على هامش الحياة في اوروبا تعيش جماعة يزيد عددهم عن ١٢ مليون شخص ذاقوا ويلات النازيه و لا بواكي لهم ، و مازالوا يعانون من النبذ والتحقير فلا يوزوجون ولا يتزوج منهم احد و لا يُقبل بجيرتهم او حتى العمل معهم ! قصة اليوم عن ضحايا هتلر المنسيين الجيبسيز .
بداية معرفتي بهالجماعة لما حصلت برنامج واقع مخصص بس لزواجاتهم و منه شفت كثير من عاداتهم الغريبة مابين الزواج بمجرد بلوغ عمر الـ 16 إلى الزام العروسة بالانقطاع عن أهلها و صديقاتها بمجرد زواجها و يعيشون بكرفانات يتنقلون فيها كل الوقت ما فيه استقرار بمكان ابدا
لكن اللي أثار فضولي من ناحيتهم هو تعامل باقي المجتمع معهم فالبرنامج يصور معناتهم على ما يوافقون أصحاب القاعات يأجرون لهم و العرسان شارطين على البرنامج إن وجيههم ما تطلع لإن لو أحد عرف إنهم جيبسيز راح ينفصلون من شغلهم !
هذي احد العرايس اللي مضطره تترك وظيفتها و كانت حريصة طوال فترة عملها ما تبلغهم انها من الجيبسيز و ما علمتهم الا يوم جت تترك
طيب مين هذولا الجيبسيز و وش سالفتهم و ليه على مدى التاريخ كل ما راحوا مكان استقعدوا لهم الناس!
بدايتهم و أصولهم غير معروفة لأنهم متحفظين مره على أسراراهم و هالشي عطاهم سمعة بأنهم كذابين و غير جديرين بالثقة ! فوين ما راحو كانو منعزلين عن اهل البلد و عايشين بطريقتهم الخاصة
لكن الناس ذبحهم الفضول و يقلبون هالجيبسيز يمين يسار يبونهم يعلمونهم من وين جو لكن رافضين ! جو علماء اللغة و قالو مالنا إلا نتتبع لغتهم و منها بنعرف اصلهم لقوا أن الجيبسيز جايين من الهند بس لهجتهم غريبة و فيها تجتمع أكثر من لهجة هندية بمعنى إنهم جايين من فئات مختلفة !
عاد العلماء قعدوا يتطرون و قالو شكلهم الجماعة اللي عُينت لمحاربة المسلمين عشان ما يدخلون الهند لكن الواضح إنهم ضاعوا أو شي و ماعاد قدروا يرجعون لديرتهم!وفيه فرضية ثانية تقول إن هذولا جماعة من 10 آلاف إلى خمس طعش ألف شخص كانو مغنين و رقاصين تم إهدائهم لشاه فارس عشان يرفه عن نفسه!
و الفرضية هذي ما جت من فراغ بل مستنده على قصيدة فارسية قديمة توصف هالحدث و الأكيد إن بعد خروجهم من الهند المحطة الثانية لهم كانت بلاد فارس. الجيبسيز وهم ببلاد فارس تعلموا منهم الشغل على المعادن و لقطوا كم مهارة حلوة و توادعوا منهم و مشوا على الامبراطورية البيزنطية
و قعدوا عند البيزنطيين حول المية سنة بعدها شبت حروب عند البيزنطيين و قالو الجسيبز تمسون على خير والله قعدتكم ماتنمل و المية سنة اللي راحت كانت مره حلوة لكن مضطرين نمشي الآن
للآسف هذا كان آخر خبرهم بالعافية يوم هجوا راحو لاوروبا و بعضهم أستقروا بأوروبا الشرقية و بعضهم بالغربية و كل جماعة عانت لكن اللي أستقروا بأوروبا الشرقية بدت معناتهم على طول الأوربيين ذاك الوقت ياكلون الرقع ما يعرفون من الدنيا
و جو هالجيبسيز وصاروا هوله بشغلهم على المعادن و رقصهم وغناويهم و قراءة الطالع كانو يطلعون من الأوروبيين فلوووووس على هالخدمات
مهارة الجيبسيز بقراءة الطالع نقدر نفسرها بهالبيتين :
ينبيك عن دنياك ماضي تجاربك
وعـزي لحالك كـان عـرفـك قليلي
ينبيك عن دنياك ماضي تجاربك
وعـزي لحالك كـان عـرفـك قليلي
الأوربيين انتبهوا إن هالناس ذي من وراها فايده قالو قاعدين على اراضينا و ياخذون فلوسنا خل نستعبدهم بس وعلى فداحة هالفعل لكنه يعتبر أهون شي صارلهم بأوروبا من ذاك الوقت إلى يومنا هذا !
