"فات المعاد" ، تبدأ المقدمه بحوار بين الفرقه والقانون من الحجاز ف جمل تصاعديه وبعدين ينزل قرار المقام ويهدي الرتم بعدين يعلي تاني لحد ما يحول للنهاوند وتقول الكمانجات وبعدها الجيتار جمل هاديه حزينه بعدين الفرقه ترد علي الجيتار بجمل كلها حنيه ومواساه
يدخل ايقاع الرومبا وهنا قصد يستخدم المثلث والبنغور و المعدن اللي ف الرق عشان يدي صوت اشبه ب دقات الساعه كإنه معيشك جو التشويق وهو بيسمعك تكات الساعه ويحسسك بالوقت اللي فضل علي فوات المعاد ، ويخش صولو ساكس روعه علي الكرد وتقول الفرقه كلها نفس الجمله تاني ويقولها بينهم بالتبادل
بعد الجمل الهاديه تخش الفرقه بشكل سريع كإن جرس انذار او عد تنازلي علي فوات المعاد عشان يخش بعده صولو كمان يرد عليهم وهنا استخدم راحة الارواح ودخل نغمه شرقي بعد ما كان كل اللي فات مفيهوش ربع تون ، بعدين تخش الفرقه بشكل اعنف تقول درجة ركوز المقام كإنها بتعلن انه خلاص فات المعاد
تقول فات المعاد من راحة الارواح وبدأ بقفله تعبيرا عن فوات المعاد ، وعبر عن كلمة بعاد انه طول فال أ ف اداك ايحاء بالبعد وعاد الكلمه ٣ مرات وف كل مره يطول النغمه كإنه صدي صوت وكل مره يبعد ، وف كلمة النار راح معلي التون عشان نار قايده ، وف دخان ورماد نزل بالتون عشان يوصف خمدانها
يخش البياتي ومعاه ايقاع الواحده ف "تفيد ب ايه" ويروح واخدنا هيلابيلا لراست النوا ف "طالت ليالي " ويروح مرجعنا راحة ارواح ف "واتفرقوا الاحباب" ويرجع بياتي ف جمله استعاطفيه وهي بتقول "وكفايه بقا " وتروح راجعه لراحة الارواح ف "تعتب عليا " وتروح قافله بنفس الكلمه اللي بدأت بيه
موسيقي خياليه وتوزيع ملوش مثيل انت مش عارف مين هيرد علي مين ولا ازاي ، يخش الساكس بجمل متقطعه شيك من الكرد وايقاع الكراتشي ويرد عليه الفرقه بعدين الجيتار يقول جمله وبعدين تقول الفرقه ويرد الجيتار ويرد عليه صولو كمان بعديه يرد القانون ، وياعيني علي دخول المقسوم مع صولو الاوكورديون
تقول الست ياما من الكرد وعماله تطول فالالف ماهو ياما بقا ، وهنا ف جملة "نظرة حب" وكلمة ملامه " نزل باللحن كدا عشان يوصلك شعور الكسره وطعمها حلو اوي ، ويحول الايقاع للرومبا ف "بس انا نسيت " ولسا احنا فالكرد
تقول الست ان كان من الكرد من غير ايقاع ف جمل لحنيه كلها احلي من بعض الحقيقه، وبعدين يحول بليغ للراست النوا ف كلمة "ستاير النسيان " وهنا مرسي جميل كان موفق تماما ف اختيار الكلمات ، ودخل ايقاع الوحده بس قبل كلمة "نزلت "، وراح راجع تاني للبياتي ف "انا نسيته انا" ورجع ل تفيد ب ايه
الموسيقي الاجمل ، وانا قاصد اجيب الحفله الاولي عشان رد فعل الناس بيحلي الموسيقي ١٠ اضعاف ، هنا الموسيقي من مقام البياتي ورد فعل الراجل فالثانيه ٠:٣٦ وهو بيقول "الله الله الله اكبر "ابلغ رد علي المزيكا الحلوه دي وعلي الحركه المجنونه بتاعة بليغ دي
تقول الست "الليل " فشكل مواويلي من غير ايقاع ،بليغ سلمها مقام البياتي وقالها اتصرفي انتي وهي احسنت التصرف الحقيقه ، بعدين يخش الايقاع بعد كلمة "التنهيد "ويروح محول صبا ف كلمة "لسا مهومش بعيد " عشان هيودينا للعجم والصبا علي العجم عامل زي المربي علي القشطه
تخش لازمة سي بيكار تمهيدًا لدخول مقام كله كبرياء وهو العجم وتغني الست "عايزنا نرجع زي زمان " وهنا فيها شوية سخريه وكان اختيار العجم موفق تمامًا من بليغ وكمان نزولها بالمقام بعد كلمة ارجع يا زمان ولا اروع ، بعدين راح كسر حدة الكبرياء دي بمقام كله حنيه وهو البياتي وتغني "وهاتلي قلب
هنا الست اول مره قفلت تحت عادي فقرار المقام وبعدين راحت قافله فوق ف جواب المقام وبعدين رجعت قفلت تحت تاني ، بصراحه روعه وجمال مع بعده جمال وانك تسمع قفلة فوق هتحسسك بحلاوه قفلة تحت بعدها والعكس صحيح
بليغ يمارس هوايته المفضله وهي شخلعة المزيكا، هنا موسيقي جميله من الراست وعلي ايقاع المقسوم وبتتبادل فيها الفرقه الحوارات والادوار وبعدين فالدقيقه ١:١٣ يحول الايقاع لايقاع كراتشي ويغير المود العام ويخش صولو كمان هايل ترد عليه الفرقه بجمل متقطعه هايله بعدين تسلم الست علي الراست
هنا تغني الست من ناري من مقام راست النوا وشوف اداء الست وهي بتقول ناري عامل ازاي ، ونفضل مكملين راست النوا وتيجي عند "وقسوة الدنيا عليا وتروح محوله ل مقام سيكا العراق او راحة الارواح وتفضل مكمله عليه
تكمل الست راحة ارواح وبعدين تيجي الجمله الاحلي والاجمل ف الاغنيه كلها ومن اجمل اغاني بليغ اللحنه وهي جمله "بيني وبينك هجر" وهنا حول بليغ للبياتي وكسر اللحن فكلمة "قلبي داريته " " وطريق انت اللي بديته "ياخدك دنيا تانيه والله
ترجع تاني الست تقول تفيد ب ايه من البياتي لحد ما تقفل وتقول فات المعاد من راحة الارواح ، انتهي الثريد واشوفكوا ف ثريد تاني ان شاء الله لو كان فالعمر بقيه ❤️
جاري تحميل الاقتراحات...