ان تولد لحياة فيها تكون طفلاً لكن بمسؤوليات قد لا يتحملها البالغين فيها كل يوم لك صراع متجدد للنجاة ، ماهي احتمالات تغير حياتك رغم انها على حافة الانهيار ؟ قصة اليوم عن " لي اون هي " الطفلة التي ذابت قلوب الكوريين لها .
انولدت "لي أون هي "عام 1991 لأم و أب من ذوي الإحتياجات الخاصة ويعيشون على المعونات الحكومية اللي كانت بحدود 1500 ريال شهريا فقط ! وصل خبر هالأسرة لأحد القنوات اللي كان عندهم برنامج لتجديد بيوت المحتاجين لما أذيعت الحلقة الكل وقع بغرام "لي"
على الرغم من صغر سنها كانت ناضجة مقارنة باللي بعمرها و متحملة مسؤولية والديها المحتاجين بكل صدر رحب و اللي سلمها فعلا مفاتيح قلوب الناس الشي اللي قالته وهي بعز فرحتها بالتجديدات
" لي " كانت محبوبة من قبل كل من يمر بطريقها حتى أصحاب المحلات و الصيدليات يذكرون بأنها طفلة مؤدبة ودايما تظهر الألتزام بالأداب والعادات الكورية من طريقة سلامها إلى كلامها و حتى مشيتها كانت المعنى الحرفي لتربية شيبان
لكن مثلكم خابرين الطيبين مالهم نصيب بهالدنيا ، البنية صارت أم عزباء وهي بعمر الـ 20 سنة بعد ما توفى أبو بنتها بحادث سير و بعدها بفترة خسرت خطيبها بحادثة غرق بتايلاند
مرت السنين و وفقها الله بوظيفة بسيطة بأحد أكبر الشركات الكورية هنا تعرفت على "يون" اللي يكبرها بـ 11 سنة وكان من الموظفين الكبار بالشركة الرجال من شافها داخ عليها و لا أخذوا وقت و تزوجوا بعد الزواج تبنى بنتها و صار هو الأب رسميا
"لي " أنتقلت للعيش بأحد أفضل أحياء سيول و بأفضل مبانيها صح ودك تنتهي القصة هنا ؟ حتى انا ودي والله لكن للآسف لا 💔 ، جاء هكاليوم و قرروا الزوجين يطلعون للبحر مع ربعهم لكن يوم جاء الليل قرر "يون" أنه يطب بالبحر و للأسف مع الظلام ما أحد قدر يوصله و مات !
و قتها قالت لي قصيدتها الشهيرة :
يا ربي ما أدري وش أسوي بهالحظ
من وين ما صديت حظي متردي
كل ما وصلت الشمس تجذبني الأرض
وكل ما بنيت أحلام حظي يهدي
يا ربي ما أدري وش أسوي بهالحظ
من وين ما صديت حظي متردي
كل ما وصلت الشمس تجذبني الأرض
وكل ما بنيت أحلام حظي يهدي
"لي " قالت يالله إن الشكوى لك شلون بعيش الحين لكن ماتدري إن طير شلوى"يون" حاسب حساب هاليوم و مطلع بوليصيات تأمين على حياته مجموعهم يعادل قرابة الثلاثه مليون ريال يوم راحت لشركات التأمين قالو أقضبي الباب قالت هذا حقي قالو كان غيرك أشطر و ترانا دقينا على الشرطة تحقق بوفاة زوجك !
"لي"ضاقت فيها الأرض و بهاللحظة تذكرت الشي اللي ساعدها وهي صغيرة التلفزيون ! أتصلت على أحد المحطات و قالت لهم سالفتها اللي قلتها لك تو تبيهم يتكلون ويضغطون على هالشركات ,المحطة قالو أبشري مشكلتك عندنا لا تشيلين هم
سكرت "لي " من هنا و المحطة سوو عليها فلم وثائقي من هنا و على أثره هجت " لي " و كأن الأرض أنشقت و بلعتها ما أحد عارف لها طريق !
