رتبها

قصة الدكتورة @sanaaah92914790 هنا في تويتر، أخذت على عاتقها مساعدة أي محتاج أو أي متعثرات لمسألة العلاج والدواء داخل العاصمة المثلثة، وتعطيه الحيز الأكبر في إنجازات يومها، انا اقول إنجازات يومها لأنها مقعده على كرسي متحرك من 10 أعوام 🥺ومن هنا تبدأ قصة إنسانة كالملاك
- يتبع ⬇️

بعنوان يحكي جانب من جوانب الإيمان بالقضاء والقدر .
بعنوان :{الأبتلاء ليس نهاية الحياة بل هي بداية لحياة أجمل مع الله} دكتورة / سناء أحمد @sanaaah92914790 من مواليد بورتسودان مطلع الثمانينات، وتنحدر من الشمالية قبيلة الشوايقة، وخريجة كلية بورتسودان الأهلية مختبرات طبية -
يتبع ⬇️

قسم (مايكرو) ولكن ميولها للكيمياء أكثر لولا رأي الاستاذة ونظرتها الثاقبة في إمكانيات دكتورتنا.
- تحكي دكتورتنا ان بداية الأعراض كانت تحديداً في السمستر الثاني، كنت شغاله في معمل وانا لسه بدرس واكتسبت خبرة كافية سبحان الله قبل أن اصبح عاجزه حتى أصبحت المسؤل الأول من
- يتبع ⬇️

المعمل، تبدأ الأعراض من بعد الخطوة الرابعة للقدم اليمنى التي أفقد التحكم عليها ولا تتقدم الا بعد جرها، وبفتور شديد وإرهاق في منطقة الحزام إلى أسفل الجسم واليد اليمنى، وكنت أحسُ ( بألم احتراق لم يكن وجع محسوس) كما اني أعاني من نقص في الدم
- يتبع ⬇️

- بدأت ألاحظ عدم توازن وانا شايله الصينيه خصوصاً ابوهي ما بشرب القهوة إلا من يدي، وفي يوم كان ابوي وعمتي منتظرين القهوة ولمن وصلت بعد عناء، ولأول مره افقد التوازن الكامل ويدفق جزو من القهوة في الصينية، ومن هنا بدأ الإنهيار والمعاناه وكنا على أبواب الامتحانات
- يتبع ⬇️

وبقيت ما قادره امشي الامتحان بسبب فقدان توازني حتى كلفو لي سائق خاص يوديني ويجيبني، خامس يوم السواق اعتذر وغلبني أمشي الامتحان لمن جاني ابوي ووداني وبدأ يحس انو مشكلتي كبيره..!!
- انتهت الامتحانات فوراً اتوجهت للخرطوم نزلت مع اخوي شغال في وزارة الصحة وفي الوقت دا
- يتبع ⬇️

كان وزير الصحة الولائية عمي / عبدالله سيد أحمد.
- قابلت الدكتور وعجزت اوصف حالتي ليهو بس اخوي كان مركز معاي ودا نفعنا لي قدام، المهم ما وصلنا لي شي مع الدكتور واخوي كان طالب طب بدأ يقرأ عن الأعراض ويطبق فيني نظريات😅ويفحص لي براهو ووصل لي نتيجة إننا نمشي لي طبيب باطنية
- يتبع ⬇️

وأعصاب، وفعلاً اتوجهنا للدكتور / أرباب. وكان اول تشخيص لي حالتي (لحمية في النخاع الشوكي) وكان اعتمادو على الاشعه المقطعية بس، وحاول يحدد مكانها بي مساعدة تشخيص اخوي انها في الفقرة الرابعه بالتحديد، لانو الزمن داك ما كان في رنين مغناطيسي متوفر في السودان كلها، وهنا أداني
- يتبع⬇️

خيارين اسافر مصر اعمل الرنين وارجع بالنتيجه أو يعمل عمليه على عماه لو لقى لحميه كان بها،مافي يادار ما دخلك شر!!
- سافرت مصر ولغاية أسى انا اعراضي بسيطه وبمشي على رجولي تشنجات في ظهر اليد اليمين وثقل في الخطوة الرابعه، نزلنا في معهد ناصر وبدأو معاي علاج بالفتامينات طوالي
-يتبع ⬇️

