رتبها

1-
دخلت تويتر بأسمي الحقيقي وصورتي الحقيقية ومكان الاقامة الفعلي .
في يوم من الايام تابعتني بنت زيها زي البشر اللي يتابعوني ,,
واتابعهم مافي شيء غريب ولا مريب ..
ماثأرت اهتمامي ...ولا اشغلت بالي البنت متفاعله في الردود واللايكات والريتويت وجلسنا كم شهر والوضع طبيعي
#قصة

يتخلل الردود سوالف جانبيه وثقافيه واراء واحيان ردود مضحكه كله طبيعي للحين . إلا ان في يوم ارسلت لي رساله على الخاص بدأتها بكل ادب ولطف
( اعتذر عن اقتحام الخصوصية )
لكن عندي موضوع مهم وشايفه انك تساعدني
كأنسان طبيعي وشاب عربي واصيل وفطريا الرجل يستمتع في مساعدة المرأة

ويستمتع بشعور الشهامة والرجولة
وللامانة دائما الشاب يريد ان يكون في احسن صوره امام الفتيات وبساعدها ليش لا
خصوصا اني بأسمي الحقيقي وبأسم القبيلـــه ...
لكن المهم هنا اني ماكنت اسعى لأي علاقه واعرف حدي وحد اي انثى معي
لـ أسباب تخصني قد اذكرها لاحقا

قلت لها حياك الله بالعكس نورتينا .. امرينا
قالت لي انت من المدينة الفلانية ( كما وضحت مكان الاقامة موجود في تويتر)
قلت نعم اختي صحيح .. قالت حاليا متواجد فيها قلت نعم
قالت انا ساكنه فيها بس اصلي من مدينه ثانيه واحتاج مساعدتك في بعض الامور

قالت انا هنا لحالي ومتورطه لي كم شهر اموري تعقدت ولا اعرف احد الا قريبه لي وماقدر اكلمها مابيها تعرف ظروفي حاليا
سألتها وين اهلك ووش وضعك وكيف لحالك عايشه هنا .. قالت بقول لك
زوجي كان موظف هنا في مدينتكم وصارت عليه مشاكل والان دخل السجن

طبعا تفاعلت معها وقلت الكلام اللي ينقال في هالموقف ..
اول ماجاء في بالي ..
ديون وحقوق مدنية والبنت تبي مساعدة عشان زوجها
ولم سألتها سلامات وش صار عليه ..
قالت قضيه ماتشرف ماقدر اقولها لك
افا .
قلت يعني في احد يطالبه بدم او عرض او مال قالت لا

اصريت اعرف قضيته لين قالت لي مسكو معاه ممنوعات ؟
.كم سنه حكموه .. قالت سنتين
قلت لها طيب عندك اولاد منه قالت لا
قلت فضل الله عليك واسع رتبي امورك وروحي لـ أهلك وشاوريهم وأذا راجيه من الرجال خير او شايفه امل انه يتعدل اصبري عليه

لعل يشمله عفو او يحفظ القران ويطلع وتتعدل اموره
وانتي اكثر انسانه تعرفيه لانك عاشرتيه وكشفتيه . واذا شايفة وضعكم متجة للطريق المنحدرة ماحد جابرك تطلقي ونصيبك بيجيك
الموضوع لك والقرار لك ..
قالت بدون تفكير وكانت تقاطعني مستحيل ارجع لـ أهلي والله لو يعدموه مارجع

طبعا الانسان الطبيعي يخاف من هالكلام وانا فعلا خفت مادري وش ظروف البنت .قلت اهلك يابنت
قالت والله مارجع لو انسجن معه ارحم من اني ارجع لـ أهلي
قلت ليه كل هذا خوف من اهلــك
وكنت وقتها مصدوم كيف في بنت تكره اهلها كذا

قامت تشرح لي اسباب معاناتها مع أهلها شيء هي تشوفه جبل وانا اشوفه رمل
تفاهات وامور النسويات
الطلعة والدخله والملابس والعباية واخوي وابوي .. واهلي ساكنين في هجره مافيها اسواق ولا مطاعم ولا طلعات
وانا كنت اتفاعل جدا مع احلامها البسيطة وانصدم من تفاهتها

