رتبها

ثريد عن التطور
من وقت الإعلان عن جائزة نوبل للفسيولوجيا والطب، وأنا في بوست كل شوية يظهر أمامي بيتكلم عن أن الجائزة في حد نفسها بتهدم نظرية التطور، وأن كلام التطوريين عن أن (النياندرتال) كأشباه بشر كله طلع غلط، وحاجات من هذا القبيل.

في البداية كده خلينا نستعرض تطور الإنسان من أول مملكة الحيوان الكبيرة اللي أحنا بننتمي ليها. مملكة الحيوان دي فيها طائفة كبيرة من الكائنات الحية اسمها (الثدييات – Mammals)، وسموها ثدييات لأنها بتمتلك ثدي بتقدر من خلاله ترضع أطفالها، كمان بيغطي جسمها الشعر

ولما بتحمل وتولد بيكون عندها (مشيمة – Placenta)، بالإضافة لامتلاكها بعض الصفات الأخرى المميزة.
طائفة (الثدييات) في منها رتبة من الكائنات الحية ظهرت على الأرض من حوالي 58 مليون سنة اسمها (الرئيسيات – Primates)، اللي هتنقسم لمجموعتين: (الهباريات – Strepsirrhini) اللي منها الليمور

اللي بيعيش عالأشجار في الغابات المطيرة، و(النسناسيات بسيطة الأنف – Haplorhini) اللي بتعيش عالأرض والأشجار، وبالتالي هتلاقي أن (الرئيسيات) بتتميز بقدرتها في العيش على الأرض والأشجار.
(النسناسيات بسيطة الأنف) عبارة عن رتبة كبيرة من الكائنات الحية اللي بتنقسم لنوعين: الأول هو

الترسيسريات – Tarsiiformes) ودي منتشرة في أفريقيا وأسيا، وسموها كده لأن عندها (رسغ) بتقدر من خلاله تمسك في فروع الأشجار. والنوع التاني هو (السعالي – Simiiformes) اللي بينقسم بدوره إلى فصيلتين.
الفصيلة الأولى هي (قردة العالم الجديد – Platyrrhini) والمصطلح الأنجليزي ده معناه

أن أنف القرد مفلطحة ومستوية، ودي تعتبر صفة مهمة هتميزها عن (قردة العالم القديم)، غير أنها بتمتلك في فكها 12 سنة، عكس (ٌقردة العالم القديم) اللي عندهم 8 بس. قردة العالم الجديد ظهرت تقريبًا من حوالي 40 مليون سنة. الفصيلة التانية بقى هي (النسناسيات نازلة الأنف – Catarrhini).

فصيلة (نسناسيات نازلة الأنف) بتتكون من مجموعتين: الأولى هي (قردة العالم القديم - Old World monkey)، والثانية هي (القرديات – Apes). وهنا بقى تيجي المشكلة الكبيرة والسؤال المغلوط دايمًا، لو الإنسان أصله قرد، ليه لسه في قرود لحد دلوقتي متطورتش؟. هو الأنسان أصله قرد ولا هو نفسه قرد؟

المعضلة دي بتيجي لأن كلمتي Apes و Monkey الأتنين بيتم ترجمتهم في اللغة العربية إلى كلمة (ٌقرد). نحل المشكلة دي أزاي؟
تاريخيًا ولغويًا كلمة (Ape) هي كلمة أنجليزية قديمة موجودة في اللغة الأنجليزية قبل ظهور كلمة (Monkey)، وكانت بيتم استخدامها ككلمة هزلية الغرض منها السخرية من

الأشخاص بوصفهم أنهم (قرود) بغض النظر بقى سواء كانوا (قرود عالم قديم) أو من فصيلة (القرديات). ولكن مع تطور اللغة وظهور كلمة (Monkey)، فكلمة (Monkey) مبقتش تستخدم إلا مع فصيلتين فقط من القرود وهما (قرود العالم القديم) و(ٌقرود العالم الجديد)،

والأتنين ملهمش علاقة بالخط التطور للإنسان أصلًا زي ما أنت شايف؛ لأن الإنسان في الأخر يتبع فصيلة (القرديات – Apes) وده خط تطوري بعيد تمامًا عن (القرود – Monkey)، وبالتالي الإنسان مش بيتطور من (القرود) اللي أنت قصدك عليها، ولا عمرك هتشوف قرد تطور وبقى إنسان أصلًا