حسب التشخيص انها (لحمية في النخاع الشوكي) وللأسف ما ظهر كدا في الرنين وانا مواصله في العلاج بس بدون تشخيص صحيح.
- قمت غيرت الدكتور ومشيت لي دكتوره، واكتشفت انو عندي (التهاب فيروسي في النخاع الشوكي) بس طلع من الجسم ودي مجرد آثار جانبية! بتاخذ فترتها وتنتهي.
وعلى كدا
- يتبع ⬇️

ادتني 5 علاجات فتامين 4 انواع ابر، وواحده أقراص لمدة ثلاثة أشهر بعد تنتهي الإبر اوصل في الأقراص،وبديت العلاج ورجعت السودان.
- بعد شهرين من العلاج الألم بدأ يرجع بس ما بي صورتو الزمان احتراق وكدا كان ألم لا يطاق، وابوي كان عندو محاوله نمشي عمره والحمد لله اتوفقنا بس بعد
- يتبع ⬇️

تأخير سنه في الإجراءات في الفتره دي مشيت لي كم دكتور في السودان منهم حسب الرسول صديق واكتشف انو عندي مرض جديد وماليهو اي علاج ولم يعرف بعد اسمه ( تصلب لويحي)، حتى سافرت العمره عمرت الحمد لله، وفي المدينة المنورة استضافنا شيخ من شيوخ الحرم صديق الوالد، وحجز لي كمان
- يتبع ⬇️

في مستشفىٰ على نفقته الخاصة وبديت العلاج في مدينة الرسول صلى الله عليه وسلم، واتناوبو على 3 اطباء استشاريين وأيضاً كان تشخيصهم انو عندي ( تصلب لويحي) وهو مرض مناعي جديد وما معروف ليه اي علاج غير الكورتيزون و العلاج الطبيعي، ورجعت السودان.
- في بورتسودان كنت بعمل العلاج
- يتبع ⬇️

الطبيعي في البيت ورجعت الجامعة وبين الإجازات بنزل الخرطوم للعلاج الطبيعي.
-وفي سنة رابعة بديت امشي الجامعة بالعكاز لمن اتخرجت الحمد لله، نزلت الخرطوم لمواصلة العلاج الطبيعي وسجلت في منتديات عن طريق النت للتعامل مع المرض لانو في عام 2010 بدأ ينتشر أكثر، وبعد مده كانت
- يتبع ⬇️

الصدمة.....!
- ومن خلال المنتديات وتفاعلاتي اكتشفت انو ما عندي (تصلب لويحي)......!
لانو ما عندي ولا اي عرض من اعراض المرض دا ابداً ، وفي الوقت دا كان الألم بزيد على وبقيت امشي محنية الظهر وبعتمد على العكاز ومواصله في العلاج الطبيعي بشكل متقطع وانا ما عندي
- يتبع ⬇️

(لا التهاب في النخاع الشوكي - ولا لحمية في النخاع الشوكي - ولا تصلب لويحي)..!
-بس اتوجهت لي طبيب متخصص في (التصلب اللويحي) في بحري وقالي تتحملي 3 أو 4 سنين لمن يكتشفوا العلاج...!
- بس بعد مده جابو دكتور انتداب في مستشفى الشيخ متخصص في (التصلب اللويحي)
- يتبع ⬇️

ولمن وصلتا المستشفى كان لأو مره في حياتي ما اقدر امشي واقيف على رجولي واخوي جاب لي كرسي متحرك.
- الدكتور اكتشف انو ما عندي اي عرض من اعراض (التصلب اللويحي) وهي ضعف النظر، تشنجات واغماء متكرر، وقرر يحولني لي دكتور / الدرديري، وحكى ليهو اي شي الدكتور الدرديري شال ورقي
- يتبع ⬇️

واجتمع مع عدد من الأطباء والاستشاريين وبعد إطلاع كبير منهم اتوصلوا للتشخيص الرابع والجديد ( عيب خلقي في الشعيرات الدموية الدقيقة) والمفروض امشي مصر ثاني لانو في السودان مافي (قسطرة تشخيصية) ووجهني لي دكتور/ اشرف في القاهرة .
- اتواصلنا مع دكتور أشرف عبر الأيميل وحدننا
- يتبع ⬇️