واحيان اتحطم من حرمانها لاني حسيت انها تعاني
قالت لي تفاصيل عن اهلها واخوها بالذات ماقدر اذكرها هنا
- قالت لو اتطلق اهلي بيرجعوني غصب ..
قلت الحين انتي ماهمك ظروفك وحياتك هنا وزوجك ومصيبته وهمك انك ماترجعي لهلك ؟
قالت ايه

لحظة صمت ..
هنا ايقنت اني اتعامل مع انسانه ماهي سويه ولا ادري هل افكارها هذي ناتجه عن انحراف والا فعلا اهلها ومجتمعها بغيض الا هذي الدرجه
ماتبي تصدر احكام وانت ماتعرف المخلوقه ولا تعرف تفاصيل التفاصيل في حياتها وضغوطاتها .. لكن ماعجبني الشعور للامانه وصرت ند لأفكارها وقرارتها

بعد تفاصيل كثير ونقاش طويل جدا و حاد وصريح معاها
جاني قرارين
عقلي قال لي انجو بنفسك منها الانسانه تخوف وتشع حقد وحاسه انها مظلومه ومحرومه والتعامل معها مره متعب وصعب
وقلبي يقول ساعدها لعل وعسى انك تقدر تغير فيها شيء والبنت هي اللي جتك لاتتخلى عنها

هنا كان لازم اعرف انا وش دوري في هالقصة اللي ماارتحت لها
قلت لها وش المطلوب مني ؟
قالت
المطلوب منك انك توقف معاي فترة بس لين ارتب اموري هنا
زوجي له شهور الان ووضعي وظروفي صعبه
قلت لها ابشري اللي اقدر عليه بعطيك اياه
قالت انا ماني جايه ابي فلوس

قالت انا بسوي وكاله على كل شيء يخص زوجي وبطلع سيارته من الحجز وابي اطلع رخصه ولا اعرف اسوق
وابي منك تساعدني في هالامور لين يصلح حــالي ..
انت من اهل البلد وهذي ديرتكم اكيد تعرف احد بالدوائر الحكومية
وتعرف انا انثى وفي ناس ماتخاف الله ويستغلوني لاصرت لحالي

وابي تساعدني اتعلم السواقه لان البنات اللي يعلمون السواقه طالبين مبالغ تكسر ميزانيتي
قالت ابيك تعاملني مثل( اختك) تماما لين اعدل اموري وتعتبرني امانه في رقبتك ..
هنا لا اخفيكم ردة فعلي اقسم بالله بطني اوجعني من الخوف
والتوتر

اذا انها تكذب وتخرفني انا صدقتها وتعاطفت معها للنخاع
لكن في داخلي شيء يقول لي ابعد عنها
قلت له وش معنى انا من بين ملايين الناس؟
تعرفيني انتي او تثقي فيني عشان تطلبيني كذا ؟
يمكن اني استغلك او اخون ثقتك

قالت انا ماجيتك الا وانا واثقه فيك ومتابعتك بدقه ومتعامله معك
واحساسي مايخيب
قلت لها تويتر تريه مساحة للكذب والزيف كل انسان يسوي نفسه هنا راقي ومثقف ومحترم وفالحقيقة هو غير كذا تماما
قالت لي بالعربي يافلان بتساعدني او لا

هنا نقطة اللاعودة
اما انك تقول اعذريني ماقدر اساعدك
وانت تدري انها بتعلق برأسك سنين وماتحترم نفسك ولا تحط رأسك ع المخدة بثقه وماراح تشعر بالرضى وبتندم بس بترتاح
وانك تقول ايه وتتورط في شيء ماتدري وش هــو ولا نهايته ولا وش يعود عليك

خصوصا ان البنت زي ماوضحت لي علاقتها مع اهلها سيئة مره واخاف اني اتورط اني تسترت عليها او لعبت براسها
فالنهاية اهلها بيعرفون سالفة زوجها
او اهل الزوج انفسهم عارفين وبيتدخلون وبتصير قضايا يمكن اتضرر فيها
صرت في دوامة وفي موقف مانساه بحياتي مادري ارفض او اقبل

مخي الذكي قال امسك العصا من النص ساعدها في امور وريح ضميرك ولا تساعدها في امور خلك متزن
وقررت انه الحل المناسب ..
قلت في امور احاول اساعدك فيها واوعدك اني بسعى
وفي امور والله ماقدر نهائيا اساعدك ولا تطلبيها