القصة اللي ما قالتها "لي" تبدأ من هروبها من بيتهم بسن الـ ١٥ سنةو للأن سمعة المراهقين الهاربين سيئة بكوريا فالجهة الوحيده اللي تقبل إنها تشغلهم هم المتاجرين بالبشر ! "لي" تورطت بشبكات الدعارة و هي قاصر بعمر 15 سنة ، و كان سجلها حافل بالإعتقالات بسبب إنها كانت تسرق من " العملاء "
عام 2010 "لي" تزوجت زواجها الأول لكن اللي ما أحد كان يعرفه إنها بنفس الوقت كانت على علاقة برجل آخر هالرجال وهي معاه بالسيارة صار عليهم حادث و توفى و عام 2011 انجبت طفلتها و يقال أن زوجها ماهو والد الطفلة الحبيب اللي مات بالحادث هو الأب و أكيد الزواج ما أستمر و تطلقوا بذيك السنة.
جاء عام 2014 و سافرت مع خطيبها الجديد لتايلاند وكانو رايحين للبحر و توفى الرجال غرقان
زواجها الثاني كان عام 2015 أهل زوجها كانو مب طايقينها أخوياه يقولون البنت ذي ماهي صريه لكن الرجال ميت عليها و يبيها و فعلا تم الزواج ، الأهل يوم الزواج ما جازوا لهم ضيوف " لي " و اللي زاد الطين بله أنها ما دفعت شي بالزواج أبد
و المفترض تكون تكاليف الزواج مناصفة بينهم قالو الأهل خلاص مب مشكلة هاتي العانيات اللي جتك تسدد حقك بالزواج قالت ما عندي لكم شي , أيه حتى هم عندهم عانيات طلعت ماهي سلوم العرب بس
الأهل هنا عينوا محقق خاص يبونه يجيبلهم سالفتها المحقق رجعلهم و قال شفتوا أمها و أبوها اللي حضروا ؟ تراها مستأجرتهم ماهم أهلها الحقيقيين و أغلب ربعها اللي حضروا ناس ماهي مضبوطة راحوا الأهل طقوا ولدهم على راسه و خلوه يبطل الزواج .
و بعام2016راحت لحبيب سابق معها بنتها وقالت ترا ذي بنتك قال الرجال الشكوى لله مالنا إلا نتزوج و نربيها سوا بعد زواجهم أتصل عليه واحد يقول تراها حبيبتي شلون متزوجها أنت!و أنفصلوا بس الصدق الرجال ما تكلف أبد زواجهم كان بمقهى و المغني كان خويه صح انه شهم الله يخليه لأهله بس بخيل شوي.
بعد أربع شهور من فشل زواجها الثالث " لي " و " يون " آخر أزواجها وقعوا على أستئجار الشقة اللي يبون يعيشون فيها إذا تزوجوا , عشان تستأجر شقة بكوريا قدامك طريقتين الطريقة العاديه اللي كلنا نعرفها كل شهر تدفع أوالطريقة الثانية تدفع ثلث مبلغ الشقة كمقدم
المبلغ هذا حسب فهمي الحكومة الكورية فارضته كطريقة لمساعدة المواطنين على الإدخار فلو طلعت من الشقة بعد كم سنة يرجع لك المبلغ كامل أو بحال تخلفت عن السدادما تنطرد و ياخذون من المقدم و لراعي العقار فايدة هالمبلغ أنه يوفر له راس بحيث بالوقت اللي أنت ساكن عنده يستثمر الفلوس بمكان ثاني
علاقة الثنائي بدأت من عام 2012 و القناة دورت أسم " لي " حسب إدعائها بالشركة اللي يشتغل فيها " يون " ولا حصلوا أسمها فغالباً علاقتهم بدأت بمواعيد مدفوعة الثمن مثله مثل غيره من عملائها و تزوجو عام 2016 بلاس فيغاس طبعا هالزواج ماهو معترف فيه بكوريا
و هي أصلا ما كانت تبيه يسجل بكوريا و سببها كان إنها ما تبي تخسر المعونات اللي تحصل عليها من الحكومة بحال زواجها و لكن هالكلام تغير لحاجة في نفس يعقوب عام 2017 و سجلوا زواجهم رسميا بكوريا .
