وفاة عبد الناصر وأغرب قطار ركبته: انا والله نسيت عبد الناصر مات امتي والسادات مات امتي ومبارك كمان مات امتي . انتم اللي بتفكروني وانا محتاس في اللي حوالي . المهم انا كنت باحب القطارات طول عمري ورواياتي كتير منها عن السكة الحديد وعمالها وقطاراتها . بطلت اركب قطارات
من 2012 بسبب التاخير وغيره . ماعلينا . كتبت مرة مقال عن اغرب القطارات اللي ركبتها مش فاكر حطيته في اي كتاب لي . لكن وفاة عبد الناصر اللي فكرتوني بيها فكرتني باغرب قطار . كنت قبل وفاته ب 3 ايام في فندق صغير لطيف في حلوان اسمه فتدق جلانز سمعت انه اتهد بعد كدا .
كنا بنحضر دورة ثقافية عن العمل النقابي وانا جاي من اسكندرية لاننا كنا بنأسس نقابة لشركة الترسانة البحرية اللي كنت شغال فيها . في المساء الارسال التليفزيوني قطع وظهر السادات ينعي الامة في وفاة عبد الناصر . جالي جنان ولاقيت نفسي باجري في حديقة الفندق اصرخ عبد الناصر مات واكررها
قضينا الليلة في حزن والصبح اخدت طريقي لمحطة رمسيس ارجع اسكندرية وما انتظرتش الجنازة . كنت امين شباب الترسانة وقلت لازم اكون معاهم . ركبت قطر الساعة 11 الصبح وانا شايف في المحطة كل القطارات جايبة الاف الناس من الاقاليم . قطر 11 الصبح دا درجة تالتة لكن محافظات بيقف في بنها وطنطا
ودمنهور بس قبل اسكندرية . اتحرك القطر ومافيش ولا راكب غيري والكمسارية والمفتش . ولا راكب غيري . امشي في العربيات ولا راكب غيري . يقف في المحافظات ولا راكب يركب وطبعا ولا ينزل وكل القطارات جاية القاهرة تمر جنبنا فوقها وجواها الاف البشر . والظريف ان كل ما القطر يقف في محافظة ويمشي
يمر الكمساري ومايلاقيش ولا راكب غيري لغاية ما وصلت اسكندرية . ليه عملت كدا ؟ فهمت بعدين ان اللاشعور خلاني عكس الناس زي ما حصل يوم 9 يونيو سنة 67 والناس كلها بالليل رايحة المنشية وانا عكسهم ماشي رايح الترسانة بالليل علشان كنت مسؤول الدفاع المدني ومالقتش حد من زملائي وقضيت الليل
لوحدي وسط ظلام لا ينسي . في المرتين اللاشعور كان بيقول لي ابعد عن الناصرية وبعدت ودي حكاية تانية . بس يفضل قطر الساعة 11 اغرب قطر ركبته في حياتي .
جاري تحميل الاقتراحات...