عالمة ذكية من اسرة اكاديمية مرموقة لكن لم يعرفها العالم الا بالسايكوباث المتلاعبة بكل من حولها حتى ان زوجها على الرغم من انه احد ضحاياها الا ان عناصر الشرطة تشير له بانه مغفل و احمق ! قصتنا اليوم عن شيلاء دافيلو
شيلا دافيلو ولدت عام 1969 بأمريكا لابوين مهاجرين من ايران بعد ماصار عمرها سنتين أهلها رجعوا لديرتهم و قضت طفولتها بإيران و بهالوقت كانت إيران بأسوء حالتها و كبرت شيلاء على أصوات الرصاص و الانفجارات و الموت يحيط فيها من كل مكان لما صار عمرها ١٠ سنوات قامت الثورة الايرانية
و لا زانت ولا استقرت الاحول ابد فلما صار عمرها ١٦ سنة رجعوا لامريكا يقال إن شيلا نشأت نشأة يتمناها أغلب سكان الأرض فكانت من أسرة غنية جدا والديها تعليمهم عالي و أثنينهم كانو علماء باحثين بالمجال الطبي
هالشي أنعكس على شيلا اللي بدورها صارت عندها نزعة الطموح العالي و الإلتزام المهني و ضيف على هالخلطة معدل ذكائها عالي البنت الدنيا فاتحه لها أبوابها !لكن يقال ان العقبة اللي واجهت شيلاء ان اهلها كانو محافظين جداً هالشي سبب كثير من المشاحنات بينهم
و من رأيي إن أمها و أبوها عندهم خوف على مكانتهم الاجتماعية و نظرة الناس لهم و اللي خلاني اظن هالظن هو إن أخوها كان يعاني من الفصام ولهالسبب كانو مخبينه عن العالم ما فيه أحد قد شافه او تواصل معاه خارج إطار العائلة أبد !
شيلاء صار عمرها 21 سنة اهلها قالولها تعالي تزوجي لقينالك رجل أعمال حليوه أسمه فريد ، تالي شيلاء تقول إنها تزوجته بالإجبار بينما أهلها يقولون عسانا نموت لو أجبرناها على شي أساساً هي اللي جابته و أشغلتنا فيه !
بعد فترة من زواجها شيلاء خلصت جامعة و ألتحقت بكلية عشان تكمل دراستها بالمجال الصحي نمشي شوي لما صار عمر شيلاء 25 و تعرفت على شخص يقاله بول وكان أكبر منها بسنتين هالرجال يقال أنه ذكي جدا جدا و محقق كثير من الإنجازات بعمر يعتبر صغير مقارنة بالمشوار المهني لغيره
و النتائج كانت مُستحقة الرجال كان مسخر حياته كلها للدراسة و العمل لكن ماكان شخص إجتماعي حتى إنه ما قد دخل بعلاقة عاطفية و جت شيلاء هكاليوم وقالت not any more قدر الله عليهم إنهم يحضرون مجموعة دراسة سوا
يقول بول أول ماشفتها جازت لي البنت ذكية و طموحة و الأمور اللي أنا أهتم لها ما تشوفها غريبة بعد هالإجتماع تكررت لقاءاتهم و العلاقة أنتقلت سريعا من صداقة لعلاقة عاطفية بس تقل ناسيه شي هالشيلاء ؟
فريييد زوجها طبعاً شيلاء ما صارحت بول انها متزوجة ابد لكن يوم تطورت علاقتهم شيلاء بدت تقول لبول أنا عندي سر أنا قاعده أكذب عليك أنت لو تدري عن حقيقتي ما ماشيتني والرجال يقولها يابنت الحلال تعوذي من أبليس هذاك حلوة و قمر الواحد وش يبي أكثر من كذا قالت اجل خلاص على راحتك
وكان بول يقدر بشيلاء أهتمامها بجدانها اللي كانت كل شوي تسافر لهم و تقضي وقت معاهم و بعد سننننة كاملة من العلاقة شيلاء كالعادة لجدانها زي العادة هنا بول جته مكالمة من رجال يقول أنت على علاقة بزوجتي شيلاء ؟ وهنا عرف بول ان الجدان مجرد عذر عشان ما يكتشف علاقتها بزوجها
