رتبها

مساء الخير.....
و لو إنتوا مش متابعين أخبار الكوكب....
يلا هاتوا كوباية الشاي بالنعناع وتعالوا ناخد لفة ف الكوكب....
♦️ فرنسا...
أسوء موجة جفاف بتضرب فرنسا كلها ومش بس فرنسا دي اوروبا كلها لدرجة ان اوروبا نسيت روسيا والغاز والصين وتايوان وبيقولوا

ان دي اسوء موجة جفاف بتضربنا من ٧٠ سنة
لدرجة ان بريطانيا العظمى فرضت قيود على استخدامات المياه و رفعت سعرها
و سويسرا ....
ايوا ياعم سويسرا اللي عماد مأكدلي إنهم بيشربوا شيكولاته بدل المية رفعت أسعار المية بسبب الجفاف عشر اضعاف

بعد ما أوروبا كلها قالت إحنا هنلم إيدينا ف استخدام الغاز علشان منحطش صوبعنا تحت ضرس بوتين ...
قاموا لبسوا فموجة جفاف هي الاسوء من ٧٠ سنة

وع الناحية التانية من الكوكب...
♦️ ألمانيا...
ألمانيا بتقول إن الإقتصاد الألماني خسر ٢٦٤ مليار دولار بسبب الطاقة لحد دلوقتي
مش كدا وبس دي المصانع الألمانية بتفكر انها تحول استخدامها من الغاز لإستخدام النفط
قامت شركة ترانسنفت الروسية وقفت امداد النفط وقالت لألمانيا واوروبا كلها..

إنتوا عليكوا استحقاقات وفلوس قديمة مندفعتش
ف معلش بقا لما تدفعوا اللي عليكوا يبقا نمدكم بالنفط
واللي ممعهوش ما يلزموش

وع الناحية التانية من الكوكب.....
♦️ أمريكا....
اسم النبي حرصه وصاينه من العين بايدن...
معلش علشان بيتحسد والعين بتاخد فيه والنبي
طلع قانون بيسمح لأمريكا إقامة مصانع أشباه الموصلات...
هتطلعلي واحدة من المطبخ وهي بتعمل الغدا هتقولي ..يعني إيه الكلام ده يا كونت كريستو ؟؟

شوفي يا ستي.....
مين الدولة اللي ف العالم اللي مسيطرة على صناعة أشباه الموصلات و٨٠٪ من إنتاجها كله رايح لأمريكا....؟؟
هي تايوان حضرتك
كدا أمريكا ضمنت ١٠٠٪ ان الصين هتضرب تايوان و هتضمها وهتكون حرب طاحنة وكل المصانع ف تايوان هتقف

ف بالتالي كل التكنولوجيا اللي ف امريكا اللي قايمة على صناعة أشباه الموصلات اللي جاية من تايوان هتتوقف تماما
آه نسيت أقولكوا ان انتاج امريكا من الرقائق واشباه الموصلات دي صفر
ودي حاجة بتدخل فصناعة الصواريخ والاسلحة والسيارات وكل التكنولوجيا

يعني لو الصين ضربت تايوان من الصبح معناه ان كل مصانع الاسلحة ف امريكا هتتوقف تماما
👌 على فكرة في خبر حلو اوي هتلاقوه فكوكب تحيا مصر؛ اخر النشره بخصوص اشباه الموصلات

👈 كمان فكوكب امريكا....
الخارجية الامريكية وجهت انذار شديد اللهجة لإيران وقالتلها هو دا وقت اتخاذ القرار
يا هتوقعي على النص النهائي الإتفاق النووي يا خلااص
ولازم تقوليلنا دلوقتي حالا...
بس إيران ردت على امريكا فلحظتها وقالت....
مهو لو انتي مهتمة كنتي عرفتي لوحدك

وع الناحية التانية من الكوكب.....
♦️تايوان....
تايوان من الصبح هتجري مناورات
بس مش مناورات عادية حضرتك...
دي بالمدفعية وبالذخيرة الحية تحسبا لإجتياح صيني وشيك

وع الناحية التانية من الكوكب...
♦️ الصين....
الصين شغالة ف اكبر مناورة بالذخيرة الحية فتاريخها ف مضيق تايوان وشرق جزيرة تايوان
لدرجة ان فوارغ الذخيرة بتقع فوق بيت رئيس تايوان

وع الناحية التانية من الكوكب....
♦️روسيا....
شبح الكوكب والكواكب المجاورة بوتين...
طلع قرار النهاردة بوقف العمل بمعاهدة نيوستارت
هتطلعلي نفس الست اللي فالمطبخ وبتعمل غدا وهتقولي .
هاااار اسود وتطلع ايه معاهدة نيوستارت دي يا اخويا.
هقولك سيبي السجق اللي ف ايدك يا ستي وانا هفهمك.

