الإمام ابن الجوزي رحمه الله كان ليه كلام جميل اوي في كتاب صيد الخاطر في فصل {الغفلة سبب الوقوع في الذنوب}
كان بيقول ايه بقا !!
لاينال لذة المعاصي إلا سكراناً بالغفلة ، فأما المؤمن فإنه لايلتذ .
طيب حلو اوي لايلتذ ليه يا إمام ؟؟

قال: لأنه عند التذاذه يقف بإزائِهِ علم التحريم طب وايه كمان قال: وحذر العقوبة
طب جميل اوي انا عايز بقا اوصل لمرحلة اني متلذذش بالمعصيه اعمل ايه!؟
فيقوم الإمام يقول كلام يلخص فيه الحكايه " إن قويت معرفته رأى بعين علمه قرب الناهي ، فيتنغص عيشه في حال التذاذه "

يعني ايه بقا كل الكلام ده
ان مبيتلذذش بالمعاصي إلا الغافل انما المؤمن لا طب ليه!؟
عشان على طول بيفتكر النواهي اللي المولى عز وجل قال عليها وكمان بيفتكر العقوبة اللي هي النار والعياذ بالله..
طيب انا عايز اوصل للمرحلة دي "يبقى لازم تعرف دينك"

من اخطر الاشياء اللي الواحد بيشوفها وهي اصلا ان الاساس في الدين مش موجود اصل الدين مكنش بينضاف للمجموع هو اه مبينضفش لمجموع الدنيا انما بينضاف لمجموع الآخره.
احنا لازم نعرف أساسيات دينا كويس وكمان نعرف المولى عز وجل كويس لأن المعرفة تؤدي للحب واللي بيحب مش بيعصي .

الشاهد : على قدر معرفتك بدينك على قدر حبك للطاعة وكرهك للمعصية