بول أنهار ما كان يدري أن شيلاء متزوجة و قعد يتعذر و يقول والله ما دريت و خلاص بقطع علاقتي فيها قاله فريد لا لا يارجال ما توصل أنا بس دقيت أتأكد لا تتركها الله يقنيك بركتها ، و عقب هالحادثة فريد طلق شيلاء
بول واجه شيلاء و شيلاء قعدت تصيح و تشرح له الوضع و كيف إنها اجبرت على الزواج من فريد وهي بأول العشرينات و هو ثلاثيني و أنها عالقة بهالعلاقة ماهي قادرة تطلع منها قالها بول كان تقدرين أنك تطلقينه قالت ما أقدر أهلي لو تطلقت بيسوون لي مصيبة الطلاق ماهوخيار عندنا ابد
بول أعتقد أنه عارف مدى تحفظ العائلات الإيرانية و لهالسبب أقنعته بكلامها و أساسا من غير شي هو ميت عليها لكن وجود أسباب خلته يسامحها بسرعة، وهو بعينه شاف بالفترة اللي تلت طلاقها كيف تدمرت علاقة شيلاء بأهلها وكأنهم كانو بمعركة و شيلاء تدخل نوبات اكتئاب و كل شوي وهي تصيح و متنكده
هذا غير شعورها بالعار بسبب الطريقة اللي بدأت فيها علاقتهم حتى مره كانو معزومين ببيت أهل بول و كانو يسولفون عن فلم و شيلاء فصلت عليهم لانها حست إنهم يلمحون لخيانتها لزوجها بينما هم ما هم يمها ابد
العلاقة أستمرت 6 سنوات لين أخيرا قرروا يتزوجون شيلاء بهالوقت عمرها 31 و بول 33 كلهم كانو في أوج نجاحهم المهني و كانت الحياة حلوة معاهم
حتى إن شيلاء بدت تتحسن علاقتها بأهلها و أخوها كان يبي يزورها ببيتها شيلاء قالت لبول أخوي وده يزورني بول أنبسط وقال عين فراش وعين غطاء يا هلا و سهلا فيه قالت شيلاء يا حبيلك والله بس أسمع لازم تطلع من البيت إذا جاء وتضف معك قشك كله كأن ما قد عشت بهالبيت !
و عذرها لموضوع شيلة القش ان اخوي بينتكس لو حس بس اني متزوجة نظراًلحالته النفسيه ما يتقبل التغيرات بسهوله، بول وافق على مضض كان مستعد يسوي أي شي عشان تستعيد شيلاء علاقتها بأهلها و كان متوقع إن هالشي بيصير مره وحده لكن الموضوع صار يتكرر مره كل شهر و أحيانا مرتين بالشهر و أستمر شهور
شيلاء بهالفترة دخلت بدراما حاصله بالشغل عندها و كان أبطالها صديقتها ميلسا و حبيبها جاك اللي كان يخون صديقتها مع وحده اسمها اناليسا و إن جاك خلاص يبي يقطعها مع ميليسا لكن ميليسا تحبه و لا تبي العلاقة تنتهي فكانت تسأل بول وش رايك شلون ميليسا تكسب جاك ؟ و كان يعطيها نصايح
و تطور الموضوع لدرجة إن شيلاء و ميليسا كانو يراقبون بيت أناليسا و كان بول عارف بهالشي حتى انه اعطى شيلاء نظاراته الليلية اللي يستخدمها لمراقبة " المركبات الفضائية " عشان يقدرون يراقبون اناليسا بالليل زين :)
باحد الايام رجعت شيلاء من الشغل و قالها بول هاه وش صار مع ميلسا قالت خل تقعد ماعلي منها ، وش رايك لو نلعب لعبة لعبناها بالدوام اليوم و نغير جو؟ قال بول تم وش اللعبه ؟ قالت أربط عيونك و يدينك و أحط على رجلك غرض و أنت تتوقع وشو
و يلا أنا ببدأ أربط عيوني و أيديني و بدت اللعبة ، شيلاء ما قدرت تعرف وش الأغراض وقالت خلاص خسرت جاء دورك يا بول بالبداية بول كان متحمس و عرف الإجابة لكل غرض حطته عليه
وشيلاء تقوله واو ماشاء الله عليك مره ذكي طيب علمني وش ذا يقول بول فجأة كأن صار إنفجار بصدري ثم هالإنفجار حصل مره ثانية قعد يصارخ و يقول وش صار شيلاء تصيح وتقوله كنت جايبه سكين و طعىْتك بالغلط !
بول قالها فكيني و دقي على 911 بسرعه فكت عيونه بس قالت له قفل الكلابشات ما أدري وينه قامت شيلاء و دقت على 911 و مرت أكثر من 30 دقيقة و الإسعاف ماجاء ! بول يقولها دقي مره ثانية و تقوله معليش بس هم مشغولين شوي خلني أنا أروح للعيادة أجيب دكتور
شيلاء ما أخذت ولا خمس دقايق و رجعت له تقول العيادة مقفله الشكوى لله ماعاد فيه شي نقدر نسويه ! قالها مهبوله انتي ! وديني للطوارئ بسرعة وبداء يصارخ عليها و هنا سبحان الله شيلاء قدرت تلقى المفاتيح و فكته
بس قعدت تماطل و هي تلبس ثم يوم أمرها الله و وصلت لأوتفيت مناسب لوحده زوجها بيموت بعد شوي أخذت بول و طلعوا ، هنا شيلاء كانت تمشي ببطء و كل شوي تدخل لفه غلط و بول طول الوقت قاعد يصارخ و يقولها أسرعي طبعا بول إلى الآن يظن إن الموضوع مجرد حادثة
شيلاء قربت من المستشفى لكن بدال ما توقف عند باب الطوارئ راحت لمواقف بعيده و نزلت و فتحت باب بول و طعىْته للمره الثالثه ! بول أخيرا فهم وش قاعد يصير و قعد يدافع عن نفسه وطير السكين من يدها من رحمة الله ببول إن فيه ناس سمعوا اللي قاعد يصير و جو له
هنا شيلاء ركبت سياراتها و هجت لكنها يوم تعدتهم شوي تحسفت و رجعت و قعدت تحاول ببول إنه يركب السيارة الناس عيوا عليها و قالو هذا المستشفى وين بتاخذينه ! شخصيا أحس لو ما هالناس فيه بول ركب معها عادي !
جت الشرطة و أخذوا شيلاء و بول أخذوه للطواريء وعلى طول سووله عملية قلب مفتوح من حسن حظه إنهم لحقو عليه لأن يقولون لو متأخر كم دقيقة بس كان فارق الحياة لأن الطعنه كانت بالقلب و من حسن حظه برضو إن السكين اللي مع شيلاء كانت سكين مطبخ ما هي طويلة
الشرطة قدرت تأخذ العلم من بول و دروا إن حالته إستقرت بس قرروا أنهم يقولون لشيلاء إن زوجها قاعد يحتضر بيشوفون وش بتقول هنا شيلاء بدت تقولهم إن بول جاء من الشغل كذا ! لأن أكيد خيار إي أنسان إذا أنطعن يرجع للبيت من المهبول اللي بيروح للمستشفى ؟
قالو الشرطة أوككككي بس ترا زوجك حي و علمنا وش السالفة علمينا وش اللعبة اللي لعبتوها وهنا شيلاء تغيرت أقوالها تماما و تحاول ترسم الموضوع انه غير متعمد
بهالوقت الشرطة أخذت جوال شيلاء بيشوفون وش كانت تسوي بذاك الوقت طبعاً ما أتصلت على 911 أبد بس كانت متصله على شخص أسمه نيلسون ! هنا الشرطة قالت من أنت ولده يا نيلسون ووش سالفتك !