"لي" بدأت تضغط على زوجها عشان يطلع تأمين على حياتها رغم أنه بالثلاثينات بعمر يعتبر صغير على طاري الموت الرجال بعد الزن المستمر وكل أمره لله يبي يرضيها راح و طلع تأمين على حياته التأمين كان يأخذ مبلغ 700 دولارشهريا !
الشقة الفارهة اللي عايشه فيها زوجته تبعد عن شغله ساعتين لذلك أضطر أنه بوسط الأسبوع يستأجر قبو قديم غير مؤثث قريب من دوامه وهي قعدت بالشقة والشي اللي ما يعرفه " يون " إن " لي "ما كانت لحالها بالشقة كان عايش معها حبيبها !
فيه تقليد قديم بكوريا و شبه مندثر ان الزوج يعطي زوجته الراتب كامل وهي تعطيه مصروفه لان المراه هي ادرى باحتياجات البيت و مصاريف الاسرة"لي"قالت كل شي و الا عادتنا و تقاليدنا الراتب يجيني كل شهر و "يون"ما خالف و هذا اللي سواه لكن مع الوقت ما عاد تعطيه او حتى اذا عطته تعطيه مبلغ بسيط
وصار يحاول يستدر عاطفتها عشان تعطيه من فلوسه ! يرسلها كيف نعاله متقطعه و يخجل انه يلبسها و وده يصلحها
و ساء فيه الحال لدرجة أنه مامعه حق أكله بوسط الأسبوع كان ياكل بكافتيريا الدوام مجانا لكن بالويكند أحيانا "لي" تقوله لا تجي و يبلش بأكله فصار يراسل زملاءه و يطلب منهم مبالغ لا تذكر 7000 آلاف وان تفريبا 18 ريال و 30 الف وان تقريبا 75 ريال
و مره طلب من واحد ثلاثة دولار يقول بشري لي ريمين و علبة ماء قال زميله شدعوه 3 دولار و حوله 100 دولار و على طول رجعله " يون " 97 دولار يقول خلاص شريت اللي أبي وش حاجتي بالباقي !😔
طبعا زملائه يعرفون ان "يون" وضعه المالي ممتاز كان متوظف بأول العشرينات و من يومها وهو يدخر و راتبه يعتبر من الرواتب الجيدة بالشركة لكنهم للاسف ما احد حاول يستفسر عن حاله و وضعه
"يون " بهالفترة صرف على " لي" كل مدخراته اللي تقريبا كانت ٤٠٠ الف دولار شي محول على حسابها شي محول على حساب حبيبها و حتى 3 من أصدقائها ما نستهم و خلته يحول لهم يوم شافته صار على الحديده غصبته يأخذ قروض توصل قيمتها مئات الألاف
ويوم سكرت البنوك الباب بوجهه أخذ قرض من الشركة اللي يشتغل فيها بقيمة 100 الف دولار "يون " بعد سنة وحده من زواجهم أعلن إفلاسه و كان عارف إنها معاه بس عشان الفلوس فقالها خل نتطلق و لما هالموضوع ما تم راح يبحث شلون يبيع أعضائـ ـه !
" يون " من كثر ما "لي" هبلت فيه و تنكر شي هي قد قالته او تقّوله شي ما قاله بدأ يسجل أتصالاته مع "لي" و بأحد هذي الاتصالات نرفزها لما درت انه سدد اجار القبو اللي هو فيه و كأن عندها له خطة ثانية !
"لي " قبل شهر من وفاة "يون" أقنعته يطلع لرحلة صيد معها هي و أصدقائها اللي كان أحدهم حبيبها , طبعا رحلة الصيد هذي مثل كل شي ثاني بكوريا مختلفة شوي اللي كان يصيد يطلع لمظلات كأنها بيت و طول فترة الصيد يقضيها بهالبيت ينام ويقوم فيه لين يمشي
لما نام"يون"دفوه على البحر و حاولو أنهم يغرقونه بس وقفوا لأن بدا اطلع اصواتهم وحولهم ناس، أحد الشهود يقول "يون" بدأ يهاوش و يقولها وش ناويه عليه أنتي ! قالت له أنت سكران و طحت ما سويت لك شي أنا وهو يقول لا أنتي اللي دفيتيني طيب ليش قبل كم يوم حاولتي أنك تخربين كفراتي قبل أسافر!
و " لي " بدال ما تجاوب سؤاله قالت أيه صح أنا أنسانة سيئة عشان كذا دفيتك أيه أنا أستاهل أموت لأني أنسانة سيئة فكانت تحاول تتلاعب فيه و تقلب الموقف لصالحها وتحسسه بالذنب ليش أساسا يشك فيها .
الشرطة راحت تبحث بالفواتير تتأكد إذا " يون " صلح سياراته بذاك الوقت أو لا و فعلا لقوا إيصال لورشة و راحوله قال الرجال جاني و الكفر الخلفي كأنه مشقوق بسكين !
عقب ذا السالفة اخذوه مره ثانية للبحر و سبب اصرارهم على البحر لانه ما يعرف يسبح خلوه يجرب البانانا بوت و كانو يمشون بسرعة و بدون مراعاة له و كأنهم كانو يبونه يطيح و يغرق بس " يون " ما كان هذا يومه .
بلشت به " لي" ماتدري وش تسوي قالت بجيب سمكة معروفة عندهم لازم تقطع بطريقة معينة لأن فيها سم لو ما قطعتها كويس سلم على الشهداء اللي معاك, و فعلا قدمتها له " لي " و ما صار له شي و اللي يخلينا نعرف عن هالحادثة كانت ترسل لحبيبها منهارة تقول ذا وش فيه ما مات!
الرجال مب راضي يموت و من كثر الديون ما عاد هو قادر يدفع حق التأمين و يوم ورا يوم موعد أنتهاء التأمين يقرب لين أصبحت لي أون هي بذاك النهار و أدركت إن اليوم ينتهي التأمين على حياة " يون " قومت حبيبها و قالت مشينا نجيبه و نطلع للبحر
* يون وهو ينتظرهم من كاميرات المراقبة
* يون وهو ينتظرهم من كاميرات المراقبة
راحت لبيته بسيارته و اللي يسوق حبيبها
حتى ما حاولت إنها تخلي آخر يوم بحياته يوم جيد كل اللي طالعين معهم كانو أصغر من "يون"بـ 11 سنة و كانو طول الجلسة يتمسخرون عليه و كيف أنه كبير بالعمر و جاي معهم بعدين قالو معانا جح بس ما معنا سكين و خلوا " يون " يفقشها براسه وكانو يصورونه
مقطع من تصويرهم يبين فيه قد ايش هالناس ما عندهم احترام لهالانسان و يحاولون يهينونه و يرهبونه باي طريقة
المكان اللي هم فيه الناس تجيه عشان تنط من مرتفع على البحرشافو الرجال قاعد ماعنده نية يسوي شي قالو يا يون ودك ترجع لدارك؟قال ياليت قالو ما حنا راجعين لين تنط قال مستحيل هنا"لي"قالت يعني تبيني أنا أنط أنا!!يلا بروح مع أني تعبانه بس بروح دام ماودك!المشكلة ذا المجنونة ما أحد قالها شي
هنا حبيبي " يون " قال لا خلاص بقوم , و حصل اللي راح يحصل لأي شخص ما يعرف يسبح وطب ببحيره الرجال بدأ يغرق و "لي" قالت لاصدقاءها روحو دوروا المنقذ حق البحر و حبيبها قال أنا بروح أنقذه يقولون كان يسبح ببطء شديد و ما رجعوا الاخوياء الا والرجال ميت
" يون " مات و باقي على موعد أنتهاء التأمين ثلاث ساعات و نص فقط ! طبعا مثل ما أنت خابر التأمين قضبوها الباب لكن فيه فلوس ثانية قدرت تاخذها مثل مقدم الشقة اللي كان 140 ألف دولار + تعويضات من دوامه و بما أنه كان متبني بنتها فالفلوس كلها بتروح لها
أمه و أبوه ماعرفوا أنه متبني البنت إلا بعزاه لما جتهم " لي " و قالت هذي بنت المرحوم كأنها تقول مالكم شي عندي بس الطامه إن البنت ذي ما هي وارثه " يون " بس حتى الأب و الأم إذا ماتو بتورث حلالهم "لي" و بنتها !
"لي " لو حاطه مخها هذا بالدراسة كان و إلا تدري ليش نضحك على أنفسنا غالبا لو حاطته بالدراسة ما أكلت عيش بس كان فكت الناس من شرها على الاقل
" لي " وحبيبها أختفوا عن الأنظار لأكثر من خمسة أشهر بعدين سلموا أنفسهم ! يقولون " لي" كانت تحاول بذيك الفترة إنها تجمع 300 ألف دولار حق محامي من شركة محامة قوية و معروفة أنها تطلعك مثلل الشعرة من العجين لكن ما توفقت بمسعاها
وقررت تلعب لعبة ثانية من دخلت السجن و هي تراسل القاضي و تقوله أيها القاضي الذي أحترمه و أشياء ثانيه زي :
سجلت لك في صفحة الطيب ميلاد
بين الرجال اللي عريقة نسبها
ترفع لك الراية على روس الأمجاد
و إن شبت النيران تخمد لهبها
و إن كان لأهل الطيب سيد و أسياد
ترى أنت سيدها و سيد عربها
سجلت لك في صفحة الطيب ميلاد
بين الرجال اللي عريقة نسبها
ترفع لك الراية على روس الأمجاد
و إن شبت النيران تخمد لهبها
و إن كان لأهل الطيب سيد و أسياد
ترى أنت سيدها و سيد عربها
طبعا على كثر رسايلها للقاضي ما أرسلت و لا رسالة وحده لأهله تعتذر فيها أو حتى تبرر موقفها لو كانت للحين تبي تقول إن اللي صار مجرد حادثة فالأهل قاعدين يناشدون الناس أنهم يولون هالقضية أهتمام كبير عشان القاضي ما يتساهل معها بالعقوبة .
المختصين يقولون انها من طلوعها بالبرنامج وهي تظهر علامات السايكوباث فمن هالعمر باين عليها إنها تعرف شلون تتلاعب بالناس و تحصل على اللي تبيه، اللطف و الأدب كانو مجرد قناع يحميها من العالم لأنها كانت بوضع إجتماعي سيء و فيه تقدر تحقق مصالح مادية من التبرعات و الخدمات اللي تقدم لها
"يون" ماهو غبي بس كان وحيد بلا اسرة و اصدقاء يسألون عنه و عن احواله فبعد وفاته اقرا رسايل بجواله يرسلها لنفسه و يقول فيها انه يبي ينت/حر بس ماهو قادر و يتوقع ان حتى بحال وفاته زوجته ما راح تحضر العزاء ، "لي" كانت تعرف شلون تختار ضحايها و "يون" كان هدف للاسف سهل
كيف تعامل السايكوباثي معك باللقاء الاول
حدسك هو اول جنودك لمواجهتهم لا تشكك فيه
"لي" ما احد ينكر انها انولدت لظروف صعبة و اللي كانت تحتاجه شي اكبر من مجرد تجديد بيتهم لكن هالشي ما يبرر لها جرائمها لما كبرت ، شخصياً هالقصة بينت لي اهمية و جود الناس حولك و ان العلاقات الطيبة ممكن تنقذك من مصير مظلم "لي"لو احد ساعدها بطفولتها يمكن ما انتهى فيها الحال كذا .
انتهت قصة اليوم اذا وصلت لنهاية الثريد اقدر تتطلع على القصص السابقة بالمفضلة وهذي احدها :
جاري تحميل الاقتراحات...