بقالي فتره بتسأل سؤال معين كده وهو ان انا بذنب وارجع اتوب واوعد ربنا ان خلاص اخر مره وبرجع تاني انا خايف/ه يكون ربنا غضب عليا ومش هيقبل توبتي مع اني بصلي الفروض !!
وانا جاي اقول للمره الالف اجتهادك في العبادات حتى وانت بتذنب
دا دليل على إن لسه فيك خير انك بتغلط وعارف انك غلط ..

وبتحاول تجتهد فانت في نعمه تستوجب شكر ربنا عليها
في ناس بتغلط ومش عارفه انها بتغلط
في ناس بتغلط وعارفه انها بتغلط لكن متعرفش ترجع لربنا وتجتهد في العبادات
فمتيأسش اجتهد وقرب من ربنا حتى لو أذنبت ارجع واجتهد تاني
"والذين جاهدوا فينا لنهدينهم سبلنا "

بتكرّر الذنب ... كرّر التوبه زود اعمال صالحة
لمّا تقابل ربنا بذنوب كنت تتوب منها أو كنت بتحاول ومش عارف أفضل من إنّك تقابل ربنا بذنوب مكنتش بتوب منها
يقول ابن عطاء الله السكندري :
ولا تقطع يأسك وتقول ( كم أتوب وأنقض ) فالمريض يرجو الحياة ما دامت فيه الروح ..
اخيراً ..

احنا بنعبد ربنا مش عشان نحس بلذة أو نشوف تغيير
احنا بنعبد ربنا عشان احنا محتاجين لعبادة ربنا
محتاجين العبادة عشان الستر عشان البركة عشان تربية ابناءنا عشان التوفيق في الدنيا والقبول في الأخره
محتاجين للعباده عشان ربنا أمرنا بيها فنمتثل لأوامره ونعظم شعائره ...

وما عليك الا السعي والاجتهاد حتى يأذن الله لك بالقبول..
بس انت قول يارب ♥️🥹