كل شي، ومشيت مصر كل شي جاهز وثاني يوم طلعت النتيجه نظيفة!
- في مصر كنت نازله مع عمي وكان صور كل أوراقي وقدم لي في بروتوكول تبع الوزارة وانتظرنا البروتوكول 6 شهور في مصر ومنها اتوجهت على تركيا.
- طوالي نزلوني في قسم (التصلب اللويحي) وطبعاً عملت فحوصات وأشعة من جديد وكنت
- يتبع ⬇️

ماخدة كورتيزون قبل فترة قريبة، طلبوا مني ارجع واجي تاني بعد 3 شهور يكون الجسم إتخلص من اي اثار علاج، وفعلا رجعت السودان ورجعت تاني تركيا بعد 3 شهور وبديت من اول تاني فحوصات واشعة وكالعادة نورمال.
- بس الأتراك قالو يبحثوا في إتجاه ثاني وفعلاً بحثوا عن طريق العين والموية
- يتبع ⬇️

البيضاء، ولقوا جفاف ف العين فخطرت ليهم حاجات ومشوا عليها وفعلا عملنا فحص للانسجة ودي بياخدوا عينتها من الفم من الشفة ودي كانت عينة من الجلد نفسو يعني من الفم من جوة، وفعلا لقوا عندي جفاف فبحثوا واقترحوا انو عندي مرض مناعي اسمو ( متلازمة شوغرن) وقرروا لي أخذ العلاج
- يتبع ⬇️

بالكورتيزون بكمية كبيرة ومعاهو علاج طبيعي، المشكلة انو المرض دخلت على النت لقيتو مرض مناعي يأثر ع الاعصاب والعظام وبيعمل اثار على الاطراف وبياض وكل دا ما كان عندي.....!
-المهم الأتراك فكرتهم كانت انو دا أقرب مرض وفي فهمم أنو مرض جديد وغالباً كانو حيسموهو بي إسمي 😅
- يتبع ⬇️

(سناء ديزيز).
-وبدييت علاج طبيعي هناك لكن بصراحة كنت مرهقة من الكورتيزون لانو بجرعات كبيرة فالعلاج ما كان بيجيب نتيجة مرضية، خصوصاً بعد فترة من تقدم العلاج والكورتيزون بيخزن موية ف الجسم ويفتح اللون ويدور الوش، بعد شهو أخوي قلق شديد ولقى انو الموضوع طويل خاصة انو بقى
- يتبع ⬇️

لوني بمبي زي لون البيبي المولود يادوب ووشي مدوور وضخم وطبعا وزني زاد، ودي كلها سوائل الجسم من العلاج اتحبست، وكنت بعمل علاج طبيعي وبرضو ما كان في نتيجة غير الارهاق.
- طوالي هنا اخوي طلب منهم يقللوا الجرعة ويركزوا على المرض الجديد دا واللي اعراضو خليط
- يتبع ⬇️

( بين متلازمة شوغرن وبين التصلب اللويحي) لكن طبعا أتاكدوا تماما انو ما تصلب لويحي.
-رجعت السودان والحمد لله العلاج الطبيعي ما اتسهل لي في بلدنا دي، ونزلت مع ناس النيل للاعشاب وسبحان الله استمريت فترة معاهم بس برضو مافي نتيجة ابدا، ومن وقتها من شيخ لشيخ وبتاع وفي الآخر
- يتبع ⬇️

وقفت كل شي، وانا ما عارفه اصلاً عندي شنو.
* لاعندي (التهاب في النخاع الشوكي)
* ولا عندي (لحمية في النخاع الشوكي)
* ولا عندي ( تصلب لويحي)
* ولا عندي ( عيب خلقي وانسداد في الشعيرات الدمويه الدقيقه)
* ولا عندي (متلازمة شوغرن)
بس عندي الله ثم رحمتوا ودعواتكم لي 🤲🏼
- يتبع ⬇️

قصة أكثر إنسانة بطله عرفتها في حياتي وأفضل من يوفر العلاج في السودان والعاصمة المثلثة بي حب، وما عايزة غير دعواتنا.
✨لسه الأمل موجود يا غالية ربنا يرفع عنك وتقيفي من جديد وتمارس حياتك بي كل حب ❤️❤️❤️🌹
إنتهىٰ...
#اللهم_اشفِ_سناء
#اللهم_اشفِ_سناء
#اللهم_اشفِ_سناء

حساب الدكتورة الجميلة
@sonsoon33

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد