السنوات الماضية كنت اشتري دفتر واسجل فيه المهام اللي ابغى انجزها بس اكتشتفت ان الطريقة غير عملية لي الدفتر مو معي دائما واحيانا احتاج ابغى اكتب ومثلا مالقى قلم او اي سبب واكثر شئ ناسبني هو نوت الجوال كل شئ تتوقعونه اسجله فيه وفعلا ساعدني على الانجاز بتكلم لكم شوي ايش اسوي
بقول لكم طريقتي مو مثالية لكن انجزت اشياء كثير من خلالها اولا اسجل المهام بالاولوية اهم شئ وضروري اسويه اكتبه بالمقدمة وبعدين مهام ضرورية بس عادي انجزها بعدين وبعدها مهام اضافية اذا انا عندي الوقت لها باي يوم بالسنة او بالشهر اسويها
وش اللي خلاني اقول لكم عن هالطريقة امس مثلا جلست اتفرج على مهام كاتبتها انجزها باي يوم بالسنة وكان من ضمنها تجديد بطاقة لبنك قديم من زمان ماستخدمته بس فيه مبلغ وابغى المبلغ لكن مو محتاجه له ولقيت ان اليوم جدول العمل مناسب ماعندي ضغط اجتماعات وفيه مجاب لانجاز هالمهمه فحطيتها
والحمد الله خلصت من المهمه اليوم ، ايش اكتب برضو حسابي هذا اكتب كل الثريدات اللي ودي تستفيدون منها او منتج شريته وحابه اشاركم تجربتي الكامله بالصور عنه ، برضو اكتب ايش محتاجه اشتري هالشهر اللي يعرف حسابي مهتمه مره بمجال التسوق ودايم اقول راتب مخصصته للطلب اون لاين تحديدا ....
ايضا اكتب مشتريات للمنزل خصوصا من السوبرماركت للشهر او مثلا لطبخه معينه ، اكتب ايضا كل مواعيدي ومراجعاتي، اكتب مهام العمل (الوظيفة ) اللي لازم انجزها غدا وتكون غالبا باول القائمة ، تجيني شغالة كل اسبوع حاليا مره بالاسبوع اكتب ايش ابغاها تسويها اشياء غير عن التنظيم الروتيني
ويمكن تستغربون حتى الاماكن الجديده اللي ودي اجربها او التجارب اللي ودي استكشفها تكون موجوده بالقائمة عندي ، احيانا اسم حلقة بودكاست اسمعها او كتاب ابغى اقراه او طبخه ابغى اجربها ، حتى اصلاحات المنزل مسجله 😂 شئ خربان شئ نحتاج نشوف ضمانه وغيرها
هالطريقة ريحتني كثير القائمة تتغير بحسب تغييرات الحياه لكن بشكل عام في اشياء دايم موجوده كتبت الطريقة عشان تستفيدون منها يمكن احد مثلي مانسبته الاوراق والمذكرات والجوال يكون مناسب اكثر مثلي وممكن تستفيدون من فكرة التقسيم لان اكثر شئ احبه لما اشيل واحذف بدون شخبطه وحوسة ورق
جاري تحميل الاقتراحات...