عمري ما كنت مؤمن ان العلاقات بتبقى خطوة قدامها خطوة. عندي ايمان كامل إن اساس العلاقة بيبقى اني ادي قدر استطاعتي، وابقى مؤمن ان اللي قدامي بيدي قدر استطاعته. لو بيقدم اقل مني ف ده معناه ان ديه قدرته وده ميخلنيش اقدم اقل برضه.

البوصلة الأساسية في العلاقات في رأيي هي اجابة السؤال ده: هل اقدر اعمل اكتر ومش بعمله؟ لو أه يبقى محتاج اقدم اكثر. ممكن اجابة السؤال في اوقات منهك فيها تكون اني مش بقدم حاجة خالص بس مقدرش اقدم اكتر برضه، ساعتها بسامح نفسي ومش بحس بالذنب.

احيانا كتير بلاقيني بسحب نفسي من علاقات من غير قصد. لما الاقي اجابتي على السؤال السابق إن لأ، انا فعلا بقدم قدر استطاعتي، وان الطرف الاخر مش بس مش بيقدر، لأ هو بيلوم اني مش بقدم اكتر، احساس الذنب بياكلني ف بنحسب خالص، اكتشفت ان الدايرة ديه حصلتلي في علاقات كتير ومش عارف ايه الحل.