لأن ده مش الخط التطوري بتاعه، بالإضافة أن الإنسان مش أصله قرد زي مانت متخيل، ده الإنسان نفسه نوع من أنواع الـ Apes.
نكمل رحلة تطور الإنسان من (القرديات – Apes) اللي هتدينا 3 عائلات من الكائنات الحية: الأولى هي (الجيبونات – Hylobatidae) ودي بتعيش في جنوب شرق أسيا ومعندهاش ذيل

الثانية هي (الأورانجوتان – Orangutan) أو زي ما بيُطلق عليه (انسان الغاب) ومنتشر في جنوب شرق أسيا، ويعتبر من أكثر الكائنات الحية وعيًا بذاته وعلماء اجتماع كتير بيعتقدوا أنه بدأ فعليًا عصره الحجري بسبب مهاراته في استخدام الأدوات وصنعها. الثالثة هي (القردة العلية – Great Apes)

واللي ظهرت على الأرض من حوالي 20 مليون سنة. وفي بعض التصنيفات اللي بتضع (الأورانجوتان أو إنسان الغاب) كقبيلة تحت (القردة العليا).
(القردة العليا) بقى بتنقسم إلى أسرتين: الأولى هي (الأرانجوتان)، والثانية هي ( البشراناوات – Homininae)

اللي بتنقسم إلى عائلتين: الأولى هي (الغوريلا – Gorillini) والثانية هي (البشراناوية – Hominini).
(البشراناوية) بتنقسم إلى جنسين هما: الأولى (الشامبانزيات – chimpanzee) والثانية هي (البشرانية – Homo).
أحنا عملنا كل ده ليه؟ علشان أعرفك أن ظهور الجنس البشري (Homo)

كان بيسبق وجوده جنس آخر ولكنه أنقرض تمامًا هو (القردة الجنوبية – Australopithecine)، وده جنس سبق وجود البشر ويُعتقد بنسبة كبير أن البشر تطوروا من أحدى تفرعاته وهو (قرد الأرض – Ardipithecus) واللي ظهر من حوالي 4.4 مليون سنة. والقردة الجنوبية بتفرعاتها تمامًا

هي ما يُطلق عليها اسم (أشباه البشر – Hominina).
هل حضرتك لاحظت وجود (النياندرتال) كأحد أشباه البشر، أو البشر تطوروا منه؟، لا، ومش هتلاقي، ليه؟
لأن جنس الإنسان (Homo) بيمتلك انواع كتير، كل نوع له صفات جسدية وتشريحية وعقلية مميزة عن النوع الأخر، زيك أنت وأولاد عمك

كلكوا بترجعوا لجد واحد، ومحدش فيكوا خلف التاني أو يعتبر سلف للتاني، وكلكوا مختلفين عن بعض ظاهريًا وعقليًا وفي صفاتكوا كمان.
فالإنسان العاقل اللي هو أحنا (Homo Sapiens) لينا ابن عم تاني اسمه (إنسان نياندرتال - Homo neanderthalensis)، ولينا أولاد عم كتير زي

(إنسان دينوسوفا – Homo Denisova) ولكنه كان أقرب للنياندرتال عننا، ويقال أن الأتنين ليهم جد مشترك اسمه (إنسان هايدلبرغ - Homo heidelbergensis) ولكن في أبحاث بتقول الكلام ده مش صحيح؛ لأن إنسان هايدلبيرغ متشابه جدًا مع إنسان نياندرتال وبالتالي بيعتبروه الصورة البدائية أو الأولية منه

، وفي رأي بيقولوا أن كل دول بيرجعوا لأصل واحد اسمه (الإنسان منتصب القامة – Homo erectus) اللي هو ابن عم ( إنسان فلوريس - Homo floresiensis) اللي عاش في أندونسيا واللي تميز بقصر القامة. وكتير وكتير من الأجناس البشرية، وكل دول انقرضوا ومفضلش إلا أحنا.

هل حضرتك لاحظت أن إنسان نياندرتال يعتبر من أشباه البشر ولا هو نوع مختلف من البشر؟
هل حضرتك لاحظت أن إنسان نياندرتال هو سلف للإنسان الحالي، ولا نوع مختلف عاش معاه وانقرض؟
هل حضرتك عندك مصدر بيقول عكس الكلام ده كله المدعوم بأدلة مادية وتجريبية من علوم مختلفة؟
-نقل عن مازن عماد❤️