عارف إنت لما تفضل تسعى، بأي وسيلة وأي حيلة، عشان تفرح حد، بهدية، أو كلام، وتلاقي رد فعله في النهاية: "أه شكرًا" أو يقولك "أنا مش عايز الحاجة دي"
ولما حد يعاتبه، ويقوله إنت ليه كسرت بخاطره؟ فيرد يقول: "عشان ميتعلقش بيا" أو "عملت كدة عشان مبحبوش وأنا مبحبش أنافق حد".
..

شتان بين الحب والتقدير، في ناس فاكرة إن كل حاجة حب، أو فلوس، ميعرفوش إن أحيانًا الابتسامة أو رد الفعل اللي مليان فرح، ده تقدير كبير للي بذله الشخص عشان يسعدهم.

أنا مثلًا، عمري ما قدمت هدية، أو عملت خير، عشان مستني اللي قدامي يردهولي وياخدني بالأحضان ويقولي كلام كله مدح، أنا كوني بسعالك في حاجة تفرحني، ده مش معناه إني منتظر منك مقابل، غير إنك، عالأقل لحظتها، متكسرش بخاطري ومتصدينيش.

قولي أنا مبحبكش في وقت تاني، لكن متقولهاش في اللحظة دي بالذات، عشان فعليًا ممكن ردة فعلك السلبية تكرهني فيك، ومش لازم تفتكر إنك شريف لحظتها يعني وقيمك المثلى ناقحة عليك أوي لدرجة إنك هتطبقها على شخص غرضه الوحيد يسعدك.

وهو فعلًا جبر الخواطر على الله، والكلمة الزين تسد الدين، ومتنساش إن في فرق كبير بين الحب والتقدير.