مبروك للناجحين في امتحان الشهادة
شايف في التايملاين مكتوب اقرو في الجامعة الجمبكم، النصيحة دي كويسة لو الجامعة الجمبكم رسومها معقولة وسمعتها ما سيئة شديد، المحدد النهائي هو اجتهادك قدر شنو والكتب والنت ما خلو حاجة، فلو بتقضي كل يوم ٣ لي ٤ ساعات في المواصلات دي ممكن تستفيد منها👇🏼
شايف في التايملاين مكتوب اقرو في الجامعة الجمبكم، النصيحة دي كويسة لو الجامعة الجمبكم رسومها معقولة وسمعتها ما سيئة شديد، المحدد النهائي هو اجتهادك قدر شنو والكتب والنت ما خلو حاجة، فلو بتقضي كل يوم ٣ لي ٤ ساعات في المواصلات دي ممكن تستفيد منها👇🏼
وتقرا براك في الوكت دا وتوفر قروش كتيرة، لو عايز تقرا خاص وحتسافر فمصر خيار منطقي من ناحية الرسوم ومستوى الدراسة، خصوصا للتخصصات الطبية لانو هنا بقت غالية، لو عايز تعيش التجربة الجامعية قدم في الجامعات الحكومية الخاصة زي الثانوي واحد، لكن طبعاً على حساب انك ممكن تتأخر لو قفلت،
مافي حاجة اسمها حانزل كورس انجليزي في السوق العربي بعد ما اتخرج ولا اخر سنة زاتو، اللغة -اي لغة- عايزة سنين عشان تتمكن منها من هسة اقعد اتعلمها النت ما خلى حاجة، مهارات الحاسوب مهمة شديد لو ما عندك جيب واحد لو ما بتقدر استخدم البتلقاو في اذا كان في اللاب او من صاحبك اخوك الخ،
شوف ما بتعرف تعمل شنو في الكمبيوتر وحاول اتعلمو خصوصا الاساسيات وبرامج الاوفيس وكيف تبحث والمواقع المهمة للطلبة والبرامج الليها علاقة مع تخصصك ركز فيها ما تستنى لحدي ما تتخرج عشان تنزل معهد يعلمك ليها، الفرق بينك وبين الاستاذ الحيقريك في المعهد دا غالبا انو استخدمها في الجامعة
واتعلم الكتابة السريعة في الكيبورد، الحاجة دي ساهلة شديد بتاخد منك شهر بس لحدي ما تبقى سرعتك معقولة، ودي حاجة حتفيدك شديد في القراية والتلخيص والبحث والشغل والgaming وفي حياتك عموماً، اكتب في قوقل learn typing واي موقع بعلمك، بالذات لو تخصصك ليو علاقة مع الحاسوب ولا الكتابة
بمناسبة الحاسوب ما تمشي الهند، ما يقولو ليك احسن حتة للحاسوب ولا الما بعرف شنو، اللهم إلا لو جاتك منحة لكن إياك تدفع قروش تمشي الهند او يجيك واحد بتاع الدراسة في الهند ويوريك صور ويوهمك بأنو التعليم هناك واو والكلام دا، مشاكلها كتيرة غير المشاكل الاكاديمية، وبرضو ما تقول حامشي
اقرا فيها كورس انجليزي اخير السوق العربي، الكلام دا على مسؤوليتي واي زول بقول ليك غير كدا جيبو لي، شوف الخيارات التانية كلها اول وخلي الهند اخر خيار لو اضطريت يعني، هناك سجل في جامعة كبيرة ويستحسن الcampus ما تقرا في كلية وما تسمع كلام السناير لانهم غالبا ما عارفين حاجة،
متطلبات الجامعة مهمة ما تقعد تقول بقرونا ليها ليه، عاين للخريجين وحتفهم لا بعرفو يكتبو عربي لا انجليزي لا معلومتين في الدين صاح عندهم لا تاريخ السودان عارفين فيو شي لا اي حاجة، المواد دي مهمة شديد وما حابالغ لو قلت لي اهم من مواد التخصص لكن هم مكلفتات شوية وما بركزو عليهم شديد
المهم ما تهملهم لو ادوكم ليهم اتعلمهم عديل واعتبرهم حاجة مهمة شديد، وما تدخل روحك في حتة الدكتور قصدني وشيلني المادة والكلام دا حاول بقدر الامكان ما تدخل روحك في الحتة دي، في ناس كعبين في الدنيا في اي مجتمع حتى الدكاترة فما تخت روحك في موقف معاهم اللهم الا يجوك دا موضوع تاني
اختيار التخصص الجامعي ما حاجة حقت رغبة بحتة، في عوامل تانية بتختها في الاعتبار فشاور اهلك والناس الكبار الشايفهم شطار في مجالاتهم -ما الطلبة- ناس كبار شغالين يعني، شوف الناس دي رايها شنو واقرا كتير عن التخصصات والفرص البتيحها ليك وبتتطلب شنو وحدد على كدا وفي النهاية اقرا برضو
لو خشيت برغبتك ساي ولا شاورت ولا اهلك دخلوك تخصص برغبتهم برضو اقرا الحاجة الخشيتها لانو بعدين لمن تتخرج حتلقى روحك ما عارف حاجة ودا ما حيكون عذر مقبول انو ما اخترت التخصص صاح او اهلي قالو لي اقرا طب الخ، ما نفع خالص التخصص معاك ادرس قرار التحويل وشاور برضو لكن ما تتخرج ما عارف شي
بمناسبة اقرا، الجامعة لو قفلت ما تستناها تفتح عشان تتعلم عندك النت، الكتب، الكورسات أو امشي اشتغل ما تقعد ساي تستنى الجامعة وتقول ضيعت سنة وسنتين والكلام دا، ما حتضيع السنة الا لو انت قعدت ساي، واقرا برضو حتى لو ما حتخش جامعة وقررت تقعد في البيت برضو اقرا وبالتوفيق ليكم كلكم.
جاري تحميل الاقتراحات...