رتبها

اولا : انا بقول كلام سياسي علي اقتصادي .. مش كلام اقتصادي بس .. لان السياسة بتأثر علي الاقتصاد
ثانيا : انا مش مهتم اثبت لحد حاجة .. انا بتحدي نفسي اصلا وقدراتي ومعارفي وبشارككم التحدي .. ف لو طلعت غلطان يبقي محتاج اراجع منهجي ومعارفي ولو صح براجعهم برضه بس علشان اتطمن 😀

اول حاجة … لو قسمنا عصر السيسي لمراحل .. ف في مرحلة الاستكشاف والتجربة .. بتاعت مشاريع العربية بثلاجة 😀.. دي كانت من يونيو ل حد اخر ٢٠١٥ كده بعد قناة السويس بشوية .. ايون .. قناة السويس والمؤتمر الاقتصادي كانوا اكتشاف وتجربة .. المرحلة التانية اللي من اخر ٢٠١٥ ومروراً بالتعويم

ودي بقي استمرت شوية ونقدر نقسمها هي نفسها لجزأين .. جزء التعويم وما بعده لحد .. اخر ٢٠١٧ كده او الجزء الاول من ٢٠١٨ وبعدين ٢٠١٨ بقي لحد الكورونا ودي الجزء التاني
حد يقولي طيب يا كابتن تمنياوي وانت قسمت المراحل دي بناء علي ايه ؟
اقوله انا سعيد بالسؤال ..علي قرائتي لخطابه السياسي

المهم .. عكس بقي كل الكلام بيجي جاهز وعارف وشاطر والمخابرات عارفة كل حاجة وكل الهلك ده .. الراجل مكنش مستعد لحاجة غير الامن والاستقرار .. دي شغلته .. فهو ده اللي هو بيعمله بشطارة جداً وخبرة وسيطرة .. في الاقتصاد ابتدا يجرب حاجات زي قناة السويس .. بس مكنش في تصور كامل

المهم يعني في المرحلة التانية اللي هي بعد قناة السويس ابتدا يكتشف الحقائق ادامه .. شبه دولة .. بتصحي الصبح تحتاج اكل بس كل يوم ١٠٠ مليون دولار (القيمة المحلية للسلع +الاستيراد) وان محتاجة تسكن وتشرب مياه نظيفة وطبعا هو كمان كان فاهم من بدري مشكلة الكهرباء لانها واضحة

هو عنده حاجتين :
مش بيرضي بالطلسأة .. عايز كل حاجة نظيفة ومعقولة وتليق بمصر
وكمان يعتقد ويؤمن ان مصر تعمل المستحيل
طبعا هقول ادام هو مخيش في ايه كمان 😀
فهو قرر ان عايز يخلي الاكل والسكن والطرق والمواصلات وكله يليق بالناس .. ده قرار سياسي واضح .. يتنفذ ازاي .. هنتكلم

فالمهم علشان مطولش عليكم .. في المرحلة التانية دي قرر انه خلاص .. هيبني كله ويصلح كله ويشتغل علي كله .. ولان محدش معاه علي الخط وبيخلص وبينفذ .. فعدينا ب ابراهيم محلب وبعدين هشام اسماعيل وبعدين لقي كل ده في الطريق كده مش نافع .. ف الجيش بقي اللي بينفذ ودخل كله

الجيش واي مؤسسة لما بتحقق نجاح .. بتتغول وتتوسع .. ف هي لما بتنجز مشروع بتدخل غيره وغيره وتتوسع .. دي طبيعة المؤسسات .. لان مش فرد بيستفيد .. المؤسسة كلها .. وهي اللي بتنمي .. ف باختصار العيب مش في مساعدة الجيش في التنمية … الغلطة في التدخل في انشطة تانية زي الفنادق مثلا

الناحية التانية .. بقي عندنا بيروقراطية ٥ مليون موظف بيزيد مرتبهم وفلوسهم .. وفي كمان مشاريع كثير .. وانفاق كثير .. حكومتنا الجميلة بتصرف كل يوم الصبح ٣ مليار جنيه … بس المشكلة ان اي صرف مش عليه رقابة . مش علشان السرقة .. لكن محدش وقف وراجع .. كله علشان البناء والتنمية

ودي الغلطة التانية
وفي الحقيقة هي الغلطة الاكبر والاهم ومربوطة في بعضها .. صرف حكومي مربوط بسلف بدون رقابة علي الاثنين … ففعليا مع الازمات .. بطن البلد اتفتح .. وكل الحاجات دي اتكعبلت في بعض
فوايد الديون علي الغلاء العالمي علي كورونا وتباطوء النمو

هل ده معناه لو مكنتش الحرب حصلت وكورونا مكناش هنوصل هنا ؟؟ هنا الخلاف
كل الطرق تؤدي الي روما .. هنيجي هنا لازم .. لان الحكومة بتررر لنفسها السلف والبناء … وهو تبرير صحيح سياسيا خاطيء اقتصادياً …

المهم
احنا زي ما انتوا شايفين اهو … عطلانين في الاستيراد وبنسمع كل الهراء اننا هنصنع وننتج ولما الاستيراد بيقف المنتج الوطني ودي اسطورة عبيطة .. احنا ده اخرنا في الانتاج لاسباب كثير … نبقي نحكي فيها ولو يعني انتجنا ف بتبقي سلع كده ليها ظروف خاصة زي الاسمنت مثلا والبيئة