أتصلوا على شغل شيلاء و يسألون إذا فيه أحد عندهم أسمه نيلسون قالو الله الله وهذا رقمه و عنوانه الشرطة على طول توجهوا لمسكن نيلسون و يوم طقوا الباب عليه قالو وش تعرف عن شيلاء ؟ قال يعني أنتم مب جايين عشان تحقيق مقتل أناليسا !
قالت الشرطة وش انتي يا اناليسا ! قال حبيبتي اللي انفْتلت بولاية كونيتيكت قالو انت ليلك طويل امش معنا للمركز نتفاهم
خل نرجع شوي لعام 2001 يعني بعد سنة من زواج شيلاء و بول رغم إن الفترة هذي كانت فترة إزدهار إجتماعي و مهني لهالثنائي إلا إن بهالدنيا مافيه شي يكمل و العيب ماهو من الدنيا الصراحة الإنسان كائن تافه يحب القراده و النكد
شيلاء بهالوقت دخلت بعلاقة مع رجل معها بالعمل اللي كان أسمه نيلسون ! نيلسون جازت له شيلاء أول ما شافها يقول فيها كاريزما وطاقة غير الناس و بدأ يظهر أهتمامه فيها و شيلاء ما صدقت خبر و بدأت بعلاقة معاه على طول طبعا لا نيلسون يدري أنها متزوجة ولا بول يدري أنها تخونه !
لكن شيلاء ماهي الوحيده اللي عندها أسرار حتى نيلسون كان بعلاقة طويلة الأمد مع حبيبته أناليسا و كانو يخططون للزواج بالوقت اللي كان مع شيلاء ! و شيلاء ماكانت عارفه أي شي عن هالموضوع ومثل شيلاء بدأ بخيانة حبيبته بعد سنة من أرتباطه فيها ! التشابه بينهم عجيب !
أناليسا كانت أبنة مهاجرين فلبينيين و كانت العكس تماما من شيلاء كانت قريبة من الناس إيجابية من الأشخاص اللي إذا شفتهم تنبسط من خفة روحهم و برائتهم وكانت قريبة من أهلها الللي يتشاركون نفس المزايا المادية و المهنية اللي يحملونها أهل شيلاء
و أناليسا برضو كانت ناجحه يحياتها المهنية ناجحه لدرجة أنها ترقت و صارت شريكة بأحد شركات الأدوية اللي تشتغل و عندها مطعم و كانت تسكن بشقه فاخرة مطله على البحر و كانت مرتبطة بنيلسون اللي تحبه جداً،رغم ان اهلها واصدقاءها كانو يقولون عنه انه باردوثقيل دم بس هي تحبه،حياتها كانت جميلة
طبعا أناليسا كانت تشتغل مع شيلاء و نيلسون بنفس الشركة لين حصلت على عرض الشراكة من شركة ثانية بولاية كونيتيكت و بعد ما أنتقلت أناليسا بدأت علاقة شيلاء و نيلسون ، يقولون ان اناليسا و نيلسون ما اعلنوا علاقتهم بالعمل عشان كذا شيلاء ما كان عندها اي فكرة عنهم
و ما ادري عن مدى العلاقة بينهم لكن الاكيد ان شيلاء حضرت نزالة بيت أناليسا قبل تنقل ، و الخيانة ما هي أسوء شي سواه نيلسون بأناليسا أسوء شي سواه أنه هو السبب بدخولها عالم شيلاء المضطرب !
شيلاء بطريقة ما أكتشفت علاقة نيلسون بأناليسا هنا أنهبلت شيلاء و حست بالغدر و الخيانة ! و من كثر ما هي ضايقتن فيها صارت تسسولف لزوجها عن أناليسا ونيلسون بس كانت تسمي نيلسون جاك و وتشير لنفسهابمليسا !
