رائعة "لسا فاكر" ، بدأ رياض ب أدليب تعزفه الكمانجات بدون ايقاع واستخدم مقام العجم كمقام اساسي للاغنيه ، بعدين يخش صولو قانون جميل ووراه الكمنجات بتعمل تريمولو يديك جو فيه تشويق،بعدين تسلم الكامنجات علي نغمة الصول عشان يخش صولو قانون رائع ووراه الفرقه بتعمل نقر هي كمان ف جو رائع
يخلص الادليب ويخش ايقاع سنباطي ف دخول هايل مصاحب ليه الكمانجات بجمله بسيطه من العجم برضو ولكنها جميله وتعلق ف ودن اي حد بيسمع وتلاقيه بيدندنها ويكررها رياض كتير عشان يحفظها لودان الناس ويغير الايقاع يخليه مقسوم شويه عشان يرقص اللحن بعدين يقلب سنباطي لحد ما يسلم الست علي العجم
عشان تخش الست تقول جمله فخمه من مقام كله فخامه وكبرياء وتقول لسا فاكر قلبي يديلك امان من مقام العجم وهنا اختيار مقام العجم موفق تماما من رياض لانه ملائم لحالة الكبرياء دي وهنا اداء الست اسطوري اسطوري والجمله الموسيقيه ذات نفسها جميله جمال مش طبيعي ورد الفرقه علي كل جمله اروع
بدون اي مقدمات يحول السنباطي الي مقام الصبا الحزين عشان تغني منه الست كانت الايام ف قلبي وكمان استخدم ايقاع الواحده عشان يدي بطئ ل ريتم اللحن عشان يناسب حاله الحزن وتعبيرات جسد الست هنا مش ممكن شوف كدا بتحرك ايدها وجسمها ازاي وهي بتقول ياما هانتلك وكانت
تكمل الست علي مقام الصبا وتقول كلمه كلمه لما راح وتفضل مكمله صبا بعدين يجي رياض عند كلمة الصباح ويمد حرف الالف ويروح محول بياتي عشان تقول الست النهارده الحب والشوق والحنان من البياتي وتفضل مكمله بياتي لحد "كان زمان " يروح رامي حته حجاز كذا وبعدين يرجع عجم تاني ف "لسا فاكر "ويقفل
السنباطي يرجع للعجم من تاني ويعمل فاصل موسيقي رهيب ويستخدم ايقاع الواحده برضو والكلمنجات بتعمل تريلز كدا وحاجه رهيبه الحقيقه
تخش الست وتغني ياما حليتلك اهاتي من العجم وتفضل مكمله عجم لحد ما تقول "كنت تسمعها نغم "وتروح محوله حجاز واسمع رد الكمانجات وراها نقر ازاي شوف الحلاوه، بعدين تقول الست ناار وشوف الست بتقول نار ازاي والنبي تعيدها تاني وتسمع بتقولها ازاي مش ممكن الابداع دا
نيجي بقا لاجمل حته فالاغنيه من وجهة نظري، هنا اللازمه اللي بعد كلمة شويه تقدر تسمع فيها الربع تون اوي لانه هيحول من حجاز ل بياتي عشان تغني الست النغم رجعت حلاوته من البياتي فجملة فوق الوصف واحب اشير لاداء الست برضو ، بعدين تقول "النهارده الحب من البياتي لحد ما تقفل زي كل كوبليه
في تفصيله نسيت اقولها ف جملة يا ما حليتلك اهات قلبي ، اسمع كدا الست وهي بتقول اهاات وبتمد فالالف اي ملحن هيخلي الايقاع يسكت بس رياض خلي الايقاع يشتغل عادي ويعمل ايقاع واحده اشبه ب مارش عسكري ورا الست عشان يبقا طعم المد فالكلمه احلي بكتير ارجع اسمعها تاني بس ركز اوي عشان تاخد بالك
تخش الكامنجات ب رتم متصاعد وبشكل staccato او متقطع بشكل انيق وجميل مع ايقاع الواحده برضو ومن مقام الكرد بعدين يلعبوا بشكل legato او متصل عشان يتغير جو اللحن خالص من جمل متقطعه سريعه ل جمل انسيابيه شجيه ، عشان تدخل الست وتقول اللحن كله اهات كإنها فرقه كامله
تخش الست تغني الليالي من مقام الكرد بدون ايقاع وتكمل علي مقام الكرد لحد كلمة "متهني "وهنا اجمل تفصيله ،ف كلمة متهني تحول الست لمقام الراست واسمع رد الفرقه عليها واسمع حلاوة الربع تون ف تحويله هي الاروع والابدع طول الاغنيه فعلا
هنا بقا العبقريه ،السنباطي يقول نفس الكوبليه اللي كان قايله كرد من شويه ومن غير ايقاع ولكن يخليه راست وب ايقاع واسمع التسليمه الجميله اللي حول فيها السنباطي كل الالات لايقاع عشان تقول حاجه اشبه بمارش عسكري عشان الست تغني من مقام الراست بعدين ترجع بياتي ف "النهارده الحب "وتقفل عجم
هنا الست فحفله تانيه ارتجلت وغيرت الكلام وقالت (النهارده بعد ما فات الاوان ) بدل (النهارده الحب والشوق والحنان )
نسيت اقول انه ف" انت جيت مشتاق لحبي ولا لدموعي وقسايا" حول لمقام الحجاز ولمس نهاوند كدا بعدين رجع تاني بياتي ف "النهارده الشوق والحنان"
جاري تحميل الاقتراحات...