وطبعا عجز الموازنة تاريخي بعد ما كنا في لقطات عاملين فائض اولي بجد - فائض اولي يعني من غير خدمة الدين عندنا فائض - طيب وده هيودينا فين ؟
هيودينا للفة القادمة والمرحلة الجديدة مع الرئيس اللي مختفي بقاله يجي شهر وانا شبه متأكد انه بيراجع كل حاجة من الاول

ايه اللفة القادمة ؟
نخرج من الازمة دي
فنظبط الموازنة ونقلل عجز الموازنة وندبر اقساط الديون ونعيد جدولة اللي منقدرش ندفعه .. وهيحصل شوية سلف للسداد بفوايد عالية .. لفة دمها ثقيل .. بس احنا في ثلثها الاولاني علي الاقل
طيب ودي تخلص امتي ؟ مبدئيا واقتصاديا ..نشوف موازنة يوليو٢٠٢٣

طبعا التضخم والاسعار يعوض عليك يا معلم فسواني ..لما يتم السيطرة علي التضخم وتستقر الاسعار ودي بتيجي اول ما الموازنة تتظبط .يعني بنبدأ ان العجز يقل ..ف الحكومة تبطل طبع وسلف .. ف الاسعار تستقر ..كده نبقي خرجنا من الازمة .. تستقر الاسعار مش تقل ..وحتي الدولار يستقر شوية علشان هرمنا

هل الازمة مرشحة للتصاعد ؟! في رأيي المتواضع صعب ولو حاجة بسيطة هتبقي في نفس السياق بتاع تقليل الانفاق .. ومنع الاستيراد او زيادة الموارد .. يعني مع شوية عته ممكن تصحي تلاقي رسوم او ضرايب علي اي اختراع.. فيقولك ادفع ضريبة لو جزمتك برباط علشان الجزم اللي برباط بتستهلك قطن مش جلد بس

اول بقي ما الموازنة تظبط و نعدي الازمة .. الحكومة دي توحشنا .. تروح غير مأسوف عليها ويجي حكومة جديدة .. الحكومة الجديدة بقي هيبقي مهمتها ان مصر تجيب استثمارات بجد مش الارقام المضروبة اللي بيقولوها دي .. وده يتطلب نقاش حول تدخل الجيش في الاقتصاد .، هينتهي انه هيخرج من انشطة كثير

وبس .. اي خلل في اي حاجة بقولها يأخر المراحل .. يعني دخلنا يوليو ٢٠٢٣ بعجز اكبر في الموازنة يبقي سنة سوداء اخري .. وكده تصعب الامر والحكومة ممكن تطير اسرع .. طبعا وارد ان الريس يصحي اي وقت يطيرها .. انا مش بنجم.. هي ترتيبات بتمشي بالتوازي مش بالتتابع وتأخر مسار وتمشي في غيره

طبعاً علي هامش الكلام ده .. في انتخابات ٢٠٢٤ ولازم يدخلها الريس والامور افضل .. لان لو جت وهي مش افضل .. البوكس هيخش علينا كلنا بظهره ومحدش هيقول اي حاجة 😃 وساعتها هيتقال لا عايزين تطبيل ولا معارضة وكله يبقي يقعد ساكت زي ايام التعديلات الدستورية .. لا تأيدوا ولا ترفضوا ✌🏻

بعيداً بقي عن لطميات الحق يا جدع المصانع هتقفل والاستيراد عطلان ورجال الاعمال انهاروا و مصر بتضيع .. ده الموقف السياسي/ الاقتصادي
لما الف مصنع يقفلوا .. ٢٠٠٠ مصنع .. تزيد البطالة .. وتزيد الجريمة … بس مش الحكومة تنهار وتقوم ثورة .. ده اثر جانبي وبيظهر في تقارير الداخلية كل شهر

فلو الازمة شدت .. تزود امنك الشخصي ومتمشيش بفلوس كثير وتحرس من البوابين والشغالين والسواقين (اللي تعرفهم واللي متعرفهمش) .. وتخليك اكثر حرص بشكل عام علي انفاقك خصوصا امام الغرباء .. ده لو عندك انفاق اصلا يا مواطن 😃
بس ربنا يحمي الجميع احنا بعيد عن ده بس ده لو شدت

وطبعاً في تفاصيل كثير في كل موضوع بس دي الصورة الكبيرة كده والمسار
واللي يقولك لما الحرب تخلص هنبقي كده 💪🏻 اعرف انه متفائل
الحرب ترجعنا لحدود ما قبل الكورونا .بس بدون السيطرة علي الانفاق الحكومي والسلف .. هنفضل نلف في نفس اللفة ..
انما نمو بقي وفرص عمل وكده .. لسه مش الحكومة دي

ودي كانت حدوتة قبل النوم .. وهكون مع اصدقاء البرنامج .. ارد علي استفساركم قبل ما انصرف
واقول قولي هذا واستغفر الله لي ومش مهم لكم ..
ومتنسوش تشتركووا في الnewsletter بتاعتي ..
شرفتوا 🤝