اما امور الوكالة والدوائر الحكومية فأعتقد الله يعز الحكومه كل شي الكتروني واذا فيه شيء يستدعي المراجعة ابشري بكلم لك ناس يساعدونك
والسيارة بأذن الله بتطلع من الحجز اذا ماهي مصادرة في القضية
اما امور السواقه وتعليمها هذي اعذريني ماقدر والله
اللي اقدر اساعدك فيه المبلغ

قالت لي فلوس مابي فلوس ولا راح اخذ منك ريال ..
لكناذا احد من اهلك او قريباتك تعرف تسوق خليها تعلمني وبعطيها المبلغ الفلاني
هنا عزيزي اللي تقراء لو تعيش التفاصيل مثل ماعشتها انا راح عقلك يلنخم ماتدري هذي المرأة جريئة عزيزة نفس تستحي محرومه متمرده

لخمتني ولخبطت احساسي فيها وانطباعي عنها ..توترت معها حرفيا وتعاطفت لكن بدون تردد رفضت هذا الطلب جمله وتفصيلا
والاسباب يطول شرحها
اقلها ماعندنا وقتها بنات ساقن
ولا اقدر افاتح اهلي في مواضيع زي هذي لتجنب سوء الظن
ولا ابي انسانه مجهوله ولا اعرف شيء عنها تتقرب من اي شيء يخصني

انتهى الحوار المارثوني في اول يوم وانا في صدمه من اللي قريته وحسيته
البنت ماكنت تكتب حروف كانت تكتب رصاصات فيها كمية حقد تخوف
قلت لها ماراح يصير الا الخير وابشري بكل خير
ومجاملات وادعية وشكر وثناء
قالت لي بس باقي طلب

ممكن اخذ رقم جوالك عشان اتواصل معك؟
قلت لها تويتر يكفي انا تويتر في جوالي وشابك نت اربع وعشرين ساعه اي وقت ارسلي
قالت انا احيان ماعندي نت و الباقه تنتهي ولو يصير لي شيء ماعرف احد هنا
والله ماراح ادق الا فالضرورة القصوى

قلت طيب امري لله هذا رقم جوالي وش بتسوي يعني اخذت جوالي وش بيصير ؟
كانت من اغرب الليالي اللي عشتها بعد مانهينا اول محادثة استمرت ساعات وبتفاصيل ممله

احساسي ماكان مطمئن ابدا كنت خايف وماني مرتاح بس المرجلة صعبة وانا تورطت والتزمت اساعدها
اناظر في وجيه اخواني والعيال لعل احد يبتسم ويقول لي مقلبتك او ضحكت عليك او خرفنتك
والله اني كنت اتمناها ..
لاني فعلا تعاطفت جدا وكنت خايف وشايل هم

صحيت الصباح لقيت رسالة على الواتس اب .. هذا رقمي انا فلانه اللي كلمتك البارح ( قالت اسمها الحقيقي )
حفظت الرقم بأسم
( الله يستر ) حقيقة سميتها كذا
وارسلت له .. ( انتهى )
قالت لي وش اللي انتهى مع خمس علامات استفهام

. قلت يعني خلص حفظت رقمك
قالت ( يمه والله خفت ) على بالي انتهى يعني انتهينا وغيرت رأيك ماتبي تساعدني
عرفت هنا ان في اختلاف في الجيل والثقافة
وجلست اوضح لها وش معنى كلمة انتهى وانها زي ( تم ) وزي (ازهل )ـ في ثقافتنا طبعا

ذكرت النقطه هذي لسبب ان هالموقف الصغير فهمت منه انها انسانه مضطربه مره وماهي رزينه ابدا وخايفة وواثقه فيني
جلست انتظر منها اي طلب او خدمه اسويها لها بس عشان ارتاح ولا افكر فيها وفي همها وحياتها اللي اقتحمتني بين يوم وليله
ابي اسوي اي شيء يريح ضميري واهرب منها بلا عودة

جتني الساعة 10 ونص ثاني يوم فالليل تكلمني في تويتر وش صار في يومها
وكيف تهاوشت مع اوبر وكيف تحرش فيها واحد وهي رايحه ومشكلتها مع راعي البيت اللي ساكنه فيه
وانا افكر بيني وبين نفسي كيف عايشه لحالها
في مجتمعي وثقافتي هذي اكبر الكبائر .

اخذتني عليها الشفقة اكثر من اي شيء ثاني رغم ان سواليفها ممله لي كشخص
ماعجبني عالمها ولا واقعها ولا ابي ادخل في التفاصيل حياتها لانها كلها كأبه وتشكي وظروف
وانا حساس جدا ومانسى التفاصيل ..
كنت اتعمد اني اغير المواضيع كانت البنت بس تبي تفضفض وبس تبي تتكلم وللاسف كنت انا الشخص الغلط

ماكذب عليك انغثيت بكل امانه
لين صارحتها بكل جرأة رغم انه ماهو طبعي ابدا
قلت لها وش المطلوب مني الحين انا مابي اسولف معك كثير ابي اساعدك باللي طلبتيه وبروح في حال سبيلي
سكتت فترة وقالت ادري اني انكد عليك بس ارتحت لك وماعندي احد اكلمه الا انت

قلت كلامك يتعبني ولا بيدي شيء اساعدك نفسيا ولا اجتماعيا ..
خلينا في اللي تبيه مني ..
قالت عندي زيارة يوم الجمعة للسجن وبتفق مع زوجي ع بعض امور واعلمك وش يصير
قلت لها تمام لاني انا بسافر عشان عندي مهمة عمل ويمكن اغيب كم يوم
وانا لا عندي عمل ولا مهمة عمل بس ابي افتك منها

قالت لو احتاج شيء ضروري او تصير لي مصيبة قلت في هالحالة دقي قالت كيف تساعدني وانت بعيد قلت بكلم اخواني وعيال عمي لك
قالت كلمه اوجست منها خيفه
( الله يخليك لي انت واخوانك وعيال عمك )
خوانك وعيال عمك فوق البيعة
تقصد الله يخليك لي
هنا جتني دوخه مع تنهيدة البنت هذي ماهي مصفيتها

قلت لها الله يخلي لك زوجك واهلك هم اللي بيفدونك بأرواحهم والا انا يومين وبروح عنك
قالت لي اول ماترجع كلمني
قلت لها انتي اللي لا احتجتي شيء وخلصتي امورك مع زوجك علميني واذا بيدي شيء بساعدك مابيدي شيء بعتذر منك

عقلي يقول احظرها من كل مكان واسحب عليها
وقلبي يقول يارجال والله مافيك خير ساعدها
انتظرت لين يوم الجمعة ليلا وارسلت لها في تويتر رسالة وماردت حول 3 ساعات
ورجعت وارسلت لها رساله على الواتس اب قلت لها بشري وش صار معك ومع زوجك

قالت لي رجعت من المهمة قلت نعم ..
قالت لي وش سويتو وش طبيعة مهمتك وعملك
انا انفعلت هنا وقلت لها انتي تستهبلي ؟؟
موضوعنا اني اساعدك مالك علاقه بحياتي ولا تفاصيلها
قالت لي ماصار شيء
زوجي يبتزني يقول لي تبي اسوي لك وكاله
جيبي لي اشياء ممنوعة فالزيارة الجاية

بدون مقدمات قالت لي وبدون ماتمهد لي صعقتني فيها كذا
وكان الحوار كتابي بينا مادري وش حالتها وهي تكتب ..
هنا لو اوصف لك من هنا لبكره شعوري اقسم بالله ماقدر اوصفه
لكنه شعور ماراح يتكرر في تاريخي صعقت
و حسيت اني طحت في وحل خنازير او حاوية نفايات
وش هالبشر

عجزت ارد ماعرفت وش اكتب
شرار وافكار مثل البرق في راسي هي ضحية ؟
هي تستدرجني وتلمح لي تبي ممنوعات .. هل هي مدمنه ؟
معقولة مسرحية
والا هالانسانه مظلومه للدرجه هذي واللي حولها فعلا كذا
تلاطمت في رأسي انواع واشكال التساؤلات

للامانه عقلي ماصدقها قلت هي كذابه وتبي شيء ثاني ؟
وقلبي تعاطف معها لو يطلع فعلا هذا واقعها وكلامها صحيح ..دمار نفسي
قلت لها بدون تفكير تطلقي وارجعي لهلك والله مافي امرض منك الا زوجك
وقلت اذا فعلا زوجك طلب هالطلب وانفتحت على زوجها بكل ماتتخيل من سب وقذف

ولو ترجعي تحت رجول اخوانك اشرف وارجل من هالانسان
والحق ماهو عليك علي انا اللي دخلت معك
لكن هنا انتهينا فعليا لاعاد تجيني ولا ترسل لي عشان ماتشوفي الوجه القذر مني
وعطيتها حظر في تويتر وحظر لرقمها
وصار التعاطف صفر

جتني من حسابات ثانيه ودقت من رقم ثاني
وكلهم حظرتهم .. وحماية للتغريدات وقفلت الرسائل الخاصة في تويتر ..
جلست على هالحال ولاكلمت احد نهائي في هالسالفة ابدا
لين جاني اخوي قال لي في بنت في تويتر تكلمني عنك
وتقول لي خليه يفك الحظر وش مسوي فالبنت انت
البنت ذاله نفسها عندي

حقدت عليها زياده وامسك اخوي واوريه محادثاتها واحلف له واعلمه وهو يقول مصدقك
لين قال لي يمكن البنت صادقه ساعدها وش خسران انت
اكسب الاجر واتركها ..
قلت لـ اخوي نصا ( البنت هذي مريضه )
قال مايخالف دامه جتك وتزهلت لها وعلمتك بكل شيء ساعدها وانهي موضوعها

رغم اني واثق باحساسي ان البنت وراها نكبه
شلت عنها الحظر في تويتر .. وقلت لها الجوال انسيه
المطلوب مني وشو الحين ؟
قالت اللي وعدتني السيارة والوكاله ..
قلت وغيره قالت مابي شيء
قلت تحلفي بالله وتوعديني اذا سويتهم ماعاد اشوفك
وحلفت ووعدت .

كم يوم
اتصالات وواسطات وروح وتعال وجيب وكلم فلان اخذت لي اسبوعين لين قدرنا نطلع السيارة
عرفت تفاصيل كثيرة عن زوجها ووضعه واسمه وقبيلته اما هي ماكنت ابي اعرف عنها شيء
شلت الحظر عن رقمها وارسلت لها رساله قلت السيارة وطلعت .. قالت جيبها لي عند البيت

دقيت على راعي سطحه حملنا السيارة بعد ماتأكدت انها شغاله وامورها تمام
واخذت جواله وارسلت لها ارسلي اللوكيشن من جوال راعي السطحة .. وقلت لراعي السطحه نزلها لها فالمكان اللي تبيه

بقول لك شعوري بكل امانه ولا يحتاج اني اكذب هنا ..
والله ماكنت احس بفخر ولا شهامة كنت احس بقهر واني اسوي شيء لا أجر فيه ولا مثوبه ولا شكر
شيء مغصوب عليه وبدون نفس متضايق بس ابي افتك .. واشيل هالهم اللي هجم علي
ارسلت لها باقي الوكالة عجلي في موضوعها ماباقي شيء عن الاجازه

اختفت اسبوعين كاملين مارسلت لي شيء نهائي لا في تويتر ولا واتس .. وبعد اسبوعين الصباح ناظرت جوالي
الا هو ينور كنت حاطه صامت الا وهي تدق اتصال
عطيتها مشغول وفتحت الواتس مامداني افتح الا وهي تدق ثاني مره ..

اعطيها مشغول وهي تدق
قلت فيه بس اكيد فيه شيء
رديت بصوت غاضب جهوري ( نعم )
ماتكلمت
قلت نعم وش عندك داقه ؟
ودي اسبها بس ماقدرت انتظرها تقول وش عندها
شوي الا الشهيق والدموع وصوت الخشم والسيلان
اعرف بكاء الحزن من بكاء القهر من بكاء الانهيار
البنت كانت منهاره شهقاتها منازع روح

لخبطت اعداداتي
قلبي للحين مع ظروفها ووضعها وحالتها وانسانيتها ماوده يزيد عليها بطلت استوعب اي شيء من عقلي صار الموضوع مشاعر وانسانيه فقط سقطت كل قناعاتي
عقلي وقف مع صوت بكائها وشهقاتها بطلت استوعب اي شيء