نيوستارت دي معاهدة خاصة بالصواريخ النووية الموجهه بين امريكا وروسيا
اللي رافعينها على بعض
بس أمريكا مسكتتش الصراحة على تصريح بوتين ده وردت وقالت ....
إحنا ملتزمين بالمعاهدة والنبي يارب ابوك يحج يا بوتين

👈كمان فكوكب روسيا....
إنفجارات رهيبة قرب قاعدة جوية روسية ف جزيرة القرم ومحدش عارف السبب
بس لو طلع الجيش الأوكراني هو اللي ورا الإنفجارات دي يبقا هيعمل من جيش اوكرانيا برجر او سجق اسكندراني....
معرفش مين اللي سماه سجق اسكندراني ..!!
بس هو لازم كل حاجة حلوة تبقا اسكندراني !!

وع الناحية التانية من الكوكب
♦️الجزائر
الجيش الجزائري بيعلن عن مناورات مشتركة بينه وبين الجيش الروسي فصحراء افريقيا الكبرى
رد المتحدث الرسمي للجيش الجزائري عن هدف المناورات
وقال علشان نملى الفراغ اللي سابه الجيش الفرنسي فغرب افريقيا
كدا روسيا حطت ايدها على غرب افريقيا كله

وع الناحية التانية من الكوكب....
♦️ النمسا...
وزير الطاقة النمساوي طلع وصرح وقال...
لو الكهربا انقطعت ف النمسا ٢٤ ساعة بس بسبب الغاز
الإقتصاد النمساوي هيخسر 1,8 مليار دولار
يادين النبي

يعني ال٢٤ ساعة ب اتنين مليار دولار خسائر
دا إحنا هنا لو الكهربا قطعت بيبقا كل خوفنا على الآيس كريم اللي ف التلاجة يسيح
بس الحمد لله الكهربا عندنا فمصر مبتقطعش....
الحمد لله اني احنا مش زي النمسا وعندنا كهربا

وع الناحية التانية من الكوكب.....
♦️ خخخ تركيا
تركيا بعتت سفينة تدور ع السفينة اللي بتنقب على بترول بس فين بقا.....؟؟
عند قبرص التركية
خد بالك ....
ان من ساعة مصر ما قالت شرق المتوسط هو خط احمر و اردوغان معتبش هناك بتاتااا
انما هو دلوقتي بيجر شكل أوروبا

وع الناحية التانية من الكوكب....
♦️كوكب تحيا مصر....
سيب اللي في إيدك بقا....
و ركز معايا عشان مصر بتعمل عظمه...
قريباً جدا التكنولوجيا الدقيقة هتكون .. صنع في مصر
مصر بإذن الله هتدخل مجال هينقلها نقلة نوعية محصلتش قبل كدا ...

اننا هنصنع على أرضنا وف مصر أشباه الموصلات
اللي كل العالم دلوقتي مقلوب علشانها بسبب الحرب اللي هتقوم على تايوان
وكل العالم واقف للصين ومحدش قادر يقرب منها علشان كدا...
أخيراً.... مصر هتقوم بإنشاء مجمعين لصناعة اشباه الموصلات

و الوزير المفوض التجاري بوزارة الخارجية المصرية منجي بدر قال ف تصريح تليفزيوني....
ان مصر هتقوم بإنشاء مجمعين لصناعة أشباه المواصلات...
فين بقا المصنعين دول ...؟؟
المجمع الأول هيكون ف سيناء ..
و التاني ف الصحراء الشرقية....
إشمعنى ف الصحراء الشرقية يا عم ....!!

لإستغلال ثروة مصر الكبيرة من الرمال البيضاء اللي بتقدر ب200مليار طن
اللي هي اساس صناعة السيلكون واشباه الموصلات
وحسب الأخبار كمان ان كل مجمع هيضم ثلاث مصانع وفكل مصنع من2الى4خطوط انتاج
و بتدخل اشباه المواصلات دي ف الصناعة الالكترونيه المدنية و العسكرية
ونركز بقا على العسكرية دي

👈 كمان فكوكب تحيا مصر...
شركة مصر للطياران بتعلن عن اول رحلة طيران من القاهرة لمطار معتيقة
دي حاجة عظيمة جدا وفتح باب رزق لملايين من العمالة المصرية ف ليبيا

👈 كمان فكوكب تحيا مصر...
البنك المركزي خفض قيمة الجنيه قصاد الدولار بقرشين
وكالة فيتش بتقول ان القرار ده هيكبح جماح التضخم فمصر وعلى آخر السنة الاسعار هتنزل

كفاية كدا..... وتقعدوا بالعافية
بيعيرونا بفقرنا...... بس انا مش هسكت
عبدالفتاح السيسي
والسلام عليكم ورحمة الله وبركاته
تحيا مصر🇪🇬
تحيا مصر🇪🇬
تحيا مصر🇪🇬
كونت دي مونت كريستو

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة