سنة أولى ماستر ! تعالوا أبيكم بكلمة راس .. خلونا بس نخلي أحكامنا ومخاوفنا على جنب قبل أصحبكم معاي بهالتجربة الشخصية ! أحدثكم من مكتبة ربيكا كراون التاريخ ١٦ اكتوبر ٢٠٢٢ على نفس هذا الكرسي والطاولة بالضبط ! اختكم بالله انهارت صياح في ٣٠ اوغست ٢٠١٨ ! نهاية اول اسبوع لها في الماستر
بدأت القصة بدخولي دوامة أول اسبوع ماجستير! الطالب الدولي الوحيد في برنامج الماجستير ! كنت ادخل الكلاس واطلع ما افهم الا ٥٠٪ ! مش لصعوبة اللغة الأكاديمية فقط؟ بس لأن محد كان يشرح ! كانوا يسولفون عن شيء ما اعرفه! ويتناقشون ويختلفون ويتفقون وأنا ما عندي صوت ! كأن صوتي انسحب !!
ويوم عن يوم صوتي ينسحب تحت تحت وانا انسحب معاه .. صرت احس اني تحت ! والمكان مظلم وأنا خايفة ! خايفة من هالضياع اللي اختبره لأول مره ! كشخص الاول على دفعته ومرشح اول بوظيفتين حكومتين وثلاث بأقوى القطاعات في الشرقية ! فجأة يحس انه ضئيل مره وغير مرئي وغبي! حسيت إني غبيه وقبيحة وأقل
أقل من أي أحد موجود بالكلاس معاي ! ماعندي شيء اقوله ! ما افهم ايش يعني كرتيك ؟ شنو يعني اكتب نقد ؟ كيف اتجرأ ؟ كيف اربط مقالات كل هالمؤلفين وابني نظرتي؟ نظرتي أنا ؟ مين أنا اساسا ؟ هل أنا كفوء ؟ هل اللي بقوله اساسا مهم ! وكل هالتسؤلات تزيد مع كل نقد يوصلني على اللي اسلمه !
ياربي أنا اجلس ٦ ساعات بس اقرأ واترجم ! مستحيل بنجح وبعدي السمستر بهالاداء؟ المقالة اللي ياخذون فيه الزملاء ١٠ دقائق أنا اخذ فيه على الاقل ساعه ساعه ونص عشان افهم شيبي يوصله الكاتب ؟ وقتها فكرت انسحب ! لان شدعوة بنجح ! خصوصا مع الكم الهائل من المشاريع الدراسية الاسبوعية والاساسية
ودرجاتي كانت متوسطة ! لين باقي على الفاينل شهر وقررت وقتها اطنش وابدأ اخطط للعودة واجمع اوراقي واجحز تذكرتي وانا ساكته وما قلت لاحد خطتي وعشان تمشي الخطة .. (سجلت للفصل الثاني ثلاث من اصعب المواد) لأني كذا وكذا راجعة اساسا وبايعه القضية ! بالفاينل قررت اسوي احسن ما عندي
نفسيتي بالحضيض .. خسرت ٦ كيلو ! اللي يشوفوني ما يعرفني .. ومع ذلك قلت دامها اخر شيء على الاقل (سويت اللي علي) كان عندي ورقة بحثية + اختبار نهائي في MARC 21 + ودرس لازم اقدمه + بوستر بحثي .. اذكر الشهر هذاك ما شفت فيه احد ! حبست نفسي على هذا المكتب اللي حطيته لكم والنتيجة ؟
جبت الدرجة النهائية فيهم كلهم مانقصت ولا درجة ولا درجة ! والبوستر البحثي حقي كان مختلف وكريتيف لأني سويته كمجسم وهالمجسم مرفق فيه اضاءة تشرح فكرتي.. ما استخدمت فيه التقنية اطلاقا ورغم اني توقعت اني بخسر الدرجة لأن شفيك مقدمه شيء فني مضيعة الاخت ؟ .. فاز بأفضل بوستر تم تقديمه !!!
ومع كل هذا ! قلت مستحيل اطلاقا اعدي حتى لو عديت الفاينل ورتبت شنطتي ! ومن الزهد رجعت بكري اون فقط ! لأن ما ابي اشي يذكرني بهالمكان ! رديت السعودية ونمت يومين ما سولفت مع احد .. وماطلعت من البيت .. ومش عارفه كيف افاتح طويل العمر اني بترك المجال الاكاديمي واللي فيها فيها ..