مايوصل مخي اي قرار غير قشعريرة وخضوع واستسلام تام لمشاعرها للامانه تأثرت
حاولت اقاوم وادعس عليها
بس ماني قادر اخفي تعاطفي .. قلت ليه تبكي الحين وش فيك ناقصك شيء
ماترد هي وانا ماسك نفسي لا ابكي معها .
غلبتني شهقاتها بكل امانه ودي اقول لها اي شيء بس تسكت

قلت لها كلام يناقض كل معتقداتي وقناعاتي بس ابيها توقف شهقات
لين ماقدرت اتحمل وهي عيت تسكت قلت اقسم بالله لو ماتوقفي بكاء
اني لقفل ولا عاد تشوفيني غير يوم القيامة وبيحاسبك ربي على اللي بليتيني فيه
هنا قالت خلص بسكت

حاولت الطف الجو واغير جوها ليس حبا فيها بل رحمة لروحي وروحها
وفشلت لاني كنتً متأثر
قلت لها هدي واذكري الله وعلميني ليه تبكي كذا
بدأت تتكلم وواقعها واحتياجتها واكثر نقطه ذكرتها ( الامان ) ماتحس البنت فألامان ابدا تكره الرجال ولكن تحتاجهم

كانت تقول اني الوحيد اللي شعرت معه فالامان الفتره الحاليه وانها خايفه تخسرني ؟؟؟؟؟
. تخسريني ،، قلت وتخسريني ليه مين انا في حياتك لاتنسي اللي بيننا وشو والاتفاق والوعد
قلت لها بالحرف :
اعتبريني محطه في حياتك توقفتي فيها ومشيتي

لو اني متعاطف معك وهمني امرك بس انا ماقدر ولا ابي استمر معك ،، ولاتعلقي علي اي امل او اي طموح لاني اول واحد بيخذلك فالعلاقات ،انتهت اول مكالمه بيني وبينها
وكل ماتقرب مني البنت في نقطه سوداء تكبر في قلبي
وانطفاء في وجهي وتذبل ملامحي وتغير مزاجي وانسداد شهيه وارق

كانت معها طاقه سلبيه بشكل طاغي اثرت علي وانا مالي ذنب لا فيها ولا في حياتها نكدها وشهقاتها وحياتها ولجؤها لي ارهقني واحتل عقلي وتفكيري ،، لكن كنت لازم اضع حد
صحصحت من اللي انا فيه وعزمت اني اكلمها بكل صدق وصراحه . ارسلت لها على الواتس رساله اذا روقتي و جوك زان كلميني ،،

ارسلت لي ودقيت عليها
قلت لها اسمعي انا وضعي الاسري كذا وحياتي كذا وانا كشخص كذا. اذا ناويه او تفكري اني بكون معك في علاقه او بستمر معك تراك اكبر واهمه فالدنيا
وهالكلام ماهو فترة وبكره بيتغير هالكلام عقيده عندي وبحارب عشانه
ولاتدقي علي الا في ظرف قاهر وفي الموضوع اللي بيننا

تفهمت او ماتفهمت عرفت او ماعرفت
ماكنت ادري
لكن نفسي حملتني الغلط وقمت اجلد نفسي اني ماني ضحيه اني انا الجلاد
وانا اللي عطيتها المجال وانا اللي كنت متعاطف معها وانا اللي حاولت ارضيها وضغطت ع نفسي اني اكون في قمة الرجولة والادب معها
واسوي لها كل مافي طاقتي

وكان اسلوبي جدا مميز معها في انتقاء الكلام والاهتمام الزايد في مشاعرها لظرفها ولمعرفتي ان البنت رايحه لعالم مجهول ،،
وقررت اني لازم انهي ارتباطي فيها نهائيا .
وبعد مشاورات ، كلمتها اني انا وياها خلاص انتهى كل الامور اللي بيننا وانها لازم تبعد عني وتواجه حياتها وقرارتها لحالها

وكنت صامل وجازم وهي حست بهالشيء وقالت لي اللي تشوفه
قلت لها لو بتموتي والوحيد اللي بينقذ حياتك في هالدنيا انا لاتجيني ولاتفكري حتى
ورحلت انا .. وغيرت حسابي في تويتر وطلعت لي رقم جديد والغيت رقمي الاول