أماالجزء منهم اللي كملوا وراحو لغرب اوروبا يوم أقبلوا على هالبيض أنهبلوا مين ذولا وليش لونهم كذا و ليش لغتهم غريبة!جت الكنسية و قالت أبد علمهم عندي هذولا يا مصريين يا ناس من الشرق الأوسط وهاجين و جايينا لانهم مسيحيين و الجيبسيز قالو اللي تشوفنه،و من هنا جاء لقب الجيبسيز من ايجيبت
وإلا هم بالأساس يقالهم روم وهم يفضلون هالتسمية على الجبسيز بس ماودي إنكم تعتقدون إنهم من دولة الروم أو شي فخلونا على جيبسيز , المهم الجيبسيز شافو أن موضوع المسيحية جاء لصالحهم و للأمانه تراهم أخذوا الوضع سمردحه شوي
فبدوا يكونون جماعات منظمة ويطلقون على القائد أسم الأمير و كانو يتمشون كل شوي بدولة مره ألمانيا مره فرنسا شوي طالعين على سويسرا ومعهم رسايل من الأمير حقهم يقول فيها حنا مسيحيين مهاجرين خلونا نمر و لا أحد يتعرضنا
الجيبسيز بحالة ترحال دايم و كانهم يبحثون عن شيء ما يدرون وشو و هالشي تجسده اغانيهم اللي مليانه حنين و شوق لاماكن و اشخاص تركوهم بالماضي
حتى قواعد عيشهم تدل انهم لازم ما يستقرون بمكان
الأوربيين طبعاً كانو مستشكين فيهم بس بالعينها وساكتين على اساس انهم مسيحيين وهاجيين بديانتهم الشكوى لله ، لكن اللي مايدرون عنه الجيبسيز إن الألمان بيفطنون لهم و بيستقعدون لهم إستقعاد أكثر من أستقعاد جاركم على وين توقفون سياراتكم
البداية عام 1416م قالو تراهم جواسيس وهم اللي جابولنا الطاعون لكن ما سوا شي هالاتهام و بتلوا مناشبين هم و يحاولون يطردونهم من المانيا لكن ما قوى موقفهم الا يوم جاء مؤرخ ألماني عام 1522 و كشف أصول الجبسيز و أنهم لا هم مسيحيين ولا مصريين مجرد جماعة ضايعة بالأرض !
بعد كذا بدأت المضايقات للجيبسيز و المتاجر صارت ترفض تبيع لهم و اهل الديرة يرفضون يخلونهم يشربون ماء فالمدافعون عن الجيبسيز يقولون لهالسبب الجيبسيز بدأوا يسرقون لان خيارهم الثاني هو الموت ! و بدأت تطلع على الجيبسيز شائعات أقل ما يقال إنها خيالية و كأنهم كائنات اسطورية مب بشر
و أحد هالشائعات إن الجيبسيز يخطفون الأطفال و يا كلونهم و بسبب هالاشاعة صار ممنوع أنهم يطبخون داخل بيوتهم !
نرجع شوي نشوف وش صار على اللي قعدوا بالشرق ، جاء عام 1760 و بدت تظهر ملامح الثورة الصناعية اللي معها راح تتغير كثير من العادات الاجتماعية و الثقافية بأوروبا ، حاليا صارلهم 500 سنة مستعبدين للكنيسة و للملوك لكن عام 1864 أمير رومانيا أعطى 600 ألف جيبسي حريتها
و أول ما أخذوا حريتهم جزء منهم أنحاشوا من أوروبا و راحوا لامريكا .
