خلال الشهرين اللى فاتوا انا كنت بدور على مكان جديد أشتغل فيه QA / Test Automation Engineer بعد ماحصلي layoff. عملت أكتر من 35 انترفيو فى شركات بأحجام مختلفة لحد مالنهاردة مضيت ال contract فكنت حابب اشارك التجربة في ثريد هنا
أول اسبوعين فى الشهرين دول انا قدمت فى 27 شركة بطرق مختلفة (ريفير من أصدقاء ومعارف - لينكدان - أو من موقع الشركة نفسها) أكتر طريقة جبت بيها انترفيوهات هيا الريفير 8 شركات كلمونى من أصل 10 عملولى ريفير والطرقتين التانيين كانوا 9 من اصل 17
الشركات اللى وصلت معاهم screening call كانوا 17 ، الشركات اللى بعتو تاسك كانوا 8 من اصل 14 شركة عديت فيهم ال screening، الغريبة ان موضوع التاسك دا ملوش قاعدة جالى تاسكات بتاخد ساعتين زمن وتاسكات بتاخد اكتر من 12 ساعة شغل!
فيه تاسكات محدد هوا عاوز ايه بالظبط واعملها ب language و tool ايه وانهى pattern وتاسكات مش محدده وسايباك تطلع اللى عندك طالما هت Achieve ال goal وبالمناسبة دى كانت اكتر تاسكات بتاخد وقت لأنك عاوز تطلع أفضل ماعندك
فيه أماكن بعد ال HR والتيكنيكال كانوا بيعملوا انترفيو أخير وبيبقى Manager, Behavior, or Culture Interview اي اسم من التلاتة بس كلهم فى الاخر دردشة يعنى وفيه ناس معملتش دا خالص واكتفت ب HR and Tech
فى اماكن البروسيس بتاعتها بتاخد وقت قليل من اسبوع ل 10 ايام من اولها لاخرها وفى اماكن بين كل انترفيو والتاني اسبوعين او اكتر
ال Title بتاعى كان بيختلف من مكان لمكان انا خبرتي تقريبا 4 سنين بس لسه مكنتش Senior ففيه أماكن اخدت نفس ال current title بالظبط اللى كان Mid level وناس كانت بتقول لا انت Senior بال standard بتاعنا وهندخلك interview Senior فكنت بمشى مع الاتنين عادى لان مكنش فارق معايا Title اوى
بعد 50 يوم بالظبط كانت المحصلة جالى 3 rejections و 5 Offers وفيه 6 من اللي دخلت معاهم البروسيس مردوش اصلا لا برفض ولا قبول! وانا محاولتش ابعتلهم اسأل الحقيقة ليه الدنيا وقفت
كنت بطلب ال expected salary نفس اخر مرتب ليا واوقات كنت بزود 10% على حسب هنزل الاوفيس ولا لا. 3 شركات بعتت اوفر بنفس الرقم بالظبط بس فيه شركتين واحده زودت 20% وواحده 30% من نفسهم عن اللى طلبته علشان ابقى في نفس شريحة الناس اللى معايا بنفس ال title ودول احترمتهم جدا
كنت واخد قرار ان اي Offer مناسب ييجى هقبله لأن مضمنش رد الباقيين وعملت ال start date بتاعى بعد شهر ولو جالى حاجة احسن قبل ال joining date ابقى اقارن
دا وقعنى فى حته ان اللى بيبعت Offer بيبقى عاوزني أرد فى يومين مثلا وانا مستنى ردود اماكن تانيه وفي نفس الوقت مش عاوز أضيع الفرصه فنا كنت قبلت اول واحد وال 3 اللى بعده مكنوش افضل فاعتذرت واخر offer كان أفضلهم دا خلانى اعتذر لأول مكان بعد ماقبلته بأسبوع لأن شايف الأخير أنسب ليا
كنت عامل List على Notion بكل الشركات اللى قدمت فيها وال status ايه ومعلومات جوا كل شركة من الانترفيوهات لان كنت بنسي اصلا عملت انترفيو مع مين ومين لسه فقبل كل انترفيو بفتح ال page بتاعة الشركة دى واشوف اخر status وصلتلها معاهم ايه واي notes كاتبها، ودا انقذني في اوقات كتير جدا
الأماكن اللي ال process بتاعتها بتطول اوي اللي بتوصل لشهرين دي خلاص مش هكمل فيها حتى لو أحسن، لأني بدور ع أفضل offer في أسرع وقت مش أفضل offer اقدر اجيبه في المطلق فهيا حاجة صعبة جدا خاصه لاني كنت قاعد في البيت وكان لازم الفترة دي متزدش عن شهرين لأسباب مادية
هبدأ في المكان الجديد كمان اسبوعين فمحتاج اروق ع نفسي بقى بأي مصيف في شواطئ أم الدنيا أفصل فيهم دماغي قبل مابدأ علشان كانوا شهرين فرهده وضغط عصبي رهيب الحقيقة 😂
جاري تحميل الاقتراحات...