رئيس تحرير The verge كتب مقالة رائعة عن استحواذ ايلون ماسك على تويتر، المقالة بعنوان "اهلا بك في الجحيم يا ايلون"! المقالة بتتكلم عن الصعوبات اللي حتواجه ايلون، و ان احلامه و وعوده ده كلها مش حتتحقق. المقالة في اللينك تحت، و انا حلخصها في الثريد ده 1-12
theverge.com
theverge.com
المقالة بتبدأ بان مشاكل تويتر مش مشاكل تقنية، و لكن مشاكل سياسية! ده لأن قيمة تويتر مش في الجزء التقني، و لكن في ان عليه سياسيين، صحفيين، مشاهير، و ناس تانية كتير. قيمة تويتر في ان ايلون ماسك شخصيا مدمن تويتر، فالمقالة بتقول لماسك: انت اشتريت نفسك ب 44 بليون دولار! 😁 2-12
علشان ايلون يعرف يكسب فلوس من تويتر، محتاج يشد اعلانات اكتر. فحيحتاج يوعد الشركات المعلنة بان العلامة التجارية بتاعتهم حتفضل في امان! ده معناه انه يمنع العنصرية، التقليل من الستات، الترانسفوبيا، وغيرها. مع ان نوعية الكلام ده قانونية في امريكا، لكن حيحتاج يمنعه علشان الشركات! 3-12
المقالة بتقول ان لما ماسك يضطر يمنع بعض الكلام السيء من تويتر، الfanboys اليمينيين بتوعه حيقلبوا عليه و يهاجموه بشدة! و ده حصل قبل كده مع منصات سوشيال ميديا عملوها اليمين، زي Truth Social بتاعت ترامب. 4-12
بس قبل ما يجيب اعلانات، في خطوة اهم: الناس مش عايزين يبقوا على منصة ما عليهاش رقابة و مليانة عنصرية! الناس عايزة من السوشيال ميديا تجربة لطيفة، و عايزين الناس تطبلهم على كلامهم. الناس عايزة تعيش ف ديزني لاند! 😅 و ده سبب ان تويتر فيه مستخدمين اقل كتير من باقي منصات السوشيال. 5-12
علشان ايلون يجيب اعلانات اكتر، محتاج رقابة اكتر، مش اقل! الاعلانات بتيجي من وجود مستخدمين اكتر، وعلشان ده يحصل، لازم تويتر يبقى افضل من دلوقتي، مش اسوأ. اكتر من سوشيال ميديا جديدة اتعلمت ده بالطريقة الصعبة، و المقالة جابت امثلة زي Gettr، Parler، و Truth Social بتاعة ترامب. 6-12
المقالة بتقول ان مشكلة ماسك الحقيقية حبتدأ لما يصطدم بقوانين الحكومات حطتها للتحكم في السوشيال ميديا! بداية من ولاية تكساس اللي بيحبها ايلون ماسك، هل ايلون حيدخل خناقة مع تكساس علشان حرية التعبير؟ هل حيستحمل ساعات طويلة "مملة" من النقاشات السياسية مع الولايات عن القوانين ده؟ 7-12
المقالة بتقول ان مشكلة ايلون ماسك حتكبر لما يبص بره امريكا. المانيا واحدة من الاسواق الضخمة لعربيات تيسلا، هل ايلون مستعد يرفض قوانين المانيا اللي بتمنع التجاوزات و يتخانق معاها على حرية التعبير؟ المقالة بتراهن ان ده مش حيحصل. و الوضع اصعب في الهند و الشرق الاوسط طبعا. 8-12
المقالة بتتكلم عن ان الصين طبعا مشكلة تانية، و بتسأل ايلون اذا كان "متحمس" و مستعد لان الصين حتهدد بيزنس عربيات تيسلا الضخم هناك لو ما شالش حاجات مش عجباهم على تويتر، و ده بدون شك حيحصل! 😔 9-12
المقالة بتقول ان الحقيقة الاساسية في كل منصات السوشيال ميديا هي ان السلعة هي الرقابة عالمحتوى! و الناس كلها بتكره الناس اللي بيقرروا الرقابة ده حتمشي ازاي. الرقابة ده هي سلعة تويتر، و هي اللي بتحدد تجربة المستخدمين. و كل المنصات بتشجع الحاجات "الكويسة" و بتقلل "الوحش". 10-12
المقالة بتعرض نقطة ظريفة، ان فيديوهات يوتيوب غالبا بتبقى ما بين 8 و 10 دقايق، عارفين ليه؟ علشان لو الفيديو اطول من 8 دقايق حيبقى فيه اعلانين مش اعلان واحد، يعني فلوس اكتر😅 يوتيوب عايز نوع معين من الفيديوهات، و بيشجع لده بقواعد الاعلانات. هو ده البيزنس، وهي ده الاختيارات! 11-12
المقالة بتختم بان ده البيزنس، وكل ما ايلون يأخد وقت علشان يحاول يقاومه، تويتر حيشده لتحت اكتر وحيحتاج يدافع عن خرا ما ينفعش الدفاع عنه! واول ما يتقبل ان التوسع بييجي من المراجعة عالمحتوي ومحاربة قواعد الحكومات، ساعتها حيشوف رد فعل محبيه! في جميع الاحوال، اهلا بك في الجحيم! 12-12
لو عجبتكم المقالة، ممكن تابعوا الكاتب بتاعها @reckless، رئيس تحرير The Verge.
جاري تحميل الاقتراحات...