رتبها

"إذا قتلت بواسطة مسئولي الحكومة؛ فإن العائلة الحاكمة كلها سيقتلها الشعب!"
السلام عليكم وثريد جديد عن"الكاهن المجنون"
تابع الثريد👇

جريجوري راسبوتين، زير النساء، المعالج الروحي، والكاهن المجنون وزي ما تحب تسميه سميه، مين هو وإيه قصته؟

اتولد جريجوري راسبوتين لعيلة ريفية من سيبيريا في روسيا ف ١٨٦٩م، ومتلقاش تعليم كويس لدرجة إن عمره ما اتعلم يقرأ أو يكتب، وف صغره الناس ف قريته كانت بتتكلم عن إن عنده قوى خارقة للطبيعة، خلال سنوات شبابه بقى اتهوس راسبوتين بمباديء طائفة روسية أرثوذوكسية مرتدة، اسمها "خليستي"

كانت بتدعي إن فيه طريق واحد للوصول لله وهو طريق الأعمال الخاطئة، وطبعًا راسبوتين مكدبش خبر فبدأ يسرق وينصب ويمارس الزنا ويجري ورا ملذاته والستات لدرجة إن البعض اعتقد إن اسمه معناه" العاهر أو الشهواني"إلا إن المؤرخين اكتشفوا إن اسمه معناه"مكان التقاء نهرين"

وده كان وصف لمنطقة قريبة من محل ميلاده في سيبيريا.
راسبوتين لقى نفسه مش نافع لا ف دراسة ولا حاجة قالك بس أنا هبقى كاهن والتحق بدير"فيرخوتوري"لتأهيله وتعليمه لكنه برضه فشل وسابه، قالك بس أنا عايز أتجوز وف سن ال١٩ يا سناجل اتجوز بروسكوفيا فيودوروفنا وخلفت منه ٤ أطفال..لكنه مرتحش🤷

وف بداية عقده التالت ساب عيلته وروسيا وراح ع اليونان ومنها لفلسطين لزيارة الأرض المقدسة،
عجايب راسبوتين كشافي للمرضى وعراف بالمستقبل وصلته لعاصمة روسيا سان بطرسبيرغ واتعرف كمعالج روحي فيها وده كان ف ١٩٠٣م، سنتين بعدها شهرته وصلت لقيصر روسيا نيقولاي الثاني ومراته أليكسندرا،

واللي كانوا يئسوا من محاولات علاج ابنهم أليكسي من مرض سيولة الدم، وبطريقة معينة (يُعتقد إنها التنويم المغناطيسي) قدر راسبوتين يوقف النزيف وبكده كسب ثقتهم ودعمهم بالذات من أليكسندرا زوجة نيقولاي، وبين ١٩٠٦-١٩١١م استغل الساسة والصحفيين العلاقة دي لتشويه العائلة الحاكمة،

وإفقادها مصداقيتها والسعي نحو الإصلاح وراسبوتين بحسن أو بسوء نية بقى ساعدهم لما زعم إنه مستشار الإمبراطورة أليكسندرا وحاولت الصحافة تستغل القصة وتنوه عن علاقات راسبوتين وسلوكه الشهواني المنحرف، لكن الحقيقة تأثيره ع الأسرة الحاكمة مكنش يتعدى مجرد علاج ابنهم أليكسي😁.

وف ١٩١٥م دخلت روسيا القيصرية وجيشها بقيادة القيصر نيقولاي التاني الحرب العالمية الأولى وأسند نيقولاي مهام الدولة لمراته أليكسندرا ورغم تحذير راسبوتين بإن دخول روسيا الحرب فيه هلاك وكارثة البلاد إلا أن نيقولاي كمل مع جيشه، وهنا توطدت مكانة راسبوتين ف البلاط القيصري..

فكان بيعين وزراء الحكومة وموظفي الكنائس بل بيتدخل ف بعض أمور الجيش واللي فيها ما يتعلق بمصير البلد كلها؛ و كانت أليكسندرا بتعزل أي مسئول حتى لو وزير بيحاول يشكك أو يحذر من راسبوتين ورغم تحذيرات المسئولين من تأثير راسبوتين المفرط على الدولة إلا إنها قالت إنه مستشارها المقرب🤷.

الساسة والمسئولين هيسيبوا البساط يتسحب من تحتهم وهما ساكتين..إزاي؟!
وف ليلة ٢٩ ديسمبر الباردة من عام ١٩١٦م دعا الأمير فليكس يوسوبوف وكان معاه ابن عم/خال/عمة/خالة القيصر الدوق الكبير ديمتري بافلوفيتش، دعوا راسبوتين لقصر يوسوبوف ورجعوه للأيام الخوالي..رجعت أيامك يا دنجوان😂..

وراسبوتين عمال يسكر وياكل كيك لكن ده مش غريب، الكيك والخمرة كانوا متسممين برضه مش ده الغريب😁، الغريب إنه متأثرش بالسم كان مجرد دايخ بس..ولما زهقوا منه قالك بس لا يفل الحديد إلا الحديد، وراحوا مغربلينه بالرصاص ولفوه ورموه ف نهر نيفا اللي كان متجمد ساعتها..طيب والجثة؟!

متمش اكتشافها إلا بعد ٣ أيام، وهنا كانت المفاجأة الأغرب وهي إن سبب وفاة راسبوتين مش السم ولا ضرب النار لاااا، السبب كان إنه بلع ماية كتير ودخلت رئته😯!
وقبل وفاته، تنبأ راسبوتين بحاجة للقيصر نيقولاي التاني، متحققتش إلا بعد ١٥ شهر من وفاته؛ فكانت إيه النبوءة دي يا ترى؟

النبوءة بتقول:" إذا قتلت بواسطة مسئولي الحكومة؛ فإن العائلة الحاكمة كلها سيقتلها الشعب!"
وده اللي حصل فعلًا بعد ١٥ شهر لما تم قتل القيصر نيقولاي الثاني ومراته أليكسندرا وكل أبنائه على يد ثوار الثورة البلشوفية.
وبكده انتهت حكايتنا مع زير النساء والكاهن المجنون جريجوري راسبوتين.