في ناس عايشة ب مود حلو بسبب الأمل و ناس عايشة و مش عايشة بسبب أنهم فقدوا الأمل
و في الحالتين الأمل ده شئ تخيلي افتراضي لكنه بيصنع المعجزات لأنه بيحيي ناس و بيموت ناس رغم أن ظروفهم الواقعية المعيشية هي نفسها

الأمل فكرة مستمدة من الجانب الوجودي للنفس و ده الجانب البنااء اللي بيغير مسار الشعور لكل شئ و بيخليه إيجابي عذب مستساغ أيا كانت الظروف
ضياع الأمل مستمد من الجانب الآخر العدمي للنفس و ده الجانب اللي بيموت مراكز الإحساس النفسية و بيمرر طعم الحياة كلها حتي لو كانت كلها عسل

القوى الوجودية و العدمية للنفس ليها اسباب كتير زي مثلا المرض العضوي أو التقدم في العمر أو نقص في النواقل العصبية الكيميائية في الجسم أو تكرار الضغوط الخارجية على النفس إلى حد عدم التحمل أو تكرار الإخفاقات في الحياة و عدم تحقيق الذات .. الخ

علشان ندعم القوى الوجودية للنفس يبقى لازم ندعمها روحانيا و فيزيائيا يعني نطمن على كيمياء جسمنا و نسب الهرمونات و كفاءة وظيفتها الأول و بالتوازي نحاول نزود الأنشطة الترويحية للنفس حسب مزاج كل شخص و هواياته وطبعا كل ده في إطار من الاساسيات زي العبادة و الرياضة و النظافة و غيرها ..

الأهم بقي أن يكون في إرادة قوية لأنه لو مفيش يبقى الإنسان ده قرر يعذب نفسه بنفسه اللي باقي من حياته .. !