سنه سنتين ثلاث سنوات عدت وتناسيتها والتهيت بحياتي وظروفي ..
بعد ثلاث سنوات جتني رساله على الواتس اب سلام عليكم كيف الحال
،، طبعا رديت بكل ثقه مرحبا ومجاملات قلت لها مين معي قالت انا فلانه

نقاشنا الاول كيف جابت رقمي
واكتشفت لاحقا اني جايب العيد وماعندي الخبره
علمتني كيف جابته
واني غيرت رقمي و هي عندها الواتس حقي القديم لما تجي ترسل يطلع لها لقد غير رقمه الى رقم اخر ويحطون رقمك الجديد وهي حافظته وعارفه كل مواقع التواصل اللي ادخلها لاني جهة اتصال عندها

وضايفتني ومراقبتني وجايبه معلومات بالكم عني
قالت لي كيفك
قلت انتي اللي كيفك صدمه انك عايشه للحين ،مع ابتسامه ،،
قالت ( ابشرك ) تطلقت وتوظفت واسوقاواروح واجي واهلي تقبلوا وضعي
. قلت لها مازلتي في مدينتنا قالت ايه وماراح اتركها حبيت الجو والبلد والناس ( ويكفي انت فيها ) 💔

قلت لها وش عندك هالمره لايكون تبي تتزوجي وتبيني ولي شرعي لك ،،
ضحكنا دقايق
لين قلت لها جد وش عندك جايه لي
قالت وانا هنا اقتبس ( تراني مارحت عنك عشان ارجع لك انت معي كل يوم ومتابعتك في كل مكان )

لاحول ولا قوة الا بالله هذا الكلام اللي يخوفني
قلت وليه تتابعيني في كل مكان وش تبين . قالت لي مادري بس انت عندي غير الناس ولا احس بألامان والراحة الا معك
قالت انا ماراح اخرب فيك شيء بالعكس انا ابي علاقه معك جاده وابيك انت من بين الناس

قلت زواج مثلا ؟ قالت ايه وش المانع ..
قلت الموانع قد شعرك رأسك :
اولها ابوي وامي ماراح يوافقون نهائيا ولا راح يسعون معي في حبة شعير
،، ورضاهم والله عندي اهم منك ومني ولا راح اخسرهم واغضبهم عشان نفسي فضلا اني اخسرهم عشان مخلوق ثاني .. تبي غيره والا يكفي

قالت مع الامور بتتعدل والاهل بيقتنعون شوف اهلي اقتنعوا وتقبلوا حياتي وانت لو تحاول صدقني بيوافقون لو شافوا اصرارك
هنا لحظه ؛ كيف اوصل لها اني مابيها كعلاقه اصلا فضلا عن زوجة واني ماعندي قبول لها في حياتي لو بنسبة ١٪؜

مادري كيف اقول لها انتي ولا شيء بالنسبه لي عاطفيا ولا املك لك اي مشاعر الا الشفقة والرحمة والتعاطف
واني من عرفتك وانا كئيب ومتوتر وخايف وكاره الدنيا واللي يصير بين البشر من قذارة وانحطاط وخصوصا بين الاهل
ماودي اجرحها بس كان لازم اوضح ولا اغلط الغلطة الاولى واجاملها

قلت لها انا مابيك ولا عمري فكرت فيك ونفسي ماترضى اني اكون معك ولا ارتاح بمراسلاتك معي كيف برضى اعيش معك وتفاصيل ماودي اذكرها ،،
هنا انسى كل اللي راح وافتحوا صفحه جديده
البنت تحولت من انسانه الى ثعبان ماينفث الا سم
وحقد وغل

سباب ولعائن وشتائم وانت فيك وانت مافيك انا تعلقت فيك
والحين كيف اعيش انا ؟
قلت لها انا مالي علاقه في مشاعرك ولا حبك ولا قلبك
وهي ماهي ازرار اضغطها فقلبي حب فلانه ولاتحب علانه القبول من الله وانا ماتقبلتك كعلاقه ولا مشاعر ولا اقدر اكذب عليك واجاملك على حساب نفسي

قالت ليه رديت علي وليه عطيتني مجال كل هالفترة وكنت مهتم فيني وتفاصيلي والحين بعد ماصارحتك بكل شيء بحياتي وكشفت لك نفسي وعيوبي تبي تتركني ؟ اتركها هل انا فعلا كنت معها عشان اتركها
نسخت كلام قديم لي : كتبته لها واللي هو انها لاتفكر بعلاقه معي واني اول شخص راح يخذلها في هالموضوع