أيه عزيزي المتابع بول اللي يبي يقفط الفضائيين كان قاعد يعطي زوجته نصايح كيف تكسب نيلسون و هو مايدري
و رغم شدة الصدمة عليها إلا أنها قررت تسمع نصايح منتدى حواء و تسكت عن خيانة نيلسون و تحاول تدرس أناليسا عشان تقدر تنافسها شيلاء بهالوقت كانت تراقب أناليسا 24 ساعة و عشان ترفع نقاطها بهالمنافسة هكرت إيميل نيلسون عشان تعرف تحركاته و إجتماعاته
و أوقات سفره و على أي طيارة و أي مقعد و تحجز المقعد اللي جنبه و كأن القدر جمعهم سوا ! حتى بريده الصوتي كانت مهكرته فتعرف مين يكلمه أو إذا كان فيه شي ضاغط عليه هالفترة بحيث تبدأ تكلمه عنه أو تخفف عليه لين جاء هكالنهار و بدأ نيلسون يحس أنه أختنق منها
جاها و قال يا بنت الناس أنا بنهي العلاقة خلاص و تراي عندي حبيبة و قريب بخطبها و أشوف مستقبلي معها ، نيلسون يقول إن شيلاء تقبلت الموضوع بصدر رحب و بشكل حضاري ، لكن مايدري إنه خلق قنبلة موقوته و شيلاء سوت الشي اللي مخليني أقولك قصتها اليوم شيلاء راحت لشقة أنأليسا و قتلنْها!
و لأن شيلاء شخص تعود على التلاعب بالناس توقعت أنها تقدر تتلاعب بالشرطة بعد ما سوت جريمتها راحت لأقرب تليفون عمومي و أتصلت على 911 و هذي المكالمة الحقيقية اللي حدثت
الشرطة جت بيت أناليسا و أنصدموا من وحشية الجريمة أناليسا مطعوىْه أكثر من تسع مرات على وجهها و هذا كان أول دليل للشرطة إن القانْل يعرف أناليسا شخصيا الوحشية هذي ما تصدر إلا من كره
مسرح الجريمة كان خالي من إي أدلة ، القانْل كان ماخذ حذره جداً ، لكن الشرطة قالو مستحيل إن القاتل ما أنجرح خاصة إن واضح أناليسا دافعت عن نفسها و كان فيه صراع الجريمة ما مرت بسهولة و الجريمة صارت بوضح النهار بمعنى إن القاتل مستحييل راح يطلع بدون ما يغسل و ينظف نفسه
حاولو يبحثون عن أي قطرة دم بالمكان و فعلا لقول على صنبور المغسلة
وهم قاعدين يحللون المكان جاء نيلسون و علموه باللي صار الشرطة يقولون ما أبدى أي ردة فعل و هالشي ما طمنهم من ناحيته لكن اللي زاد شكوكهم هو لما قالوله أنتظر عند الباب شوي و يوم رجعوا له لقوه نايم ! مين ينام بهالظروف !
صحوه وقالوله تراك متهم مشينا لمركز الشرطة قالهم نيلسون أنا اليوم كله كنت بالشغل روحوا تأكدوا من كميرات المراقبة لو تبون و فعلا الشرطة تأكدت إن نيلسون كل اليوم كان هناك و هالشي طلعه من دائرة الأتهام لكن ما طلع من دائرة الشك
نيلسون حتى أهل أناليسا و أصدقاءها يقولون مستحيل أنه هو اللي سواها صح أنه فْاتل الوناسة من يدخل مع البا لكن ماهو فْاتل وليش ليش يفْتلها مافيه أي دافع
بهالوقت شيلاء بدت تتقرب من نيلسون مره ثانية و كان عند أهله بهالفترة و كانت ترسله كوكيز وهدايا وفعلا حصلت على مرادها و رجعت العلاقة بينهم،خطة شيلاء للتلاعب بالشرطة نجحت لفترة لين جاء اليوم اللي هاجمت فيه بول و يعتقد إنها قررت قتل بول لأنها خايفة من أهلها أنها تتطلق للمره الثانية!
نيلسون بالتحقيقات الاولى معه ذكر كل حبيباته السابقات ماعدا شيلاء لكن لما عرفت الشرطة بعلاقتهم طابقوا DNA شيلاء مع الـ DNA اللي حصلوه على المغسلة و فعلا كان تطابق !
لكن بهالوقت كانت محاكمتها عن اللي سوته بزوجها جارية فقالو ما راح نستعجل خل نبني القضية صح بعدين تبدأ محاكمتها باللي سوته بأناليسا شيلاء بقضيتها مع زوجها حاولت تبني دفاعها بحيث تأخذ براءة بسبب الجنون و تدعي انها كانت بنوبة اكتئاب شديدة و كانت مدمنه على ادويتها
لكن المحكمة ما اقتنعت و حكموا عليها ٢٥ سنة الشرطة هنا قالو حلو ما هي رايحه لاي مكان و للاسف محاكمتها عن اللي سواه باناليسا ما بدأت الا بعد خمس سنوات
و كانك الى الان ما اكتشفت من نفسك عزيزي المتابع شيلاء اللي كان يجيها البيت مو اخوها !
شيلاء قررت إنها تمثل نفسها بهالقضية تيد بونتي ستايل
وطبعا لانها هي المحامية هي اللي كانت تستجوب الشهود اللي كان منهم زوجها
و حبيب القلب نيلسون
وخطة دفاعها كانت إن الشرطة ما تقدر تثبت و جودها بمسرح الجريمة و بالوقت اللي كانت الجريمة تحدث كانت مجرية مكالمة بمكان ثاني بعيد عن شقة أناليسا و إن صنبور المغسلة واحد من خمسين دليل أوخذ من مسرح الجريمة لكن هو الوحيد اللي خرج من غرفة الأدلة
طبعاً محاولتها البائسة هذي ما فادتها بشيء بل إن عدد من هيئة المحلفين يقولون الشيء اللي خلانا نتأكد أنها هي اللي سوتها لأننا كنا نسمع صوتها بشكل متكرر فشفنا التشابه بينه و بين مكالمة 911 و على هالأساس قلنا أنها مذنبة !
وجاء الحكم بأنها مذنبة و العقوبة 50 سنة سجن بمعى إنها راح تطلع من السجن وعمرها 110 سنوات شيلاء
شيلاء تقول ماهمني السجن عسل على قلبي بس ابي ابرك اسمي و كل شوي تقدم اعتراض و تطلع بمقابلات تحاول انها تشرح للناس اللي صار
شيلاء تقول ان نيلسون ما كان الا علاقة عابرة !
المحققة تقول شيلاء تخسي و تعقب والله انها دايخه عليه للان
زوجها بول يقولون إنه مستمر في نجاحه المهني لكن صدق أو لا تصدق إنه بعد المحاكمة حزن عليها و يقول تمنيت لو أني أنتبهت لوضعها النفسي و ساعدتها ! شخصيا ما أشوف بول مغفل سهل علينا الحين و حنا نعرف التفاصيل نقول وييين وش ذا الدبشة لكن أعتقد أنه كان بوسط معاناة شيلاء النفسية
و ممكن أنه بسبب أختلاف خلفيتهم الثقافية كان متسامح مع غرابتها , كان شخص طيب و حبيب و ربي نجاه الحمدلله و يقال ان علاقته باهل اناليسا الحين قويه ! وبدات العلاقة من المحاكمة لما جوه و قالو حنا آسفين لكن نشكر الله إنك أنطعنت عشان يجي حق بنتنا
كما ان الشرطة حاولت تحقق مع شيلاء بمفْتل زميلة اخرى لها بالعمل اسمها نانسي سميث اللي فْتلت بنفس الطريقة اللي فْتلت فيها اناليسا ، شيلاء تقول اتفهم ليش تشوفوني متهمه لكن والله ما سويتها
مقابلة شيلاء مع بيرس مورغان كاملة طبعا بعد المقابلة طلع و قال انها اخطر امراة قابلها !
rohanthomas.com
rohanthomas.com
و بس خلصت قصة اليوم اشوفكم الاسبوع الجاي ان شاء الله بقصة جديدة، تقدرون تتطلعون على القصص السابقة بالمفضلة وهذه احدها
جاري تحميل الاقتراحات...