لكن اللي بغرب اوروبا ما تغير حالهم بل ساء ! و جاء تشارلز داروين حق نظرية التطور و زاد النار حطب
وعلى أثر كلام داروين صدر كتاب اسمه " criminal man " وفيه فصل كامل عن الصفات الجينية الإجرامية اللي يحملها الجيبسيز !وكان يقول إنهم المثال الحي لعرق مجرم بالكامل ! هذا الكتاب تُرجم للألمانية اللي أساسا يبون الزلة و زاد شرهم عقبه
ثم صدر كتاب باسم " ارواح لا تستحق الحياة " للطبيب النفسي كارل بيندينق و القاضي الفريد هوكير يتكلمون عن القتل لرحيم لبعض الفئات اللي اعتبروها " deadweight " على البشر و كانو عبارة عن ثلاث فئات :
الناس اللي يعانون من تشوهات خُلقية
واللي يحملون امراض وراثية
الناس اللي يعانون من تشوهات خُلقية
واللي يحملون امراض وراثية
والفئة الاخيرة هم اللي بغيبوبه و لا يرجى برأهم وحطوا الجيبسيز مع الفئة الثانية و قالو ان المرض اللي ينقلونه هو الاجرام !
بعد الحرب العالمية الأولى ألمانيا واجهت أشد العقوبات و شعبها دجوا و حالتهم لله هالشي كان تربة خصبة لصعود الحزب النازي اللي كان يشتغل على مخاوف الطبقة المتوسطة من الجوع و البطالة هم بالأساس كانت عندهم قابلية للعنصرية لكن مع الحزب النازي صار الوضع يا حنا يا هم
بـ 1933 هتلر مسك السلطة و قدم اعتراض على انتشار مصطلح " ارواح لا تستحق العيش " تغيرت نظرتي له والله تغيرت تغيرت و قلت لعله بالبداية كانت نيته زينه بس تالي خرب ، لكن لما عرفت هو وش يبي دريت اني لو اني عنده ابادني مع اللي فيهم امراض وراثية المرض حسن الظن
كان يبي يغيره لـ " الوقاية من النسل المصاب بالامراض الوراثية بالتطهير العرقي " :) !! هتلر اول من تسلط عليه الجيبسيز و اليهود اللي معاهم فلوس و عندهم ممتلكات و اسقط عنهم كل حقوق المواطنين و اعطى ممتلكاتهم للالمان
عام ١٩٣٩ هتلر امر بترحيل اليهود و الجيبسيز لمخيمات ببولاندا حتى يوم راحوا من عنده ما كفاهم شره و ارسل رسايل يقول الجيبسيز لا يطلعون من المخيمات اببببد ، و احد دكاترته اللي يشتغل بمركز " النظافة العرقية " قال ترا لازم تتعاملون معهم على انهم مرضى و الحل الوحيد معهم هو الابادة
اول مجزرة جامعية للهولكوست صارت عام ١٩٤٠ و استمر حتى عام ١٩٤٥ و يعتقد ان بهالفترة تم التخلص من٧٠٪ من الجبسيز ، لكن للاسف ما فيه اعتراف فيهم مثل اليهود و الالمان يقولون لا حشى ما صفينهم تصفية عرقية حنا كنا نحاكم المجرمين منهم بس!
بعام ١٩٦٠ بدات المانيا ادفع تعويضات لليهود و اول فاتورة دفعتها كانت بقيمة ١٠٠ مليون دولار ! الجيبسيز قعدوا يلاحقون السلطة الالمانية سنين عشان تعوضهم لين رضخوا عام ٢٠٠٦ ودفعوا لحيبسيز ٣٤ مليون دولار بس ! يعني نقطة ببحر اللي اندفع لليهود لو اخذنا بالاعتبار اختلاف سعر العملة
الجيبسيز باوروبا ما زالوا تحت خط الفقر بنسبة بطالة تصل الى ٨٠٪ و العنصرية تجاههم تخلي من الصعب عليهم تغيير اوضاعهم
و بعض الدول ما زالت تشوف ان المشكلة بنمط حياة الجيبسيز ماهي بتشريعاتهم !
و بس خلصت قصة اليوم تقدرون تتطلعون على القصص السابقة بالحساب وهذي احدها
جاري تحميل الاقتراحات...