صحيت واذكر الوقت بالضبط ؟ الاثنين .. ١٧ ديسمبر ٢٠١٨ .. ارسلوا لنا ان القريدات نزلت ! وكنت على سريري افكر بإني اخيرا بيكون عندي دليل اني مش كفاءة واني بالمكان الغلط واني ما استحقه ولا عمري بكون الرايت فيت له .. ويوم فتحت الويب سايت !! انصدمت كلهم A !!!!!!! شفيهم ذول ؟ صاحين ؟
هنا ! خذيت احلا كف بحياتي ! كف من روضه الصغيرة لروضه الماجستير.. ! اول شيء سويته اني شطبت - الغاء تذكرة العودة .. 😂.. واستوعبت اني لي فرصة ! وإن هذه الحياة كلها عبارة عن تجربة ! تجربة استحقها بشينها وبزينها ومن كل هذا وصلت للدروس اللي بشارككم اياها بحب ومن القلب للقلب :
١- الضياع جزء من الرحلة ! جزء مهم ومن خلاله راح تكتشف طريق يخصك ! ما يشبه مسارات غيرك وهذا يقودنا لنقطة ٢
٢- لا تقارن سرعتك بسرعة غيرك ! لا تشوف طريقته وتعتقد انها طريقتك ! كلنا عندنا اساليب دراسية مختلفة وسرعتنا مختلفة ! محد صح ! محد خطأ.. ركز على طريقتك حسنها وعدل عليها دايم
٢- لا تقارن سرعتك بسرعة غيرك ! لا تشوف طريقته وتعتقد انها طريقتك ! كلنا عندنا اساليب دراسية مختلفة وسرعتنا مختلفة ! محد صح ! محد خطأ.. ركز على طريقتك حسنها وعدل عليها دايم
٣- بيقولون لكم السر تنظيم الوقت (صحيح)! بس تراه كلام مرهق اذا انت تاخذ وقت طويل على اسايمنت واحد ولا مقاله واحد .. بتحس انك غير منتج ودايم مقصر ! عن تجربة (ركز على تعلّم المهارة) تاخذ ست ساعات اليوم لما تركز على هالمهاره بكرا تاخذ فيها ساعتين وتضرب عصفورين بحجر المهارة والوقت😉
٤- حط هايلايت لليوم (ويكون يخص الدراسة)! لا تنام الا مسويه ! هذا يكسبك شعور بالرضا عن نفسك ويبني ثقتك شوي شوي ! مثلا اليوم بقرأ شيء.. بكتب .. برسم مخطط .. حطه والزم نفسك فيه ! لا تنام الا وانت شاطب عليه شوي شوي بتحس انك جالس تنجز وبدون ضغط.
٥- لما تخطط ليومك حط اهداف واقعية !
٥- لما تخطط ليومك حط اهداف واقعية !
في التخطيط الواقعية تخدمك نفسيا كثير! لا تقول اليوم بسوي المشروع كله! وانت تعرف داخليا مقدرتك او انشغالك او اي ظرف خارجي ممكن يمنعك منه! راع نفسيتك وانت تخطط ليومك.. اذا مزاجك اليوم سيء ! حط مهام سهله حتى لو كثير! واذا مزاجك مره ممتاز .. خطط لابتلاع الفيل (الجزء الاكبر والاصعب)😉
٦- لا تسمع للمحبطين! ولا للمتحذلقين اللي يقولون لك شدعوة سهله ! خذيتها بسنتين خذيتها بسنه خذيتها بشهرين ! محد يقدر يحدد سنواتك ! شدعوة هم كاتبين أنظمة الجامعة؟ الجامعة وهي الجامعة تعطيك مدى مدروس من السنوات عشان تخلص البرنامج! هالنوعية لا تعطونهم لا إذنكم ولا طاقتكم لأنهم مهلكين
٧- حرر ارتباطاتك العاطفية بالدرجة العلمية ! الدرجة العلمية مش قيمتك هي ورقة ! هي طموحاتك بس مش أنت بالاخير ؟ هي اثبات يوثق انك حصلت المعرفة المطلوبة لنيل درجة بس مش قدرتك الحقيقية ! ثقتك تنبع من معرفتك بنفسك .. احرص تعرف نفسك بعيدا عن قاعات الدراسة والمشاريع مين أنت كانسان ؟
٨- الناس ماعندها سيف على ارقابكم ! مستواكم الدراسي تقدمكم وتحصيلكم ومشاعركم حقكم الخاص وتجربتكم الشخصية لا تخافون من أحكامهم ولا كلامهم ! لأن الناس بتتكلم بتتكلم ..
٩- مشرفك الدراسي صديقك في البرنامج مش أبوك مش أمك استشيره دايم واذا شفته ظالم ! اطلب تغيره (حقك) .. منت ملزوم فيه
٩- مشرفك الدراسي صديقك في البرنامج مش أبوك مش أمك استشيره دايم واذا شفته ظالم ! اطلب تغيره (حقك) .. منت ملزوم فيه
١٠- تمرن ! اهتم بنفسك وبتغذيتك ومظهرك الخارجي .. لا تهمل نفسك عشان دراستك لأن انعكاس هالامور على تجربتك الدراسية مباشر
١١- تواصل مع الناس ! مع أهلك وربعك وخل عندك سبورت سيستم (نظام اجتماعي داعم) تلجأ لهم وتتكلم وتستمتع بوقتك معاهم .. حتى ولو اونلاين !
١١- تواصل مع الناس ! مع أهلك وربعك وخل عندك سبورت سيستم (نظام اجتماعي داعم) تلجأ لهم وتتكلم وتستمتع بوقتك معاهم .. حتى ولو اونلاين !
١٢ - روحانيتك وصلتك برب العباد ركن اساسي من يومك .. استعن بالله ولا تعجز .. ادع وتأمل وصل واسأل الله الرشاد
اخيرا تكلم وعبر عن ما تمر فيه وتشعر به وتختبره ! فيه حولك ناس تخاف تتكلم ! يمكن تكون أنت جانبها الآمن بالتجربة لا تحرم نفسك هالشيء .. مد يدك وساعد غيرك .. موفقين يا رب 🌿
اخيرا تكلم وعبر عن ما تمر فيه وتشعر به وتختبره ! فيه حولك ناس تخاف تتكلم ! يمكن تكون أنت جانبها الآمن بالتجربة لا تحرم نفسك هالشيء .. مد يدك وساعد غيرك .. موفقين يا رب 🌿
جاري تحميل الاقتراحات...