صباح الخير جميعاً .. عندي كلام لعله يكون مفيد لأبناءنا الطلبه الجدد المبتعثين للخارج .. أولاً من الطبيعي إنك تشعر بالقلق لأنك خرجت من حدود الأمان المألوف (البيت و الوطن) و انتقلت إلى بيئه جديده و محيط اجتماعي جديد .. و لكن .. 1️⃣
هذه البيئه الجديده ستتحول إلى (أمان مألوف) مع مرور الوقت .. المشكله تكمن في الوقت الذي يسبق تحقق الأمان .. يعني شنو؟ .. يعني من الحين إلى أن تتعود على المكان اللي انت رايحله راح تتوتر .. و التوتر هذا راح يأثر على أفكارك بشكل سلبي 2️⃣
راح تشوف المكان اللي انت ساكن فيه صعب التأقلم معاه .. و راح تشوف الاسواق اللي حواليك صعب تتعود عليها .. حتى الشامبو تشوفه على الرف تحس إنك مغصوب تشتريه و انه ما ينفعلك .. و راح تشوف زملاءك إما ناشفين او اذكى منك وايد .. و تحس بالغربه أكثر و أكثر 3️⃣
ذكّر نفسك بأن المسأله مسألة وقت .. توترك هو اللي قاعد يصورلك كل شي بشكل سلبي .. كلم أهلك صوت و صوره .. حط اعمال دراميه كويتيه و انت قاعد بشقتك .. اول نقطة أمان تتكون هي شقتك .. بعدين السوبرماركت .. بعدين الجامعه .. و بعدين كل شي .. 4️⃣
في ناس متوترين مثلك هناك .. كلمهم .. ساعدهم يتحملون البدايات .. إطلع معاهم و استكشف المنطقه .. و تذكّر كلامي انك عادي تتوتر في البدايات .. بمعنى إنك (لا تعتبرها مشكله لازم تحلها) .. إعتبرها (مرحله زمنيه تمضي تلقائياً) .. و اللي قبلك مو أحسن منك أبداً .. 5️⃣
تأكد إنك قاعد تاكل زين .. اذا مو قادر تنام عدل تحمّل شويه .. اذا نومك صار اقل من ٣ ساعات لمدة اسبوع روح خذ حبه يكون فيها valerian root مع melatonin .. عند اللزوم فقط و بلّغ أهلك و لا تبدّع .. بس لا تاخذ اي شي من زميل او حتى دكتور الا لما تستشير اهلك 6️⃣
أمك علمتك تسوّي مجبوس دياي؟ .. ما تدري إن مجبوس الدياي يقلل الاحساس بالغربه بنسبة ٦٣٪ و في قول آخر ٦٤٪ .. 😂 إضحك و فرفش حتى لو تتطنز على روحك .. إنت قادر على هالبعثه و قادر على ما بعد البعثه .. ترجع بالسلامه يا بطل 👍
جاري تحميل الاقتراحات...