في عز الهرج اللي نحن عايشين فيه ، أسرة الشهيد حنفي حققت انتصار عظيم بتغيير ممارسة تاريخية في السلطه القضائيه.
حيث كان من الطبيعي إنه المحكمة تطلع قرار وما تطبعو تسلمو ليك الا بعد شهر او شهرين ، لكن الحصل إنه الأسرة بضغطها قدرت إنها تستلم القرار في ظرف أسبوع من ساعة علمها بيه .

الأسرة الآن حتخش مرحلة اقوى وهي مرحلة إنها تثبت خطأ القضاة الأعلنو براءة المتهم وعلى ثقة بإنتصارهم طالما هدفهم محدد وواضح .

أهم رسالة بترسلها لينا الأسرة بانتصارها دا هي إنه مفروض نتناسى جملة " بعد نسقط الانقلاب " البرددوها لينا قدر م نفتح موضوع طارئ ومحتاج حلول ،ونشتغل على إننا ننتزع حقوقنا ونسعى خلفها بعيدا عن التجاذبات السياسية حولها .

الخطأ المفترضنه اننا حنهزم الانقلاب من شارع واحد لكن الحقيقة الانقلاب محتاج لجبهات حروب مختلفة ، أسر الضحايا يضغطو في ملف العدالة والنقابات في تحسين ظروف أعضاءها والسكان في فرض قضاياهم المحلية عبر المجالس ومعركة سياسية تكون مدورة في تغيير النظام .

ختاما ؛؛؛
إصلاح المنظومة العدلية في السودان ما بجي بالفرجه والهتاف بل بجي بتحديد ثغرات المنظومة دي بصورة واضحه ووضع خطوات حقيقية في سبيل اصلاحها .
شكرا أسرة حنفي على إحياء الأمل فينا كل مرة 💙