وصار الموضوع حوار طرشان هي تبي ومصره ومتحفزه
وانا مابي ولا اقدر ابي ومن سابع المستحيلات اني ابي
ولو صار المستحيل الثامن وتقبلتها اهلي ماراح يتقبلون ولا مجتمعي وراح اصير منبوذ ومثار للجدل
حاولت الانسانه للامانه ايام واصرت ودافعت عن نفسها لكن كل محاولاتها بائت بالفشل

الحل الاخير قالت طيب خلك معي كذا ادق عليك ونسولف كأصدقاء انا احتاجك بحياتي
رفضت رفض قاطع واني ماراح استمر ولازم تبعد عني
فترة ويتحول كل حبها لي اللي كانت تدعيه واحتياجها مع الوقت ومع اصراري الثابت الى كره وحقد وانتقام حطت حرة مجتمعها وفشلها وحياتها التعيسه فيني

اسابيع وبدأت المرحله الثانيه
والله اني قريت من هالمخلوقه كلام ماعمر احد قاله لي او تجراء يقوله لي لو على سبيل المزح
اقذر ماتتخيل من كلام بكل انواع القذف تكلمت علي بأشيع ماتتخيل من الفاظ انواع واشكال التهديد والوعيد
هددتني بكل شيء فكرت فيه او مافكرت فيه

وانها تعرفني وتعرف شكلي ووين ساكن ومعلومات اسرتي عندها واخواني احيان كنت مااهتم واحيان كانت تنال مني وتقهرني واحقد عليها بس مابين
كنت اقدر ابلغ عليها كلامها موجود وصريح
لكن ماقدرت مابي ابتليها ولا ازيد حياتها تعاسه

كنت حاس اني غلطان لاني عطيتها مجال شهور وانا اتكلم معها في تفاصيل حياتها
واحاول جاهدا اصلح اللي اقدر عليه يمكن هذا غلطي اني خليتها تحبني باهتمامي وتفاعلي مع تعاستها
قلت لنفسي من الكلام والتهديد ماراح اسوي لها شيء
خليها تعبر وبتحمل انا استاهل

لكن لو تطور الموضوع الا فعل وضرتني فعليا او اي شخص ينتمي لي كنت خايف من ردة فعلي اني راح اكون اكبر كابوس في حياتها وحياة اهلها
فكرت اكلم زوجها السابق وماقدرت
حاولت اتواصل مع اي شخص له علاقه فيها يكفيني شرها ويكفيها شري لكن فشلت

كان هدفي الوحيد اني ماتواصل معها نهائيا لان اي تواصل يعتبر نجاح لها وتفكر اني ضعفت او غيرت رأيي وان اسلوبها جاب نتيجه معي تجاهلي لها كان يحرقها ويزيد غضبها علي
والحين مرت اكثر من 6 شهور على تجاهلي لها
ومازالت ترسل وتحاول وانا صامل

لكن حياتي ونفسيتي تغيرت بعدها صرت مكتئب ومنطوي ماحب التواصل مع الناس واخاف من اي انثى تتابعني او حتى رجال يكلمني انها هي
ابعدت عن كل مواقع التواصل لا سناب ولا تيك توك ولا تويتر عزلتني عن الناس والتواصل وغيرت فيني وفي ثقتي وانسانيتي اشياء كثير

احيان اقول اني ماغلطت وان الله يعلم بنيتي
واحيان اقول اني غلط عليها وعطيتها مجال بحياتي وعطيتها حنان واهتمام زايد وانا اتحمل ذنبها لانها كانت مكسوره وتايهه وحصلت عندي اللي تبحث عنه دوامه وتعب وذنب وقهر عشتها وللحين اعيشها

احس اني تحملت ذنب وحياة انسانه مالي اي علاقه فيها ولا في طفولتها ولا تربيتها ولا قناعاتها ولا تعامل اهلها وزوجها معها
ودي احقد عليها وانتقم منها بس اعجز اللعب هالدور واعرف تبعاته علي في السنين القادمه
وودي اطلعها من راسي وتفكيري ومازلت احاول ويارب اني انجح

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة