس السبب ده بنلاقي أشخاص عايزة ترجع لحياتها الطبيعية وتحب وتتحب، بس خايفة، خايفة لإنها متوقعة إن العيب ده موجود عند كل الناس، وده اللي بيخلي الموضوع يتفاقم لو دخلوا علاقة تانية وخسروا تاني

وجزئية الضرر النفسي وأثره حقيقة لا يمكن إنكارها، يعني ممكن حد يكون في علاقة مريحاه بس غصب عنه بيفضل طول الوقت خايف، مش خايف من الشخص نفسه قد ما هو خايف يعيش لحظة صعبة تاني عاشها قبل كدة لمجرد إن في حد مؤذي كان في حياته قبل كدة عملها