إحنا مش بنصلي عشان الدنيا تخضع تحت رجلنا، إحنا بنصلي عشان الصلاة فرض، عماد الدين، وأول ما يُسأل عنه يوم القيامة .
الخطاب، المنتشر يعني، بيقول إننا مجرد ما نصلي حالنا هيتصلح، بس الخطاب ده ناقصه عنصر مهم، هو اللي بيخليني أشوف كومنتات من نوعية "أنا بصلي ومع ذلك محصلش حاجة"
...

العنصر اللي ناقص، إن أكتر فترة غالبًا هيتم ابتلائك فيها، هي فترة قربك من ربنا، عشان يختبر صدق إيمانك، وعشان المتذبذب مجرد ما بتحصل حاجة، نفسه بتجزع.

الصبر هو أساس كل شيء، كل الآيات المذكورة عن الصبر، متبوعة بالفوز بالجنة أو الصلاح، وابحث في القرآن، هتعرف إن كل المؤمنين بيتعرضوا لابتلاءات كتير، يمكن على قدر إيمانهم.

عشان كدة، إحنا مش بنصلي عشان الدنيا تخضعلنا، إحنا بنصلي عشان نؤمن، عشان نرضى، نصبر، لإن ده كله جائزته الجنة.

"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَأْتِكُم مَّثَلُ الَّذِينَ خَلَوْا مِن قَبْلِكُم ۖ مَّسَّتْهُمُ الْبَأْسَاءُ وَالضَّرَّاءُ وَزُلْزِلُوا حَتَّىٰ يَقُولَ الرَّسُولُ وَالَّذِينَ آمَنُوا مَعَهُ مَتَىٰ نَصْرُ اللَّهِ ۗ أَلَا إِنَّ نَصْرَ اللَّهِ قَرِيبٌ"