قبل كم سنة كنت في مناسبة زواج صاحبنا ودعوتو غداء ومعاي شباب كمية معظمهم بعرفهم وفي زي إتنين تلاتة كدا أول مرة ألاقيهم فبقينا ندردش ونتونس ونضحك وحقيقة الونسة كانت شيِّقة يعني، صاحبنا العريس كان قاعد في كرسي جنبي جوهو ضيوف عايزين يباركوا ليهو فقام من كرسيهو وقعد جنبي شاب أنيق كدا
ووسيم وكان من ضمن الشباب القاعدين وبقينا نتجاذب أطراف الحديث بعد تعارف وونسة وضحك فجأة وبلامقدمات قام سألني قال لي ياخ عايز أسألك بتعرف فلانة؟؟بصراحة إندهشت لأنو السؤال كان مباغت دا غير إني طولت منها جداً وسنين طوال ماعارف عنها شي فقلت ليهو أيوة بالحيل بعرفها قال لي طيب رأيك فيها
شنو ؟؟ قلت ليهو من ياتو ناحية يعني؟؟ قال لي عادي يعني كشخصية مثلاً يعني رأيك فيها شنو؟؟ قلت ليهو أنا بصراحة إنقطعت منها لي سنين ماعارف عنها شي لكن هي بت كويسة وعلى قدر من التهذيب وبصراحة أكتر كان المفروض أخطبها ولأنو مافي نصيب فالموضوع ماتم وطالما أنا فكرت أخطبها فالطبيعي إنها بت
ناس ومافيها كلمة حسب ونسب ومال وجمال ولاحظت ليهو مركِّز زي البسترق النظر وبراقب في تعابير وشي قلت ليهو بي ضحكة كدا إنت تعال هنا إتعرفت علي قبل لحظات وبتسألني عن تفاصيل زي دي ليه ؟؟ فقمت قلت بيني وبين نفسي إحتمال عايز يتزوجها وإستحضرت طوالي مقولة للإمام علي كرم الله وجهه بتقول:
(لايكن أفضل ما نلت من دنياك فى نفسك بلوغ لذة أو شفاءُ غيظ ولكن إِحياء حق أوإطفاء باطل) طوالي باغتو وقلت ليهو شوف لو عايز تخطبها البت دي جنة وتتخت في الجرح يبرأ قال لي أنا زوجها قلت ليهو طيب إنت إتزوجتها وإنتهيت بتسأل عنها ليه؟؟ قال لي لأنها حكت لي كل تجاربها السابقة وقالت عنك إنت
تحديداً إنك شخص خلوق وحبيت أتأكد وأتأكدت ومن ونستنا هسي مع بعض شعرت بيك ودناس عشان كدا إتشجعت وسألتك، قلت ليهو حقيقة أنا سعيد إنو دا إنطباعكم عني إنتوا الإتنين وسعيد أكتر إنو ربنا أداها راجل قادر يحتويها كصديق أكتر من تعاملو معاها كزوج مع إنو تفكيري مختلف عنك في النقطة دي تحديداً
لأني بعتبر إنو ماضيها كشريكة لي حياتي دي حاجة بتخصها حكتها براها من باب الفضفضة أهلاً وسهلاً ماحكتها مابسألها عنها لو جابوها في أخبار الجزيرة والأكيد برضو ياصديقي إنو ربنا كان شايل ليها الأحسن مني اللي هو إنت، قلت ليهو ياخي بس أنا عاتب عليك في حاجة فكرة إنك تخت زوجتك في محل تقييم
وتخلي شخص تاني يقيمها ليك دي مالطيفة لأنو ماكل الناس ممكن تقول عنها كلام كويس، لو كنت قلت ليك كلام سئ كنت حاتتألم مهما كان مقدار ثقتك فيها فقال لي أنا ماشفتك قبل كدا لكن لما سمعت الإسم طوالي إتذكرتك وماكنت ناوي أسألك عنها لكن لما إتونسنا وإندحنا في الونسة إتشجعت والحمدلله إحساسي
ماخاب، على المستوى الشخصي لي كأحمد مكي الشي الطبيعي إني أستاء مثلاً لكن صدقوني فرحت عشانها وإني فعلاً ماكنت سبب في تحطيمها بعد إتفارقنا، وهي دعوة للجمال والتقبل والرضا وتطويع النفس لتمني الخير للغير حتى لوكانوا سبب في وجعك قبل كدا، عموماً نحنا محتاجين بالجد نعضد ثقافة إنهاء
العلاقات بالحسنى والإحترام والذكرى الطيبة ونفهم كويس إنو النصيب مابي يدنا، لكن بي يدنا نخلي ذكرى حسنة وصدى جميل وأثر طيب الحاجة دي صعبة شديد وماكل شخص عندو القدرة يتجاوزها إلا من رحم ربي فالبساعدك تعملها هو اليقين، اليقين إنك متأكد إنو فوق في رب إسمو الكريم شايفك وخابزك وعاجنك
وحاسي بي كل تفصيلة في حياتك أتظنه ينساك ؟؟ ربنا يسعدهم ويهنيهم ويديهم لامن يرضيهم وأنا كمان ربنا يرزقني بالأفضل والأبرك وكل من قال آمين😘💜 #كسرة زوجتي المستقبلية الزول البحنِّك فيك هسي بالليل دا ماسك بيك زمن ساي وأنا الحاأنجز في النهاية فأخنقي الصبر قربنا نتلاقى😁
جاري تحميل الاقتراحات...